1 QOM'I 22 - Biblía Axweesantá Hhohho' ar Mungú 2004

¹ Daudi iri oó', «Diirí an didá' Doó AAKOÓ MUNGÚ kway tleehhi. Kitaangwí an kitángw múk Israeli ilahhooár da/a kawa hanmiisi.»

Amohhe'eemisuú tlehhmuú doó Mungú

² Waawutmo Daudi /eetuusér baraá yaamaá Israeli hoot gana burumbuúr, nee gay gadiyeédí sláy. Bahh'alé tlaa/e awa Doó Mungú tlehhmu ngina tuu'utiyé'.

³ Daudi muqslár yaariir ar ta kaaka/amár tlehhiiti nee muqslár afér gixsa kar tsegiiti gari baáts, nee muqslár sirda/aten ar qoomay wasl gari qaasír wa baáts ar ta afér dó' ár tleehhi.

⁴ Daudi múk Sidoni nee oo Tiro guna qaás as waqasuú sahhta nguwa huwiya' oo faaroro ta aleslayká.

⁵ Daudi iri baraá muunaáwós i oó', «Doó AAKOÓ MUNGÚ kudá' garmaaeé' Solomon i tleehhi, masók ku hhoohhoó', nee masók xirfuuwós ku iia tleér baraá yaamuwo. Ala inós ku niiná, aa kwa/iiká, gawaá adoorihe aníng xooslár tlehhma a amohhe'eés.» Daudi tiri amohhe'eés, xooslár yaariir gari sláy dír ira gwaiiká.

⁶ Naagáy Daudi garmaawós Solomon guri ateét as doó AAKOÓ MUNGÚ, Munguú Israeli, nguwa tleehhi.

⁷ Daudi garmaawós Solomon guri báy, «Garmaaeé', aníng geera baraá muunaáeene aga slaá' AAKOÓ MUNGÚ, Munguúeé', nguwa dó'i tleehh, as nguwa xirfayeemiis.

⁸ Ala AAKOÓ MUNGÚ aníng ina báy, ‹Kuúng nee múk yaariír aga slaqwaquundé', nee tseere ana ku'umamís. Asma kuúng tseerér yaariir aga ku'umaamís dír geeraaeene baraá yaamuwo, kuúng dooeé' ngu tlehhká.

⁹ Ga/aaweek, na/oó garma ku xwaylúy do'oge, inós tari heé wayda. Inós un waydií haniís dír wakuuseerose umuúqo barto, asma umuuwós ku bay, Solomon. Aníng wayda nee amohhooaro ngiri haniís dír múk Israeli qoomár waawuti'iimarose.

¹⁰ «Inós dooeé' gu tleehh. Inós tari garmaaeé', aníng tari baabuúwós. Kitaangós oo waawuti'iima un gawdeés baraá Israeliro ay alhhe'eesay wasle.

¹¹ «Daxta garmaaeé', AAKOÓ MUNGÚ, Munguúwók, masók a dinkwa nee kuúng, as kahhó' Doó AAKOÓ MUNGÚ, Munguúwók, kuwa aleesleér tleehhamooro ar adoodá' ngira oó' daanduuwoge.

¹² AAKOÓ MUNGÚ dahar nee tsaahha ngi haniisi, as kahhó' bál bar geeraharu'uumár múk Israeli ngaa kuúng i haniís, kuúng dabér AAKOÓ MUNGÚ Munguúwók kawa ot.

¹³ Ala kuúng dabeedár AAKOÓ MUNGÚ nee kaahirose, tidá' aa haniís dír Mose as múk Israeli, bar aga ót nee kay harmagáhh, daqaní kuúng adoorók i qoón, /aátl nee muuna hhe'eés, ma baloó da'ayuumitaar, tam ma amoqwaqwadimaar.

¹⁴ Aníng aga magaáhh, qaasír doó AAKOÓ MUNGÚ aga qaás, talaántár kume tsiiru ar sahaábu aga burumbuúr, nee talaántár kumér kumuú wák ar peésa, nee muqslár sirda/aten, nee muqslár hatlae ar qoomay wasl aga qaás, nee xaai nee tlaa/e iga amohhe'eés, ala kuúng doogeek.

¹⁵ Slám kuúng múk yaariír oo tlaa/e gi hhaásl nee qwatsiiruuse, nee awa xaai gi daákw u koón, nee múk muruú yaariír gu aleesláw tlehhtuuwo u koón,

¹⁶ awa sahaábu kwahhooro ngu aleeslawá', nee muqslár peésaaro, nee tidá' sirda/atene nee muqslár hatlae. Gimáy gadiyeé iimu/umeek, AAKOÓ MUNGÚ masók a dinkwa nee kuúng.»

¹⁷ Daudi geeraharuusér Israeli sleeme gay ádbáy as garmaawós Solomon nguwa ale/iimisiya'.

¹⁸ Daudi iri oó', «Ahaá AAKOÓ MUNGÚ, Munguúhúng, i dinkwa nee kuungáeéke? Ahaá kuungá' naa waydií haniisikáhe bihhe sleémeero? Inós yaamuloouusér yaamuuká' ngina qaás baraá dabaeé', daxta taa hanisiyé' dír AAKOÓ MUNGÚ nee mukós.

¹⁹ Gimsé', daxta AAKOÓ MUNGÚ, Munguúhúng, leelehhaak ar inslawayhúng nee ar munerhúng sleémeero. Tlawsé', doó AAKOÓ MUNGÚ tleehhaak, as kahhó' sandakmoó alqado oo Mungú nee xosluudá' hhohho' kawa qaasi baraá do'oduú AAKOÓ MUNGÚ.»