1 QOM'I 18 - Biblía Axweesantá Hhohho' ar Mungú 2004

Daudi iwa baalín baraá slaqwaraaro

¹ Alaá deelodae waawutmo Daudi múk Filisti guna i haratláy guri baál nay ya/a/ané'. Inós gixsár Gati nee ayeemaá iisaapaydae giri dír Filistír wa hayóh.

² Daudi sleeme múk Moabu guna baál slaqwaraaro, tay lawaaleerós tleehhiít kway ohmér i huwahuúw.

³ Sleeme Daudi iri haratláy amór Hadadeseri, waawutmoó Soba, yaamaá iisaapoó Hamati, qoomár Hadadeseri iwa yaamaá yaaér Eufratér hayoohár wa slai.

⁴ Daudi gaardaá kumuú wák giri hayóh, nee mukduú farsuú i tsa/aa/aám a kume faanqw, nee slaqwaruusér kume mibeeri tsár tidá' ya'ár hi'iimiit. Nee farsuú gaardaá uuruxuúm guna kane tlaáq, ala farsuú tsiiru kilós guri meetiís.

⁵ Qoomár múk Aramu oo Damasko ngiwa axaás adór Daudi nee waawutmo Hadadeseri oo Soba tara slaáqw, inooín Hadadeseri nguna alee/iisár ayé'. Daudi múk Aramu oo kume mibeeri tsár nee tsár guri tsuú/.

⁶ Naagáy Daudi xafoó slaqwaruuseerós guna tleéhh yaamaá Aramu awa Damasko. Múk Aramu tay lawaaleerós tleehhiít, ngway ohmér i huwahuwiyé'. AAKOÓ MUNGÚ Daudi guna baalír i haniís umuú dír aa kayi.

⁷ Nee Daudi gaambaá sahaábu awa slaqwaruuseedár Hadadeseri gari hayóh, giri huúw ay Yerusalemu.

⁸ Daudi sleeme muqslár yaariir ar sirda/aten tidár baraá gixsadaá Tibhati nee Kuni kudá' Hadadeseri gina ar tláy. Aluuwo waawutmo Solomon muqslaarí sirda/aten gari tlahhsár ma'ár tleéhh, nee uheemi, nee xooslár muqslár sirda/aten.

⁹ Waawutmo Tou oo Hamati ngiwa axaás adór Daudi slaqwaruusér waawutmo Hadadeseri oo Soba, ngira baál,

¹⁰ waawutmo Tou garmaawós kudá' ta bay Hadoramu guna ya/aáw amór Daudi as nguwa laaw'eesi, nee nguwa waarahaasi, nee nguwa bay, «Xáy gan, kuúng na'ás as tawa slaqwé' nee Hadadeseri, kuri bál.» Asma Tou aáng nee Hadadeseri ta gilaalín. Hadoramu xooslár taa sahaábúr tleéhh nee ar peésa nee ar muqslár sirda/aten gana haniís.

¹¹ Qeemuwí waawutmo Daudi guri paraátl as Mungú, dinkwa nee sahaábu nee peesaaro, tidá' aa hayóh baraá xoorduudá' slaqwaraaro aa baál, awa Edomu, nee Moabu, nee Amoni, nee Filisti nee Amaleki.

¹² Naagáy Abishai garmoó Seruya múk Edomu oo kume mibaá nee dakaát guna tsuú/ dír Xatstá Diwtá wá alé.

¹³ Inós xafoó slaqwaruuse gway tleéhh baraá yaamaá Edomu, múk Edomu sleémero tari lawaalér waawutmo Daudi tleehhiít. Nee AAKOÓ MUNGÚ Daudi guri baalír i haniís umuú dír aa kayi.

¹⁴ Daudi múk Israeli sleémeero guri sa waawuti'ín, nee mukós sleeme gwaa barqantusiiká.

¹⁵ Yoabu garmoó Seruya an geeraharusmoó úr oo slaqwaruuse, nee Yehoshafati garmoó Ahiludi an goousmoó úr oo muruú iinslaslángw wa hariím.

¹⁶ Sadoki garmoó Ahitubu, nee Ahimeleki garmoó Abiatari a kaahamuusér Mungú, nee Shausha a goousmo.

¹⁷ Benaya garmoó Yehoyada a heé úr oo múk Kereti nee múk Peletiro, nee daaqoó Daudi a múk ló'wa urén oo xuumuusér waawutmo.