1 QOM'I 17 - Biblía Axweesantá Hhohho' ar Mungú 2004

Natani kuwa ya/aáw amór Daudi

¹ Qoomár Daudi iwa baraá doó waawuti'iimár wa hooti, Daudi aarusmo Natani guna báy, «Ga/aaweek, aníng a hoót baraá doó taa tleéhh ar sahhta, ala sandakmoó alqadór AAKOÓ MUNGÚ i baraá guruú heéma.»

² Aarusmo Natani Daudi guri báy, «Adór kuúng ta sla' tleehheek, asma Mungú i dinkwa nee kuúng.»

³ Ala xweeradá kilae aarusmo Natani axweesantá AAKOÓ MUNGÚ gana axaás i kat,

⁴ «Tláw, sagadiyusmooeé' Daudi adoorí baweek: AAKOÓ MUNGÚ ina oó', ‹Kuúng doó hotaaeé' ngu tlehhká.

⁵ Asma iimír aníng xoorór Israeli ngiwa duúx baraá yaamaá Misrír wa ale ay laarí, aníng aga baloó hootiiká baraá dó' wa alé. Aníng ana baraá heémár wa hoót, nee tina ar lolohín umuú dír tawa hooti.

⁶ Qooma sleémeero niwa hi'iimiít nee múk Israeli, xáy, har'ohuuser'ín tidá' muk'eé' de'eem oo naa yaahaás i deéro niwa kah: Ahaá waáy, mis doó sahhtaárí tlehhká?›

⁷ «Gimáy daxta sagadiyusmooeé' Daudi ku beer, ‹Anuú AAKOÓ MUNGÚ oo Aleesleemusmo a kah: Aníng kuúng una leéhh baraá de'éngw bee/aangw, nee uri heé úr wa qaás dír xooror'eé' ar Israeliro.

⁸ Umuú amór taa qo keeri aníng aqo dinkwa nee kuúng, nee wakuuseerók ana dír geeraawók wa hhaamiís. Aníng kuúng u iia tleereés adór múk hatlá' oo urén baraá daanduú yaamuwo.

⁹ Slám muk'eé' oo Israeli un dír amohhoó' i sláw, ngiri baraadií qaás, ki baloó baramaanuusiiká nee wakuuser'ín adoodár aáng wa ale.

¹⁰ Iimidá' aníng har'ohuuse ngiwa tsawaár as muk'eé' oo Israeli nguwa geerahat, aníng wakuuserhúng sleémeero an baál. Slám malé ale anuú AAKOÓ MUNGÚ kuúng un babaw, un dó' i tleéhh.

¹¹ Tam qoomár kuúng bara ureér tari gwá' adór baabi'iiwók wa alé, aníng garmaawók u waawutmoó wa qaás, nee aníng waawuti'iimarók a gawdeés.

¹² Inós dooeé' gun tleehh, aníng kitaangós oo waawuti'iima un gawdeés ay alhhe'eesay wasle.

¹³ Aníng tari baabuúwós, nee inós tari garmaaeé', aníng sla'aarir'eé' tidá' warqawaaká a hingeesaaká dirose, adoodá' ngira hingeés dír Saulowo, kudá' geeraawók gaa haar.

¹⁴ Ala aníng un gawdeés baraá dooeé' nee baraá waawuti'iimar'eé', nee kitaangós kuduú aleesleemu u gawdeés ay kureeri sleém.› »

¹⁵ Natani kangwdá' sleémeero guna oó' dír Daudi ar adoodá' iigu'utuudá' aa ár.

Firór Daudi nee ilahhooa

¹⁶ Naagáy waawutmo Daudi iri dáh baraá heémár AAKOÓ MUNGÚ, iri iwiít dír geeraá AAKOÓ MUNGÚ iri firín, iwa kaahi, «Aá AAKOÓ MUNGÚ, Mungú, aníng a heemá, nee dooeé' a gár milá, tam aníng iri adoorír xirfayés?

¹⁷ Aá Mungú, barnaxes tí ka niina dír ilaawoge, kuúng muruú urén oo aluú wa hi'iít daanduú dooeene ugwa alki/ít, nee daanduú xwaylar'eé' ar aluú wa hi'iita.

¹⁸ Aá AAKOÓ MUNGÚ, Mungú, gár anuú Daudi hamí ni dook a milá, as sagadiyusmoowók kuwa adoorír xirfayés, kuúng anuú sagadiyusmoowók i xú'.

¹⁹ Aá AAKOÓ MUNGÚ, as daanduú sagadiyusmoowók, nee ar adoodá' muunaáwók i dirii'i, tí sleémeero ana tléhh as tlehhmi'iiká' uren kiwa laqaan.

²⁰ Aá AAKOÓ MUNGÚ, oo hatlá' oo adór kuúng i kaahh, Munguú hatlá' i kaahh, aqo har kuúng, ar adoodá' atén iaarene kara axaasani.

²¹ Xoorór adór mukók oo Israeli baraá yaamuwo a gaalá, ar Mungú aa ba/amisár áy as tawa mukós? Kuúng umuuwók una iia tleerés, muruú urén nee oo dae tlaáq kuwa tléhh, qoomár xoordu kiwa geeraá mukók wa tlatlahhás, kudá' taa ba/amís baraá yaamaá Misrír wa ale.

²² Kuúng múk Israeli ugwa mukók tléhh ay alhhe'eesay wasle. Kuúng AAKOÓ MUNGÚ aga Munguúín tleehhít.

²³ «Hám daxta, kuúng AAKOÓ MUNGÚ, axweesantók tidá' taa ó' dír anuú sagadiyusmoowók nee dooeene gawdeseek ay alhhe'eesay wasle, nee boo/eeseek ar adoodá' kara al'axwés.

²⁴ Umuuwók i kumamiti kuwa xirfayeemisi ay alhhe'eesay wasle, tawa kaahi, ‹AAKOÓ MUNGÚ Aleesleemusmo, Munguú Israeli, Inós an Munguú Israeli.› Nee múk doó sagadiyusmoowók Daudi ta kumamiti dír geeraawoge.

²⁵ Asma kuúng Munguúeé' tina geehhooés dír anuú sagadiyusmoowók tawa ó', ‹Án kuúng u dó' i tleéhh.› Gawaá adoorihe anuú sagadiyusmoowók aga piíhh niwa geeraawók wa fiririim.

²⁶ Hám daxta, aá AAKOÓ MUNGÚ, kuúng an Mungú, kuúng muruuwí hhó' ugwa al'axwés dir'eé', anuú sagadiyusmoowók.

²⁷ Gawaá adoorihe, adoorí kuúng u sla'atis doó sagadiyusmoowók kuwa tsuq, as iwa dír geeraawók wa kumamiti ay kureerisleém. Aá AAKOÓ MUNGÚ, asma gár kuúng taa tsúq kaa tsuúq ay alhhe'eesay wasle.»