1 QOM'I 19 - Biblía Axweesantá Hhohho' ar Mungú 2004

Múk Amoni nee oo Aramu kuwa baál nee Daudi

¹ Alaá waawutmo Nahashi oo Amoni iwa gwaá' garmaawós kudá' ta bay Hanuni kway waawutmoó wa qaás.

² Waawutmo Daudi iri oó', «Aníng Hanuni u gár hhoóí tleéhh sleeme, asma baabuúwós aníng iga hhooeemií tleéhh.» Daudi muu guri ya/aáw as taaqwayduú qaytsu kuwa ay, as baabuúwós iwa gwaá'. Mukdaádá' ina hardáh yaamaá Amoni as Hanuni kuwa gurkwa/asi.

³ Geeraharuusér múk Amoni iri ó' dír waawutmo Hanuni i alé, «Kuúng ka ga/eer Daudi mukwí gár ngusa ya/aáw, a asma kuúng tuwa gurkwa/ási as adoodá' iwa baabuúwók ilaiwawa/i? Inós sagadiyuuseerós ngina ya/aawikáhe as yaamuurén ngiwa tsawtsawusiya' nee ngiwa qwaareesiya'?»

⁴ Naagáy Hanuni mukdá' Daudi aa ya/aáw guna ohín, gway daamoó deequút, tlabaaín giri dír afeetleérí tlaáq, gwe'eede gay tsee/áy máy, giri geemáy.

⁵ Inooín niri tlayé' as niwa watliya'. Daudi kángw ya/abuuseerós kay tleéhh ngiwa axaás, muu guna amor'ín i ya/aáw, asma inooín niwa ló'wa muruutiyé', giri báy, «Hooté' Yerikór wa alé, mindi ala áykwí ki/aara' ay dír daamorhúng nay malé ti'it, daqaní ni ki/á'.»

⁶ Waawutmo Hanuni nee múk Amoni ngiwa tsaahhiyé' adór Daudi ngura buuhhtisiyé', inooín peésár kílór kumér mibeeri tám nee tsiyáhh ngina múk ar ya/aawiyé', as gaardaá slaqwara nee faras gwa i tsa/an kuwa bui oo baraá yaamaá Mesopotamia nee yaamaá Arama'aka nee Soba.

⁷ Inooín gaardaá kume mibeeri tám nee tsár awa slaqwara ngina leehhiyé', waawutmoó Ma'aka nee slaqwaruuseerose xafay ngway tleehhiyé' iisapoó Medeba. Múk Amoni tiri burumbúr baraá gixsaduine, tay amohhe'eesiyé' slaqwaraaro.

⁸ Daudi kaangwí nguwa axaás, Yoabu guri ya/aáw nee slaqwaruuse sléemeero tidár miguuse.

⁹ Múk Amoni tiri amohhe'eés slaqwaraaro dír afkú dahamaá gixsa, waawitaádá' naa hardah as alee/isaay tana sihhiít dír yaamaá tlapa.

¹⁰ Yoabu ngiwa ár adór slaqwara ngura /amaatsék geera nee aluuwo, inós múk Israeli oo slaqwara ga xuú' gway tsawaár, guri baraá hhaií qaás, tiwa haraganaiya' nee múk Aramu.

¹¹ Slaqwaruuseedár hatlá' aa meet gari amohhe'eés kawa geerahari nee hhiyaawós Abishai, inós giri amohhe'eés tiwa haraganaiya' nee múk Amoni.

¹² Yoabu Abishai guri báy, «Gám bara aán múk Aramu i baliit, gám hardaháng alee/iisáng, nee múk Amoni kuúng bur ar ba/abaa/, aníng ni hardáh kuúng uwa alee/iis.

¹³ Gimáy, pihháng! Tawa migisan baraá slaqwaraaro as mukrén nee gixsadaá Munguúrén. Nee AAKOÓ MUNGÚ tidá' aa ár dirose qoom ngi tleehhi.»

¹⁴ Yoabu nee mukós tari kumamiít slaqwaraaro, múk Aramu iri geeraaín wa goów.

¹⁵ Múk Amoni ngiwa ár adór múk Aramu ira goów, inooín sleeme tari goów geeraá Abishai hhiyoó Yoabuú wa alé, tay dáh baraá gixsa, Yoabu iri kií/ Yerusalemu.

¹⁶ Ala múk Aramu ngiwa tsaáhh adór kura baál nee múk Israeli, inooín afo kari ya/aáw amór slaqwaruuse tidár Aramu bihhaá da/aáw yaaér Eufratero, Shofaki ngina geerahaár, kuduú geeraharusmoó slaqwaruusér waawutmo Hadadeseri.

¹⁷ Daudi kangwdá' nguwa axaás, inós slaqwaruusér Israeli gari dinkwárí burumbuúr sleémeero, yaaér Yordani kay waaraáhh, slaqwaruuseerós gari tseeweés, múk Aramu nee inooín tari slaáqw.

¹⁸ Ala múk Aramu iri goow geeraá múk Israeli wa ale, Daudi múk gaardaá slaqwarár madiít kuduú Aramu oo kume faanqw guna tsuú/, nee slaqwaruusér ya'ár hi'iimiit ar kume mibeeri tsiyáhh gana tsuú/. Shofaki geeraharusmoó slaqwaruusér Aramu kuna gaás sleeme.

¹⁹ Sagadiyuusér Hadadeseri ngiwa aán adór múk Israeli kura harslaaqaát baaliro, inooín nay wayduú ayé' dír Daudi, Daudi giri lawaaleerós wa óh. Ala múk Aramu alee/iisár múk Amoniwo taa baloó ki/iiká.