1 QOM'I 14 - Biblía Axweesantá Hhohho' ar Mungú 2004

Gadiyér Daudi aa baraá Yerusalemúr wa tleéhh

¹ Waawutmo Hiramu oo Tiro afo gana ya/aáw amór Daudi alé dinkwa nee xaa'aá sahhta, nee múk maraay tlehhit nee múk peehháy dakut, as doó waawutmo kuwa tleehhi.

² Daudi gay tsaáhh adór AAKOÓ MUNGÚ waawuti'iimarós ngira gawdeés baraá yaamaá Israeliro, nee waawuti'iimarós kari iia tleereés as mukós kuduú Israeli.

³ Daudi baraá Yerusalemuro /ameenár yaariir gana duxuút, na/aá daaqaay nee awa dasuwo gay laqwaál.

⁴ Na/iiwós awa Yerusalemúr wa laqwaál a kuká': Shamua, nee Shobabu, nee Natani, nee Solomon,

⁵ nee Ibhari, nee Elishua, nee Elpeleti,

⁶ nee Noga, nee Nefegi, nee Yafia,

⁷ nee Elishama, nee Be'eliada nee Elifeleti.

Daudi múk Filisti nguwa baál

⁸ Múk Filisti kawa axaás adór Daudi kura iimbalaáx tawa waawutmoó Israeli sleémeero, slaqwaruuser'ín ngina ya/awiyé' as Daudi kuwa leeleehhi. Daudi adoodá' ngiwa axaás iri tláy as tawa slaqwi nee inooín.

⁹ Múk Filisti iri haratláy baraá xatstá Refaimu slaqwara kari iimu/ún.

¹⁰ Daudi Mungú guri yaahaás, «Aníng múk Filisti u i haratláwa? Kuúng ngi qása gawaá dabaaeé'?» AAKOÓ MUNGÚ iri oó', «Eeít, tláw, aníng ngi gawaá dabaawók i qaás.»

¹¹ Aluuwo Daudi iri tláy ay Ba'al-perasimu, inooín giri baál didá' wa ale. Iri oó', «Mungú naa barte'eé' áy, ina waaraáhh ar baraá tla/ángw wakuuser'eé' gari diyaá/ ar dakw'eé', adór gwaanduú ma'aay oo aa gaanslár waa/.» Gawaá adoorihe umuú didá' kway báy Ba'al-perasimu.

¹² Múk Filisti iri goów, inooín munguii'ín ngay geexayé', Daudi iri oó', «Da/aak ar asla.»

¹³ Múk Filisti iri haratláy ki/imaá tsare ay baraá xatsa.

¹⁴ Qoomár Daudi Mungú nguwa malé yaahaás, Mungú ina oó', «Ma aluuín wa tlawaar, ala tláw harweeriím, nee ta amor'ín i haratleér ar amór bihhaá xaa'aá ta bay miforosadi.

¹⁵ Qoomár slakwakwa'aay bura axás gawaá tsitsenaá xaa'aá miforosadi, daqaní slaqwara ka iimu/uún, asma aníng a geeraawók wa hi'iít as slaqwaruusér Filisti ngiwa yaamií daahh.»

¹⁶ Daudi adoodá' Mungú aa oó' gana tleéhh, slaqwaruusér Filisti gana tsitsiíhh iimír Gibeonír wa ale ay Geseri.

¹⁷ Daudi iri iia tleerúy ay baraá yaamu sleémeero. AAKOÓ MUNGÚ xoordu sleémeero gay daeérí tleés, inooín Daudi kuri da'ayumiiít.