1 QOM'I 27 - Biblía Axweesantá Hhohho' ar Mungú 2004

Digir wakeetíngw slaqwaruuse

¹ Gaarí an faarór múk Israeli, kuduú geeraharuusér tlahhi'i, nee geeraharuusér slaqwaruusér kume nee ar tsiire, nee geeraharuuseedá' waawutmo Daudi gwaa sagadiyus, daanduú bohhuudá' ti baalaqamiimá' niwa hardarahiya', niwa tlatlaya' umuú slahhaango, boohhár wák a kume mibeeri tsár nee tsiyáhh:

² Geeraharusmoó baalaqaasír geera ar slahhángw geera a Yashobeamu garmoó Sabdieli, mukós a kume mibeeri tsár nee tsiyáhh.

³ Inós oo guruú doó Peresi, inós an geeraharusmoó geeraharuusér slaqwaruuse ar slahhángw geera.

⁴ Dodai oo guruú doó Ahohi, an geeraharusmoó boohhár tsár ar slahhángw tsár, daqtós a muu kume mibeeri tsár nee tsiyáhh.

⁵ Geeraharusmoó baalaqaasír tám baraá daqtidár slahhángw tame a Benaya garmoó Yehoyada, kaahamusmoó Mungú. Inós múk aa sagesihhiít baraá gadiyeédae a muu kume mibeeri tsár nee tsiyáhh.

⁶ Benayawí an migusmoó wák baraá miguuseedár mibeeraá tame nee an geeraharusmoó mukwí. Garmawós kudá' ta bay Amisabadi a geeraharusmoó slaqwaruseerós.

⁷ Asaheli, hhiyoó Yoabu, an heé tsiyáhh oo slahhángw tsiyáhh gwaa oh, mukós a kume mibeeri tsár nee tsiyáhh, garmaawós Sabadia aluuwós gina haár.

⁸ Geeraharusmoó baalaqaasír kooán oo slahhángw kooán a Shamhuti heé tlahhoo Israhi, baraá baalaqaasirose mukós a kume mibeeri tsár nee tsiyáhh.

⁹ Geeraharusmoó baalaqaasír lahhoó', oo slahhángw lahhoó' a Ira garmoó Ikeshi oo Tekoár daáhh, baraá baalaqaasirose mukós a kume mibeeri tsár nee tsiyáhh.

¹⁰ Geeraharusmoó baalaqaasír faanqw, oo slahhángw faanqw a Helesi heé Pelonír daáhh, inós oo tlahhoó Efraimu, baraá baalaqaasirose mukós a kume mibeeri tsár nee tsiyáhh.

¹¹ Geeraharusmoó baalaqaasír dakaát oo slahhángw dakaát a Sibekai, heé Hushati oo tlahhoó Sera, baraá baalaqaasirose mukós a kume mibeeri tsár nee tsiyáhh.

¹² Geeraharusmoó baalaqaasír gwaleél oo slahhángw gwaleél a Abieseri oo Anatotír daáhh, heé tlahhoó Benyamini, mukós a kume mibeeri tsár nee tsiyáhh.

¹³ Geeraharusmoó mibaangw oo slahhángw mibaangw a Maharai, heé Netofatír daáhh, oo tlahhoó Sera, inós mukós a kume mibeeri tsár nee tsiyáhh.

¹⁴ Geeraharusmoó mibaá nee wak oo slahhángw mibaá nee wak a Benaya kuduú Piratonír daáhh, heé tlahhoó Efraimu. Baraá baalaqaasirose mukós a kume mibeeri tsár nee tsiyáhh.

¹⁵ Geeraharusmoó mibaá nee tsár oo slahhángw mibaá nee tsár a Heldai, heé gixsár Netofatír daáhh oo tlahhoó Otnieli, baraá baalaqaasirose mukós a kume mibeeri tsár nee tsiyáhh.

Geeraharuusér tlahh'aá múk Israeli

¹⁶ Gaarí an umér múk urén oo tlahh'aá múk Israeli: Múk tlahhoó Reubeni heé taa uráy haniís a Elieseri garmoó Sikri. Geeraharusmo úr oo tlahhoó Simeon a Shefatia garmoó Ma'aka.

¹⁷ Tlahhoó Laáwi heé taa uráy haniís a Hashabia garmoó Kemueli, nee tlahhoó Aroniwo a Sadoki.

¹⁸ Tlahhoó Yudawo heé taa uráy haniís a Elihu, inós a heé wák baraá hha'aá waawutmo Daudiwo. Tlahhoó Isakariwo a Omri garmoó Mikaeli.

¹⁹ Tlahhoó Sebuluniwo a Ishmaya garmoó Obadia. Tlahhoó Naftaliwo a Yerimoti garmoó Asrieli.

²⁰ Tlahhoó Efraimuwo a Hoshea garmoó Asasia, oo tlaqtá tlahhoó Manase a Yoeli garmoó Pedaya.

²¹ Tlaqtá tlahhoó Manase tidár da/aáw baraá yaamaá Gileadi, a Ido garmoó Sekaria. Tlahhoó Benyaminiwo a Ya'asieli garmoó Abneri.

²² Tlahhoó Daniwo a Asareli garmoó Yerohamu. Mukwí an geeraharuusér tlahh'aá Israeli.

²³ Ala waawutmo Daudi múk Israeli oo kureeri mibeeri tsár gaa ayká gwaa faariiká. Asma AAKOÓ MUNGÚ al'axweesani gana oó', adór múk Israeli ngur tlahhás adór tsatse/uú gawaá doori.

²⁴ Yoabu garmoó Seruya, múk Israeli guna iiár faarooro ala gwaa faakiiká. Tam adoorihe, múk Israeli slahh'amuú úr guna sláy ar faaroorí, faarór múk Israeli kari dahaasiika baraá kitaábuú inslaslángw waawutmo Daudiwo.

Sagesihhtuusér daqaari'iimár waawuti'iima

²⁵ Heé daqaari'iimár doó waawutmo gaa sagesihhiit a Asmaweti garmoó Adieli. Heé daqari'iimadár baraá yaamu nee gixsadu' nee ayeemo nee /aampu gaa sagesihhiit a Yonatan garmoó Usia.

²⁶ Heé doosluuse gaa sagesihhiit a Esri garmoó Kelubu.

²⁷ Heé qamaá sabiíbu gaa sagesihhiit a Shimei, heé Ramatír daáhh. Heé bu'uungw nee bohoongwdá' taa difaáírí qaás gwa sagesihhiit a Sabdi, heé Shifmír daáhh.

²⁸ Heé xaa'aá seituúni nee /aantsí kudaá baraá Shefela gaa sagesihhiit a Ba'al-hanani heé Gederír daáhh. Nee heé hhaleraá di/i gaa sagesihhiit a Yoashi.

²⁹ Heé hikwa gaa sagesihhmiit baraá qawtantá Sharonír wa ale a Shitrai heé Sharonír daáhh. Heé gi sagesihhmiít baraá xatsoowo a Shafati garmoó Adlai.

³⁰ Heé angamía ga sagesihhmiít a Obili heé tlahhoó Ishmaeli. Heé daqwaayér sagesihhmiít a Yedeya, heé Meronotír daáhh. Heé bee/ángw sagesihhmiít a Yasisi heé tlahhoó Hagri.

³¹ Inooínaaká' sleémeero an kudá' waawutmo Daudi aa saayín daqaari'iimarós kawa sagesihhmiiti.

Hara'ayuusér Daudi

³² Yonatan, maamoó waawutmo Daudi, inós an hara'ayusmo nee heé muruú tsatsahhaám nee a goousmo. Inós nee Yehieli garmoó Hakmoni, daaqoó waawutmo nguna intsaahhatimisiyé'.

³³ Ahitofeli sleeme an hara'ayusmoó waawutmo, Hushai, heé tlahhoó Arki, inós a mulqumoó waawutmo.

³⁴ Ala Ahitofeli iwa gwaá', kitaangós kway óh nee Yehoyada garmoó Benaya nee Abiatari. Yoabu a geeraharusmoó slaqwaruusér waawutmo.