1 QOM'I 28 - Biblía Axweesantá Hhohho' ar Mungú 2004

Hara'ayár Daudi daanduú tlehhmuú Doó Mungú

¹ Waawutmo Daudi geeraharuuse sleémeero ar múk Israeli gana burumbuúr baraá Yerusalemu, nee múk urén oo tlahhi'i, nee geeraharuusér mukdá' waawutmoó sagadiyuús, nee geeraharuusér slaqwaruusér kume nee ar tsiire, nee mukdá' sleémeero taa daqaari'iimár i saayín nee hikwaá waawutmo nee daaqaywose, nee geeraharuusér do'oduú waawuti'iimaro, nee miguuse sleémeero dinkwa nee slaqwaruuseedá' iiatlere.

² Naagáy Daudi iri sihhiít, iri oó', «Hháe, muk'eé', aníng iiárií qaasaré', aníng aáng geeraawo ana tsabiím baraá muunaáeene doó sandakmoduú alqadór AAKOÓ MUNGÚ nguwa tleehh, nee kitángw Munguúrén ya'aawós ngi qaasi, nee xooslaá tlehhma ina amohhe'eés.

³ Ala Mungú aníng ina báy, ‹Kuúng dooeé' u tlehhká, asma kuúng a migusmoó slaqwara, nee tseerdaá yaariir iga ku'umamís.›

⁴ Tam adoorihe AAKOÓ MUNGÚ, Munguú Israeli, aníng ina tsawaár dír doó baabuúeene tawa waawutmoó múk Israeli kureerisleém. Tlahhoó Yuda guna tsawaár as iwa waawuti'in, nee baraá doó Yudawo guruú doó baabuúeé' gway tsawaár, baraá daaqoó baabuúeene aníng ina gurií baá/, iri waawutmoó múk Israeli wa qaás.

⁵ Slamí aníng AAKOÓ MUNGÚ ina daaqoó yaariír i haniís, ala baraá daaqay'eene, garmaaeé' Solomon guri tsawaár as iwa iwiiti gawaá kitangwduú waawuti'iima oo AAKOÓ MUNGÚ, múk Israeli nguwa sawaawuti'in.

⁶ «AAKOÓ MUNGÚ aníng iri báy, ‹Garmaawók Solomon an heé aníng i dó' i tleéhh. Aníng inós ugwa tsawaár tawa garmaaeé', nee aníng tawa baabuúwós.

⁷ Aníng waawuti'iimarós a gawdeés ay alhhe'eesay wasle, barnaxes inós aa iialooeés nee hara'ayar'eé' nee kaahir'eene birnga óh adoorí hamí i dirii'i.›

⁸ «Gimsé', daxta geeraá boo/oó múk Israeli sleémeero dinku'uumár AAKOÓ MUNGÚ, diirí Munguúrén iwa axamiisi aníng kuungá' nu baw, hara'ayár AAKOÓ MUNGÚ, Munguúhúng, harmagaahhaak nee aldakuutaak, as kahhó' kuungá' yaamuuká' hhoo' kiwa ala', nee kiri na/iihúng i geexeerá' as ngiwa aaliya' aluuhunge ay alhhe'eesay.»

⁹ Daudi Solomon guri báy, «Kuúng garmaaeé' Solomon, Munguú baabuúwók xueek, inós sagadiyuuseek ar muunaáwók sleémeero nee ar tsáp. Asma AAKOÓ MUNGÚ inslawoó muu sleémeero gun tsee/aarín, nee umuúqo gár ta qoomeemesi gan tsatsahhán. Barnaxes kuúng inós ugwa leeléhh u sleér, ala bar ugwa sí', inós un geexáy ay alhhe'eesay wasle.

¹⁰ Ti harmagahh, asma AAKOÓ MUNGÚ kuúng ugwa tsawaár as do'ós kudá' hhoohhoó' kuwa tlehh. Migís adoosíng tleehheek.»

¹¹ Naagáy Daudi adór garmaawós Solomon doó Mungú ngur tleehhi gay laqán, nee kutuwaywós, nee kutuwayduú xoslu babats, nee maraydaá daanduú kuqá', nee oo baraá guruú do'o, nee dír kitangwduú gurtleemu kway qaasi.

¹² Daudi adoodá' do' ngur slai tlehhmuuwo gay laqán, nee afeenír doó AAKOÓ MUNGUHE, nee kutuwoó xoosla kay babaatsi, nee oo peésaadá' taa paraátl as Mungú ki babatsi.

¹³ Daudi adór kaahamuusér Mungú nee múk tlahhoó Laáwi tar gadiyuusi gana oó' nee adór AAKOÓ MUNGÚ ngur sagadiyuusiya' baraá doó AAKOÓ MUNGUHE, nee adór xooslár doó Mungú kar amohhe'eesi.

¹⁴ Daudi sahaábuú sla'amuút guna haniís oo ta xooslár sahaábúr tleehhi awa gadiyedaá dimbadimbé, nee peésár sla'aamuta gana haniís as gadiyedaá dimbadiimbeé.

¹⁵ Sahaábu bahh'ale kuna qoomeés as kitángw tsaa'aso, nee kooko oo tsaa'aso, umuúqo kitángw tsaa'asiro kuna sahaábuuwós i qoomeés, nee muqslár peésa ar sla'amuut gana qoomeés as umuúqo kitaangw nee umuúqo tsaa'asi.

¹⁶ Sahaábu guri qoomeés as meésaadár ta mikaátér Mungú i qamin, tam muqslaadár peésa gari haniís as meésaadár peésa kawa tleehhi.

¹⁷ Sahaábuú hhohhó' sleeme guna haniís kuwa muqslár afér koóm ar tleehhi, nee tlahhsa, nee slooqi'i, nee búkloó sla'amuút oo ta sahaábúr tleehhi nee oo peesaaro.

¹⁸ Sahaábuú hhohhó' guri haniís oo ta kitángw ilahhooár mooyángw tsuú' i da/aa/an ar tleehhi, guri slaqsoó gaárír sahaábuú i haniís ar slaqsa'aá keruúbi, tidá' sandakmoó alqadór AAKOÓ MUNGÚ gwaa hhampe'eeri'ín ar tuuntukuun.

¹⁹ Tí sleémeero waawutmo gana gwa/aateés ar gooi, adoodá' kura geerahaár nee AAKOÓ MUNGÚ, gadiyeérí sleémeero i tleehharut ar adoodá' kara qoomeés.

²⁰ Aluuwo waawutmo Daudi garmaawós Solomon guri báy, «Gimáy, piíhh muuna hhe'eés, gadiyeérí tleehheek, ma da'ayuumitaar laqaá ma amoqwaqwadiimar, asma AAKOÓ MUNGÚ, Munguúeé', i dinkwa nee kuúng. Inós kuúng u baloó geexayká, laqaá u baloó mayká ay dír gadiyeé sleémeero ar doó AAKOÓ MUNGÚ i hhooeer.

²¹ Ga/aaweek, bohhaá kaahamuusér Mungú nee bohhaá múk tlahhoó Laáwi i dayá' as gadiyedu sleémeero awa doó Mungú. Sagadiyuusér fuqureeraá koom ar umuúqo ado kaa amohhe'eés as kuúng uwa ale/iisiya', sleeme geeraharuuse nee muu sleémeero a sagók ngun /ayiyá'.»