1 QOM'I 13 - Biblía Axweesantá Hhohho' ar Mungú 2004

Sandakmoó alqado kuwa Kiriat-yearimu wa surkuús

¹ Daudi tari axweés nee geeraharuusér slaqwara tidár daqoroó kume, nee oo tsiire, nee umuúqo geeraharusmoowo.

² Aluuwo Daudi múk Israeli kudá' aa burumburiit guri báy, «Bar aga aandé' tí i qoón, nee slám bar tidá' AAKOÓ MUNGÚ, Munguúrén i slai, gimsé' afo a ilahaniisaán amór hhaeerén kudá' naa meetiye' baraá yaamu sleémeero awa Israeli dinkwa nee kaahamuusér Mungú, nee múk tlahhoó Laáwi, kudaá baraá gixsaduuín nee yaamaá qawtanaay, kiwa ateetaan tawa aldinku'uusaan nee atén.

³ Daqaní atén Sandakmoó alqadór Munguúrén kuri leehhaán, asma aáng Saulo tawa waawutmo sandakmoowí ugwa gaárí xuaniiká.»

⁴ Mukdá' aa burumburiit iri ya/án adoodá' kawa tleehhi, asma muu sleémeero adoodá' guna sla'atís.

⁵ Daudi múk Israeli guri burumbuúr iimír yaaér Shihorír wa tleemu, tidár yaamaá Misri, ay Lebo-hamati, as Sandakmoó alqadór Mungú kuwa leehhi Kiriat-yearimu.

⁶ Daudi nee múk Israeli sleémeero tari tláy ay Ba'ala, didár Kiriat-yearimu, tidá' baraá yaamaá Yuda, as Sandakmoó alqadór Mungú kuwa leehhi, kudá' taa ateét ar umuú AAKOÓ MUNGÚ, inósudá' aa iwiit gawaá kitángw aleesleemu dír gawa dír keruúbiro.

⁷ Sandakmooduú Mungú nguna duuxiyé' baraá doó Abinadabu wa ale ngway tsa/asiyé' gawaá gaárír /aben. Usa nee Ahio an múk gaáridá' qwatsiím.

⁸ Qoomaadae Daudi nee múk Israeli sleémeero ni/imaaro tana faakamiís dír Mungú, as Mungú nguwa xirfayeemisiya'. Muu ina daá', nee gidandooráy kway slaáhh nee mariímbaro, nee oowi kay slaáhh nee mitingiraay, nee tarumbeéta kay ufaáhh.

⁹ Afeenír doó Kidoni didá' balaangw kuwa muxaaxin kawa áy, Usa Sandakmoó alqado guna óh asma awe kawa dukuúts.

¹⁰ AAKOÓ MUNGÚ iri buúhh, hamtidár kilae Usa gway gaás as sandakmoodá' nguwa kwatiít. Inós ina gwaá' didár kilá' ar geeraá Mungú.

¹¹ Daudi iri qa/iít buhhtaawo, asma Usa kuwa gaás nee AAKOÓ MUNGÚ, didaádá' kay báy Peresi-usa tam ay laarí.

¹² Baalaadae Daudi Mungú guri ló'wa da'ayuút, iri oó', «Hamí aníng Sandakmoowí oo alqadór Mungú adór ngur ar waatl amór dooeé'?»

¹³ Gawaá adoorihe, Daudi sandakmoodá' gway huwiiká gixsár Daudi. Sandakmoodá' gway huúw dír doó heé ta bay Obed-edomu, oo tlahhoó Giti.

¹⁴ Sandakmoó Mungú iri hoót doó Obed-edomú wa ale slahheeri tám, AAKOÓ MUNGÚ doó Obed-edomu guri ló'wa tsuúq nee umuúqo gár i kona.