1 QOM'I 15 - Biblía Axweesantá Hhohho' ar Mungú 2004

Amohhe'eemisuú sandakmoó alqado kuwa loohatisi

¹ Daudi maraywós gina tleéhh baraá gixsár Daudi nee dír Sandakmoó Alqadór Mungú gari amohhe'eés, guri heémárí tleéhh.

² Naagáy Daudi iri oó', «Heé hatlá' i kaahh oo sandakmoó Mungú gu gagaár aqo har múk tlahhoó Laáwi, asma inooín AAKOÓ MUNGÚ gina tsawaár as sandakmoó AAKOÓ MUNGÚ loohiso, nee inós nguwa sagadiyuusiya' daqisleém.»

³ Daudi múk Israeli sleémeero guna burumbuúr Yerusalemu, as sandakmoó AAKOÓ MUNGÚ kuwa huwi didá' inós aa amohhe'eés sandakmoó wa ale.

⁴ Aluuwo Daudi xwaylár Aroni nee múk tlahhoó Laáwiwo gina dinkwárí burumbuúr:

⁵ Doó Kohatiwo heé taa tsawaár a Urieli kudá' taa uráy haniís dinkwa nee hhaeewós awa tsiiru nee mibeeri tsár.

⁶ Dír doó Merariwo heé taa tsawaár a Asaya kudá' taa uráy haniís dinkwa nee hhaeewós awa tsiire tsár nee mibeeri tsár.

⁷ Dír doó Gershomuwo heé taa tsawaár a Yoeli kudá' taa uráy haniís, dinkwa nee hhaeewós awa tsiiru nee mibeeri tám.

⁸ Dír doó Elisafaniwo heé taa tsawaár a Shemaya kudá' taa uráy haniís, dinkwa nee hhaeewós awa tsiire tsár.

⁹ Dír doó Hebroniwo heé taa tsawaár a Elieli kudá' taa uráy haniís, dinkwa nee hhaeewós awa mibeeri dakaát.

¹⁰ Dír doó Usieliwo heé taa tsawaár a Aminadabu kudá' taa uráy haniís, dinkwa nee hhaeewós awa tsiiru nee mibaá nee tsár.

¹¹ Slám Daudi Sadoki nee Abiatari gina ateét dinkwa nee múk tlahhoó Laáwi, ín Urieli, nee Asaya, nee Yoeli, nee Shemaya, nee Elieli nee Aminadabu.

¹² Daudi inooín giri báy, «Kuungá' a múk urén dír afér maraá hhay Laáwiwo, ti hheehhe'ese' kuungá' nee hhaeehunge, as kahhó' sandakmoó alqadór AAKOÓ MUNGÚ, Munguú Israeli, nguwa huba' amór kitangwdá' aníng naa amohhe'eés inós wa alé.

¹³ Asma kuungá' qoomaadár geeraawo ugwa gagadi'iiká, AAKOÓ MUNGÚ, Munguúrén, atén tina muúx, asma ugwa amohhe'eesaniiká ar adoodá' inós taa báy.»

¹⁴ Naagáy kaahamuusér Mungú nee múk tlahhoó Laáwiwo tiri hheehhe'esiyé' as sandakmoó alqadór AAKOÓ MUNGÚ, Munguú Israeli, nguwa huwiya'.

¹⁵ Múk tlahhoó Laáwi sandakmoó Mungú ngway gawaá /aampaárí qaasiyé' ngway sum'ír gagaariyé', ar adoodá' Mose ngira oó', adór axweesantá AAKOÓ MUNGÚ ngir kat.

¹⁶ Naagáy Daudi geeraharuusér múk tlahhoó Laáwi gari báy, «Baraá hhaeehunge muu tsawaraak oo xooslaá daa'aangw gi slaáhh: Mariímba nee gidaandori, nee mitingiraay, kwaraa/ír bara/ ka tlahhasi ar qwala/.»

¹⁷ Aluuwo muu kuri tsawaár baraá tlahhoó daauusér wa ale: Hemani garmoó Yoeli, nee hhiyaawós Asafu garmoó Berekia, nee baraá hhaeeine heé taa tsawaár a Etani garmoó Kushaya oo hhay Merari.

¹⁸ Múk tlahhoó Laáwi oo taa tsawaár ale/isay'ín wa ale a kwí: Sekaria, nee Ya'asieli, nee Shemiramoti, nee Yehieli, nee Uni, nee Eliabu, nee Benaya, nee Ma'aseya, nee Matitia, nee Elifelehu, nee Mikneya. Xuumuusér afkú do' a Obed-Edomu nee Yeieli.

¹⁹ Daauusér mitingiroó muqslár sirdaa/aten gu tsingili'imiis a tí: Hemani nee Asafu nee Etani.

²⁰ Awa mariímba ngi slahhaamá' ar afór ta bay Alamoti a kuká': Sekaria, nee Asieli, nee Shemiramoti, nee Yehieli, nee Uni, nee Eliabu, nee Ma'aseya nee Benaya.

²¹ Awa gidaandori ngaa slahhiye' ar afór baraay a kuká': Matitiya, nee Elifelehu, nee Mikneya, nee Obed-edomu, nee Yeieli nee Asasia.

²² Kenania kuna geeraharusmoó wa qaás oo múk tlahhoó Laáwi gu gan'aamiís baraá xooslaá daa'ango, asma muruuwí gu ado xuu'.

²³ Berekia nee Elkana kina xuumuusér wa qaás ar sandakmoduú alqado.

²⁴ Kaahamuusér Mungú ar tarumbeétár ufahhaam geeraá sandakmoó Mungú wa alé a tí: Shebania, nee Yoshafati, nee Netaneli, nee Amasai, nee Sekaria nee Benaya nee Elieseri. Obed-edomu nee Yehia kina xuumuusér sandakmoó Mungú wa qaás.

Sandakmoó alqado kuwa huwi Yerusalemu

²⁵ Naagáy Daudi nee bariisér múk Israeli nee geeraharuusér slaqwaruusér kume tay tláy as sandakmoó alqado oo AAKOÓ MUNGÚ kuwa leehhi doó Obed-edomu ar bar/uú yaariír.

²⁶ Asma Mungú múk tlahhoó Laáwi nguwa alee/iisi kudá' sandakmoó alqado oo AAKOÓ MUNGÚ ngu loohisá', ilahhooár muruú ta tsu/i ngay hanisiyé' dír AAKOÓ MUNGÚ ar awe faanqw nee gwaandaawe faanqw.

²⁷ Daudi hiyoó taa tleéhh ar kitaáni guna dahaás, nee múk tlahhoó Laáwiwo kudá' sandakmoó alqadór loohiís nee daauuseero nee Kenania, geeraharusmoó daauuse. Daudi sleeme naifeéra gana dahaás ar taa tleéhh ar kitaáni.

²⁸ Aluuwo múk Israeli sleémeero sandakmoó alqadór AAKOÓ MUNGÚ kunguna huúw baraá Yerusalemu ar kwaraa/ír ur, xareemi nee tarumbeétaro kiri ufaáhh, nee mitingiraay kuna tsingili'imiís, nee afo kari tleesa hhe'eés ar mariímba nee gidaandooraay.

²⁹ Qoomár sandakmoó alqado oo AAKOÓ MUNGÚ kunguwa dahaás baraá gixsár Daudi, Mikali dasír Saulo ina qaytsít pa/ángw ar alé, waawutmo Daudi guna aán i ni/ín ar qwala/, inós gway baraá muunaáwós i waaqá'.