1 QOM'I 20 - Biblía Axweesantá Hhohho' ar Mungú 2004

Daudi gixsár Raba ngiwa hayóh

¹ Qoomár kurkú /abén bir iimu/uu/ún, waawitá in slaqwarár aa'áy. Qoomaarihe Yoabu múk slaqwara guna geerahaár as yaamaá múk Amoni ngiwa hayohiya', nee gixsár Raba gari harweér. Ala waawutmo Daudi ina meét baraá Yerusalemu. Yoabu gixsár Raba gari i haratláy gari hhitín.

² Daudi slamaangwduú Munguúín kudá' ta bay Milkomu guna ar tláy, gway gawaá sagós i dahaás. Slamaangwí iiloeemawo a kílo mibeeri tám nee kooán ar sahaábu. Baraá guruudae tlaa/anoó tlaxo gawíd i deer. Daudi tlaa/anoowí guri slamaangós ar parootuús. Inós baraá gixsarihe muruú yaariír guri haasaáng wa ar tláy.

³ Inós múk gixsarí guna ar tláy amór do'ós i alé, nay do'ós wa gadiyusiyé' ar musumeéno, nee kureemaá muqsla nee tsabu. Inós gixsadaá Amoni sleémeero gina adoorí laáq. Alhhe'eesaywo Daudi nee muu sleémeero tay kií/ Yerusalemu.

Slaqwarár nee múk tledaadét oo dirén oo múk Filisti

⁴ Aluuwo slaqwarár hatlá' niri malé ti'ít tla/ángw múk Israeli nee oo Filistiro baraá yaamaá Geseri. Baraá slaqwararihe Sibekai kuduú xoorór Hushati Sipai guna gaás, inósuuwí a heé wák dír mukdá' tledaadét oo dirén oo múk Filisti iri ya/a/án.

⁵ Aluudae slaqwarár nee múk Filisti niri malé ti'ít, Elhanani garmoó Yairi, Lahmi guna gaás. Kwí an hhiyoó Goliati kuduú Giti, kudá' harmahoó lawaalarós yangareemaawo a adór xa'anoó ta inqwarúr tlehhahhiti.

⁶ Slaqwararkar hatlá' ina malé ti'ít dír yaamaá Gatiro. Didae heeko wák i deer oo yangariír oo ditsa' lahhoó' umuúqo dako nee umuúqo yaaeero. Inós ditsaawós a mibeeri tsár nee tsiyáhh. Inós sleeme oo xwaylár mukdá' tledaadét dirén.

⁷ Qoomár inós múk Israeli nguwa /oosliislín, kuri gaás nee Yonatan garmoó Shimea hhiyoó Daudi.

⁸ Mukwí Daudi nee sagadiyuuseerós taa tsuú/ a xwaylár mukdá' tleedaadét dirén oo yaamaá Gati.