1 QOM'I 21 - Biblía Axweesantá Hhohho' ar Mungú 2004

Daudi múk Israeli nguwa faár

¹ Neetlaangw ina sihhiít múk Israeli nguwa slahh'amií huwi, Daudi guri tliwií/ múk Israeli nguwa faari.

² Daudi Yoabu nee geeraharuuse giri báy, «Tlawsé', múk Israeli faarare' iimír yaamaá Be'er-sheba wa tleemu ay yaamaá Dani, faaror'ín huwaare', asma aníng a xu'utír wa slaá'.»

³ Yoabu iri oó', «AAKOÓ MUNGÚ múk Israeli ngu doogi sagaá wa tsiiru. Aá mukwí sleémeero a sagadiyuusér aakooeé' waawutamoowokáhe? Ahaá waáy, gár kuúnguú aakooeé' adoorí kasa slá'? Ahaá waáy, mas slá' tlakweema ngiwa húp gawaá múk Israeli?»

⁴ Ala Yoabu afór waawutmo gaa alwaarahhiiká. Inós ina tláy yaamaá Israeli sleémeero giri alhi'iimiít, iri kií/ Yerusalemu.

⁵ Yoabu faarór múk Israeli sleémeero gari huúw dír Daudi. Baraá Israeliwo múk slaqwarár paangadu ga baál a kume kumuú wák nee kume tsiiruú wák, baraá Yudawo múk slaqwarár paángadu ga baál a kume tsiire tsiyáhh nee mibeeri faanqw.

⁶ Ala Yoabu múk tlahhoó Laáwi nee oo Benyamini gwaa faariiká asma hara'ayár wawutmo inós guna buhhtís.

⁷ Ala Mungú adoorí taa tleéhh gwaa sla'atiská, gawaá adoorihe múk Israeli gway muúx.

⁸ Daudi Mungú guri báy, «Aníng tlakweemaá ur iga tleéhh as adoorí ngiwa tleéhh, ala aníng kuúng u firiím, tlakweemaaeé' gurtlaweek, anuú sagadiyusmoowók, gár tlaakw aga tleéhh.»

⁹ Naagáy AAKOÓ MUNGÚ aarusmooduú Daudi ta bay Gadi guri báy,

¹⁰ «Tláw, Daudi ku beer, AAKOÓ MUNGÚ i kaahi, ‹Muruú tám ngwaa dír geeraawók i qaás, kuúng gár wák tsawareek, án ngi kuúng i tleéhh.› »

¹¹ Gawaá adoorihe, Gadi iri daqáy amór Daudi guri báy, «AAKOÓ MUNGÚ i kaahi, ‹Gár wák ar ta sla' tsawaareek.

¹² Kureeraá tám awa qwari, laqaá slahheeraá tám awa tuwa slakaati nee wakuuseerók ar paánga, turi qororo'oos, laqaá deelo tám ar muxtár paángár AAKOÓ MUNGÚ ar tiqtír pu/i ngiwa huwi, nee malaykamoowós yaamu sleémeero awa Israeli ngiwa hhaamisi.› Daxta tsawdiím kudaádá' iga ya/aaw mu báw.»

¹³ Daudi Gadi guri báy, «Aníng hhaslór yaariir iga eér, a tsiní bar aga huú' gawaá dabaá AAKOÓ MUNGÚ, asma inós i gurtleemuú kón ta niwa huua gawaá dabaá hee.»

¹⁴ Naagáy AAKOÓ MUNGÚ tiqtír pu/i gari kwaáhh gawaá múk Israeli, múk kume mibeeraá faanqw iri qaátl oo Israeli.

¹⁵ Mungú malaykamo gway ya/aáw as gixsár Yerusalemu ngiwa qwaareesi, ala inslawaywós gway warqeés, malaykamoowí gway báy, «Aido, dawar ki/eek.» Malaykamo qoomaadae i sihhmiit dír afeenír balaangw muxta ar doó Ornani heé Yebusi.

¹⁶ Daudi, malaykamo guri ár i sihhmiit tla/ángw doorí wa ale i paángár kón dakose, taa amohhe'eés gixsár Yerusalemu ngiwa qwaareesi. Daudi nee bariisér xoorór Israeli tari gur'ér ar qaát yaamu, guniyadu ngaa tsiitiyé'.

¹⁷ Daudi iri firín, «Aá Mungú, heé tlakweema gaa tleehh a aningekáhe? anínguú kilá' ana oó' muu ku faari, gaarí tlaakw ana tleéhh. Ahaá bee/aangwí gár aa tleéhh a milá? AAKOÓ MUNGÚ, Munguúeé', aníng kuúng u firiím, aníng na muxáng nee múk dooeene, mukók maweek, mu muxaar.»

¹⁸ Malaykamoó AAKOÓ MUNGÚ, Gadi gway báy Daudi kubeeto, «Dír ilahhooár ilahhooár AAKOÓ MUNGÚ tleehheek dír afeenír balaangw muxta ar Ornani, heé Yebusi.»

¹⁹ Naagáy Daudi adoodá' Gadi aa oó' ar umuú AAKOÓ MUNGÚ gari eehár.

²⁰ Ornani nee na/iiwós awa tsiyáhh ta aangánoó muux, ala malaykamo nguwa ariyé', na/iidá' nay gowiyé', nay nahhaatiyé'.

²¹ Ornani Daudi nguwa ár iwa amoorós kay, didár balaangw muxta gana geexáy iri geerií hi'iít, iri tumbarara'aát dír Daudi sagós guri xupuús ay yaamu.

²² Daudi iri oó' dír Ornani, «Dirók tír balaangw muxta aníng i weerisang as ngiwa kitángw ilahhooár AAKOÓ MUNGÚ i tleehh, as tiqtiirír pu/i iwa tsauur. Aníng a tlaáxw ar hariímár kuúng ni o'.»

²³ Ornani iri oó', «A sleér, aakooeé' waawutámo, tleehheek tidá' kuúng ta sla'. Awe a tí ar ilahhooár da/a tidá' ta da/ dír kitaangwí wa ale, nee migír a xaiikaá balaangw muxta, nee aangáno oo puruú ilahhooa a kwí. Aníng muruuwí sleémeero ngu kuúngií haniís.»

²⁴ Ala waawutmo Daudi Ornani guri báy, «Aasla'áy, aníng muruuwí sleémeero aqo ngun buú'. Gaarók a huwaaká dír AAKOÓ MUNGÚ, laqaá ar naa tlaxwiiká a hanisaaká dirós.»

²⁵ Daudi shekeéli tsiire lahhoó' ar sahaábu gari haniís dír Ornani as afeenidár balaangw muxta ngiwa tlaxwi.

²⁶ Daudi kitángw ilahhooa ngiwa haniisi dír AAKOÓ MUNGÚ gway tleéhh dír afeenidá' i alé. Daudi ilahhooár da/a gari haniís nee ar wayda. Daudi iri firín, AAKOÓ MUNGÚ firoorós gay mu/aywaáts, asla gay /aytiís gawaá doorí wa ale, muruudá' aa ilahhooár wa haniís gway /ák.

²⁷ Naagáy AAKOÓ MUNGÚ malaykamoowós guri ádbáy paánga ngiwa ki/isi baraá tlakwaay, malaykamo paánga gari qaás baraá tlakwaywós.

²⁸ Daudi ngiwa ár adoodá' AAKOÓ MUNGÚ firoorós ngiwa mu/aywaáts dír kitangwduú balaangw muxta aa tlaáxw dír Ornaní wá alé, heé Yebusi, inós ilahhooár muruú ta tsu/i gay hanmiís didá' wa alé.

²⁹ Asma heémadár AAKOÓ MUNGÚ tidá' Mose aa tleéhh baraá xaanxaywo, nee kitangwdá' taa ilahhooár wa da/a/án qoomaadae i amoodár gawa ar Gibeonír í dirii'iyá'.

³⁰ Ala Daudi daqeemuú amoodá' gwa aleeslayká as Mungú nguwa firin, asma inós ina ló'wa da'ayuút as paángadá' malaykamoó AAKOÓ MUNGÚ i kon.