1 QOM'I 16 - Biblía Axweesantá Hhohho' ar Mungú 2004

¹ Inooín sandakmoó alqado oo Mungú nguna dahaasiyé', ngway qaasiyé' baraá heémadá' Daudi aa amohhe'eés as inós. Inooín ilahhooár da/a nee ar wayduuwo kay haniís dír geeraá Mungú.

² Alaá Daudi ilahhooár da/a nee ar wayduuwo ngiwa hhe'eés hanisaro, muu guri tsuúq ar umuú AAKOÓ MUNGÚ.

³ Múk Israeli sleémeero guri muruú /aymár i qasimiís, hhawaate nee /ameenaaro, umuú heewo guna qáy ar mukaatmo nee fu'uniro nee mukaatmoó taa tleéhh ar sabiíbuú kaaharén.

⁴ Daudi múk tlahhoó Laáwi guna ádbáy niwa gadiyuusiya' geeraá sandakmoó AAKOÓ MUNGÚ wa ale, nee as kuwa firiirin nee kuwa sluufmiisi, nee kuwa xirfayemisi AAKOÓ MUNGÚ, Munguú Israeli.

⁵ Asafu kuna geeraharusmooín wa tsawaár, nee Sekaria tay ale/isusmoowós, múk mariímba nee gidaandooriro gi slahhaám a kwí: Yeieli, nee Shemiramoti, nee Yeieli nee Matitiya, nee Eliabu, nee Benaya, nee Obed-edomu nee Yehieli. Asafu an heé mitingiraay gwaa slahhan.

⁶ Kaahamuusér Mungú Benaya nee Yahasieli tarumbeéta ngina ufahhané' geeraá sandakmoó alqadór Mungú wa ale.

⁷ Baalaarí a deelór hargeera ar Daudi Asafu nee hhaeewós ngiwa tsawaár as AAKOÓ MUNGÚ nguwa xirfayeemisiya' ar daa'aangw.

Daa'ángw xirif

⁸ AAKOÓ MUNGÚ sluufmisaak, umuuwós ateetaak, tlehhmi'iiwós xu'utisaak dír muko.

⁹ Inós i daa'aak, xirif ti dae', tlehhmi'iiwós kudaá waa/oo/amo alki/iitaak.

¹⁰ Umuuwós kudá' hhoohhoó' ku xiríf, mukdá' AAKOÓ MUNGÚ gu leelehhiít i qwalaa/i.

¹¹ AAKOÓ MUNGÚ nee /uuruwose leelehhaak, umuú daqto inós na lelehhitaak.

¹² Tlehhmii'iiwós kudaá waa/oo/amo aa tlehhiít inslawaak, nee muruú xuaawaslene, nee kwasleemarós tidá' aa kaahi,

¹³ kuungaá xwaylár sagadiyusmoowós Abrahamu, na/aá Yakobo, kudá' aa tsawaár.

¹⁴ Inós an AAKOÓ MUNGÚ, Munguúrén, baraá yaamu sleémeero kwasleemarós i deer.

¹⁵ Alqadoorós inslawaak daqisleém, axweesantós tidá' aa oó' as qari sleémeero.

¹⁶ Alqadoodá' aa oó' dír Abrahamu, nee al'axweesantós tidá' aa lo'ór wa /aáy dír Isaka,

¹⁷ tidá' aa gawdeés dír Yakobo tawa adór kaahi, nee dír Israeli tawa adór alqadór alhhe'eesay wasl,

¹⁸ iwa oó', «Yaamaá Kana'ani ngi haniís tawa aalirhúng.»

¹⁹ Qoomár inooín kiwa ureeká nee faaror'ín kawa kilaeeká, slám tawa dahaaye baraá yaamaá Kana'aniro,

²⁰ inooín tonganuuwo tana baraá xooroorí wa tláy ay tiqá', nee tan baraá waawuti'iimarí wa tláy ay amór múk hatlá',

²¹ Mungú tam heé wák gwaa geemayká inooín ngiwa baramaanuusi. Waawitá guna ii gahhaát as inooín,

²² iwa kaahi, «Muk'eé' oo naa tsawaár mu kwatitara', aaruuser'eé' ma slahh'eemisaara'.»

²³ Kuungá' sleémeero awa daanduú yaamu, AAKOÓ MUNGÚ sa daa'aak. Ba/amarós alki/itaak umuú baalaaro.

²⁴ Xirfuuwós alki/itaak dír xoorduwo, nee tlehh'mi'iiwós kudaá waa/oo/amo dír muu sleémeero.

²⁵ Asma AAKOÓ MUNGÚ ku úr nee aa ló'wa xirfuút, inós i harín ilaiwa/ameero ta munguaá hatlae.

²⁶ Asma munguaá xoordaá hatlá' a slaqsa'aá tawo, ala AAKOÓ MUNGÚ doori gina tleéhh.

²⁷ Ilaiwa/ame nee xirif ngwa harweeriyé', /uuru nee qwala/ do'ós ngway hatsisiyé'.

²⁸ Kuungaá muu sleémeero oo baraá yaamu, AAKOÓ MUNGÚ ilaiwawa/aak, xirfuuwós nee aleesleemuuwós xirfayeesaak.

²⁹ Umuudá' xiríf oo AAKOÓ MUNGÚ xirfayeemisaak, ilahhooa huwaak, dahé' baraá do'ós, AAKOÓ MUNGÚ sluufmisaak dirós tidá' hhoohhoó' wa ale.

³⁰ Yaamu sleémeero i daaraxiye' dír geeraawose, yaamu gaa gawdeés, i baloó dingitiaaká.

³¹ Kuungaá doóri, qwalaa/é', kuungaá yaámu qwalaa/é', xoordu sleémeero bawaak, «AAKOÓ MUNGÚ a waawutmo.»

³² Tlawi i xuuru'ut nee muruudá' sleeme gaa hatsisi. Qamu i qwalaala/iye' nee umuú gár baraadií diriia.

³³ Xaa'aá baraá gara sleémeero i daaiye' ar qwala/, geeraá AAKOÓ MUNGÚ wa ale. Asma inós nin hardah as yaamu ngiwa sakwasleemuuti.

³⁴ AAKOÓ MUNGÚ sluufmisaak asma inós ku hhoó', sla'aarirós ar warqawaaká in kumaamít ay alhhe'eesay wasle.

³⁵ Inós sleeme ku beera', «Aá Mungú, ba/amusmoorén, atén ti buruumbut, ti tu/ baraá xoorduuwo, as kahhó' atén umuuwók kudá' hhoohhoó' nguwa xirfayeemisaan, asma xirfurén a kuúng un xirfayeemisaán.»

³⁶ AAKOÓ MUNGÚ, Munguú Israeli, didi'iimisaak, iimír iimu/uungw wasle ay alhhe'eesay wasle. Aluuwo muu sleémeero iri oó', «Amin», Aakoó Mungú kuri xirfayeemiís.

Sluufmiisuú baraá Yerusalemu nee Gibeoni

³⁷ Waawutmo Daudi Asafu nee hhaeewós giri dír geeraá sandakmoó alqadór AAKOÓ MUNGÚ i máy, niwa didá' wa gadiyuusiya' as umuú baalaaro gadiyér hariim ngiwa tleehhiya'.

³⁸ Sleeme Obed-edomu garmoó Yedutuni dinkwa nee hhaeewós awa mibeeri lahhoó' nee dakaát mukdá' nguna ale/iimisiyé'. Qoomaarihe sleeme Obed-edomu garmoó Yedutuni nee Hosa a hara xuumuusér afkú do'.

³⁹ Waawutmo Daudi kaahamusmo Sadoki nee hhaeewós kudaá kaahamuuse gina máy tawa gadiyuusi geeraá heémár AAKOÓ MUNGÚ wa ale, tidár didá' gáwtí dirii' baraá Gibeoniro, didár ilahhooa,

⁴⁰ as umuú matlaatle nee tsiindoowo ilahhooár da/a/aangw ngiwa hanmisiya' dír AAKOÓ MUNGÚ gawaá kitángw ilahhooár da/a/aangw, ar adoodá' kara gooín baraá hara'ayár AAKOÓ MUNGUHE, tidá' aa oó' dír múk Israeli.

⁴¹ Inooín a dinkwa nee Hemani nee Yedutuni nee mukduú hatlá' taa tsawaár, kudá' umer'ín taa oó' as AAKOÓ MUNGÚ nguwa sluufmisiya' as sla'aarirós tidá' warqawaaká ay kureeri sleém.

⁴² Hemani nee Yedutuni i tarumbeétadaá koná' nee mitingiraywo, as kiwa slahhan, nee xooslaá daa'ango as daa'ángw hhohhó' kuwa daai. Daaqoó Yedutuni kuna xuumuusér afér gixsár wa qaás.

⁴³ Aluuwo umuú heewo ina waátl amór do'ós i alé, Daudi sleeme iri waátl amór do'ós as múk do'ós nguwa tsuuqi.