1 QOM'I 23 - Biblía Axweesantá Hhohho' ar Mungú 2004

¹ Qoomár Daudi tawa aakoó aa diimaay hhe'eés, garmaawós Solomon guri waawutmoó Israeli wa qaás.

Gadiyér múk tlahhoó Laáwi

² Waawutmo Daudi geeraharuusér múk Israeli gana iigu'uús sleémeero, nee kaahamuusér Mungú nee múk tlahhoó Laáwi.

³ Inós múk tlahhoó Laáwi guri faár, hhawaate kilooín awa kureeraá mibeeraá tám ngaa aye' nee awa ngaa ba/iye' a kume mibeeri tám nee dakaát.

⁴ Waawutmo Daudi baraá tla/ángw mukdae múk kume mibeeri tsár nee tsiyáhh guri qaás gadiyér Doó AAKOÓ MUNGÚ ngiwa sagesihhmitiya'. Múk kume lahhoó' a geeraharuuse nee har'ohuuse,

⁵ nee múk kume tsiyáhh a xuumuusér afér gixsa, múk hatlá' oo kume tsiyáhh guna qaás AAKOÓ MUNGÚ nguwa xirfayeemisiya' ar xooslaá daa'aangw kudá' waawutmo aa haniís as gadiyeérí.

⁶ Daudi múk tlahhoó Laáwi gway daqooroó tám i qasiís ar adoodá' tlahhi'ii'ín i dirii'iya': Tlahhoó Gershoni, tlahhoó Kohati, nee tlahhoó Merari.

⁷ Daaqoó Gershoni a Ladani nee Shimei.

⁸ Daaqoó Ladani a tám, Yehieli a heé úr, nee Setamu, nee Yoeli.

⁹ Daaqoó Shimei a tám, Shelomoti nee Hasieli nee Harani. Kuká' an geeraharuusér uren baraá tlahhoó Ladaniwo.

¹⁰ Daaqoó hatlá' oo Shimei a kuká' tsiyáhh: Yahati, nee Sina, nee Yeushi, nee Beria.

¹¹ Yahati a geeraharusmooín, oo tsár a Sisa, ala Yeushi nee Beria na/aá yaariir ngaa laqwali'iiká, inooín kina tlahhoó wák i faár.

¹² Kohati daaqaay ngu kón a tsiyáhh, a Amramu nee Ishari, nee Hebroni nee Usieli.

¹³ Daaqoó Amramu a Aroni nee Mose, Aroni kuri qaás as xosluudá' ak ló'wa hhohho' ngiwa paraatli as Mungú, as inós nee daaqaywós mooyaangw nguwa da/a/ana' dír AAKOÓ MUNGÚ, nee nguwa sagadiyuusiya', nee muu nguwa tsuuquna' ar umuú AAKOÓ MUNGÚ ay alhhe'eesay wasle.

¹⁴ Ala daaqoó Mose, heé Mungú, kuna harafaár baraá tlahhoó múk Laáwi.

¹⁵ Daaqoó Mose a Gershomu nee Elieseri.

¹⁶ Garmoó taa uráy haniís baraá daaqoó Gershomu a Shebueli.

¹⁷ Ala Elieseri garma ngu kon a wak, a Rehabia, a geeraharusmo. Ala Rehabia daaqaay ngu kon ku yaariír.

¹⁸ Garmoó taa uráy haniís baraá daaqoó Ishariwo a Shelomiti.

¹⁹ Daaqoó Hebroni a kwí: Yeria an geeraharusmo nee Amaria an oo tsár, nee Yahasieli nee Yekameamu.

²⁰ Usieli daaqaay ngu kon tsár, Mika a geeraharusmo, nee oo tsár a Ishia.

²¹ Daaqoó Merari, a Mahli nee Mushi. Daaqoó Mahli a tsár, a Eliasari nee Kishi.

²² Ala Eliasari ina gwaá' tam na/oó garma oo i kon i kaahh, aqo har dasu kilós. Dasuuwós kuri duxuút nee daaqoó Kishi hhiyoó baabuúín.

²³ Mushi daaqaay ngu kon a tám, a Mahli nee Ederi nee Yeremoti.

²⁴ Kukaáká' an múk tlahhoó Laáwi ar adoodá' baraá maray'ine i dirii'iya', kudá' uren dír tlahh'aá taati'ii'ine. Umuúqo heé kureeraá mibeeri tsár gaa ay nee oo gaa ba/i, umuuwós kuna gooín, kuri gadiyeédí haniís baraá doó AAKOÓ MUNGUHE.

²⁵ Daudi iri oó', «AAKOÓ MUNGÚ, Munguú Israeli, mukós gwaa waydú i haniís, inós daxta i hoot baraá Yerusalemúr wa ale ay daqisleém.

²⁶ Daxta gár múk tlahhoó Laáwi kus leelehhitaan i káhh as heémadá' hhoohhoo' gagaara nee xosluudaá gadiyér doó Mungú.»

²⁷ Adoodá' axweesantá alhhe'eesay ar Daudi i diri', heé tlahhoó Laáwi oo kureeraá mibeeri tsár gaa ay, nee oo gaa ba/i, kuna gooín.

²⁸ Gadiyér taa dir'ín i haniís a tí: Kaahamuusér Mungú tidár tlahhoó Aroni kawa ale/iimisi baraá gadiyér Doó AAKOÓ MUNGUHE, afeenár doó Mungú nee kutuwaywo kiwa amohhe'eemisi, nee xosluudá' hhohho' kawa hamtliti, nee umuúqo gadiyér dawa baraá doó Munguhe.

²⁹ Gadiyér'ín ar hatlá' a mikaáteedá' hhohho' ar ta Mungú i hanmamisi kan amohhe'eemiis, nee puruúdá' natsaatsaá', nee balangwduú ilahhooa, mandasaydá' taa sluuftisiiká, nee ilahhooár muruú taa garangarín, ilahhooadá' tinda aleedoók ar di/i, ilahhooa as qoomeemesuú muruudá' yaariír tinda huúw, nee kudá' aa tlaahh,

³⁰ nee umuú deelooro matlaatle nee tsiindoowo tan sihhmiít dír geeraá AAKOÓ MUNGÚ as nguwa sluufmisiya' nee nguwa xirfayeemisiya'.

³¹ Qoomár deelór Sabaátoro nee deelór slahhángw /abén nee deelór hatlá' ar urene ilahhooár da/a kawa hanmiís dír AAKOÓ MUNGÚ. Dabe kana qaás adoodá' múk Laáwi faaror'ín i diri'. Múk Laáwi gadiyér'ín tí kan tlehhiit dír geeraá AAKOÓ MUNGÚ wa ale umuú daqto.

³² Múk tlahhoó Laáwi gadiyér'ín a xuumár heémár dinku'uuma nee didá' hhoohhoo', nee hhaeeín kudaá kaahamuusér Mungú ngiwa ale/iimisiya', kudaá xwaylár Aroni, baraá gadiyér Doó AAKOÓ MUNGUHE.