1 QOM'I 26 - Biblía Axweesantá Hhohho' ar Mungú 2004

Xuumuusér doó Mungú

¹ Múk tlahhoó Laáwi oo gadiyér xuumár afkú Doó Mungú gaa tleehh a kwí: Doó Korawo a Meshelemia garmoó Kore, oo guruú doó Asafu.

² Meshelemia daaqaaywós a kwí faanqw: Oo baris a Sekaria, oo tsár a Yediaeli, oo tám a Sebadia, oo tsiyáhh a Yatnieli,

³ oo kooán a Elamu, oo lahhoó' a Yehohanani nee oo faanqw Eliehoenai.

⁴ Heeko wák i deer umuuwós an Obed-edomu, inós daaqaaywós a kwí: Oo baris a Shemaya, oo tsár a Yehosabadi, oo tám a Yoa, oo tsiyáhh a Sakari, oo kooán a Netaneli,

⁵ oo lahhoó' a Amieli, oo faanqw a Isakari nee oo dakaát a Peuletai. Asma inós kuna tsuúq nee Mungú.

⁶ Garmaawós kudá' ta bay Shemaya, daaqaay guna laqwaál oo baaliliím baraá guruú doó baabuúine, asma a hhawaataá /uureemaá koomá'.

⁷ Daaqoó Shemaya a kwí: Otni nee Refaeli, nee Obedi, nee Elisabadi, inós hhaeewós kudá' /uureemaá koomá', nee Elihu nee Semakia.

⁸ Kuká' sleémeero a na/aá Obed-edomu, inooín nee na/ii'ine nee hhaeeine, a múk ilakaaharén oo gadiyeérí ga aleesláw. Múk guruú doó Obed-edomu dinkwaaro a mibeeri lahhoó' nee tsár.

⁹ Meshelemia daaqaywós nee hhaeewose awa /uureemaá koomá' ngi kon mibaá nee dakaát.

¹⁰ Hosa a garmoó wák baraá daaqoó Merariwo, inós daaqaay gu kón. Shimri baabuúwós guna uráy haniís tam na/oó barsuwokahe.

¹¹ Hilkia a garmoó tsár doó Hosawo, oo tám a Tebalia, nee oo tsiyáhh a Sekaria. Daaqaay sleémeero oo doó Hosa dinkwaaro nee hhaeewose a mibaá nee tám.

¹² Xuumuuseerír afér do' kana qasmiís baraá daqooráy ar adoodá' maray'ín i dirii'iya', inooín sleeme kina baalaqaasírí sláy baraá doó AAKOÓ MUNGÚ adoodár hhaeeín awa hatlá' wa ale.

¹³ Tsawdo kari tleéhh ar gur'ér maraá baabi'i, muu burku úr laqaá ku niiná, sleémeero a adór wák, umuú heewo afkú do' guna xún.

¹⁴ Tsawdór geera a afkú bihhaá da/aáw xuuma, Shelemia guna sleér, nee garmaawós Sekaria, kudá' muu i daharií lehhaahhiti, afkú bihhaá /iya gway sláy.

¹⁵ Obed-edomu tsawdo guri sleér, bihhaá basa ngiwa xun, daaqaywós doó xooslár dimbadiimbé koóm gun xún.

¹⁶ Shupimu nee Hosa tsawdór afkú /uwa oo Shaleketi gay sleér, didár gáwtí tsa/a/amto, didae xuuma kana baalaqaamiís.

¹⁷ Xuumuusér tlahhoó Laáwi a lahhoó' umuú baalaaro, bihhaá /iiko a tsiyáhh umuú baalaaro, nee basko a tsiyáhh umuú baalaaro, dír do'odá' xooslár dimbadiimbé kooma muu ku qamin tsár umuú baalaaro.

¹⁸ Amoodár xaftidár bihhaá /uwawo, baraá loohidá' ure xuumuuse a tsiyáhh, nee dír xaftidár kilae xuumuuse a tsár.

¹⁹ Adoorí an adoodá' baalaqaasír xuuma kara tlehhiít dír tla/ángw múk guruú doó Kora nee oo doó Merariwo.

Gadiyér hatlá' ar doó Mungú

²⁰ Baraá tlahhoó Laáwiwo Ahiya kuna qaás, peésár doó Mungú ngiwa amohhe'eemisi nee xoosladá' taa dákw i qaás as gadiyér doó Mungú sleeme.

²¹ Ladani, heé hhay Gershoni inós dír muu bahh'alehe a aakooín, baraá tla/angw'ine bahh'ale a xwaylár garmaawós kudá' ta bay, Yehieli,

²² na/aá hatlá' awa tsár awa Yehieli a Setamu nee Yoeli kina qaás as peésár doó AAKOÓ MUNGÚ ngiwa amohhe'eemisiya'.

²³ Sleeme gadiyeé kari qasmiís dír tlahh'aá Siria nee Ishari nee Hebroni nee Usieli.

²⁴ Shebueli garmoó Gershoni, garmoó Mose, inós an geeraharusmoó úr oo mukduú peésár Doó Mungú ga amohhe'eemamiís,

²⁵ nee hhiyaawós Elieseri kudá' baabuúwós ta bay Rehabia, Elieseri Yeshaya guri laqwaál, Yoram Sikri guri laqwaál, nee Sikri Shelomoti guri laqwaál.

²⁶ Shelomotiwí nee hhaeewós kina qaás tawa múk peésár doó Mungú ga amohhe'eemiís, nee xoosladá' sleémeero tidá' waawutmo Daudi aa paraátl as AAKOÓ MUNGÚ, inós nee geeraharuusér tlahhi'i, nee geeraharuusér kume, nee ar tsiire, nee geeraharuusér slaqwaruuse.

²⁷ Xooslaarír haasaáng naa baraá slaqwarár hayoohiyé' kay bahh paraátl as kawa gadiyér Doó AAKOÓ MUNGÚR tleehhi.

²⁸ Mura' sleémeero oo taa paraátl nee Samueliduú iigu'utusmo nee Saulo garmoó Kishi, nee Abneri garmoó Neri, nee Yoabu garmoó Seruya, muruuwí kun xún nee Shelomoti nee hhaeewós.

Gadiyér múk tlahhoó Laáwi oo hatlá'

²⁹ Baraá daaqoó Ishariwo Kenania nee daaqaywós kina geeraharuusér wa qaás nee har'ohuusér múk Israeli.

³⁰ Baraá daaqoó Hebroniwo, Hashabia nee hhaeewós awa kumuú wák nee tsiire faanqw hhawaataá aleesleemuú koomá', kina qaás as múk Israeli kuduú bihhaá /uwa yaaér Yordaniro, kuwa sagesihhiiti daanduú gadiyér AAKOÓ MUNGUHE nee gadiyér doó waawutmo Daudiwo.

³¹ Yeria a geeraharusmoó múk guruú doó Hebroni. Qoomár kurkú mibeeri tsiyáhh oo waawuti'iimár Daudi múk aleesleemuú koóm kuri leeleéhh, kuri baraá Yeserír wa sláy tidár baraá yaamaá Gileadi.

³² Waawutmo Daudi Yeriya nee hhaeewós awa kume tsár tsiire faanqw, kudá' aleesleemuú koomá', giri qaás, inooín a geeraharuusér tlahhi'i, as muruú Mungú wa hariím nee waawutmo, nguwa sagesihhimitiya' dír múk tlahhoó Reubeni nee oo Gadi nee tlaqtá tlahhoó Manase.