1 QOM'I 12 - Biblía Axweesantá Hhohho' ar Mungú 2004

Múk Benyamini kudá' Daudi gwa geerií eehar

¹ Kuká' an kudá' naa amór Daudi tlaye', baraá Siklagi qoomár Daudi iwa Saulo wa nahhmiiti, garmoó Kishi. Inooínaká' an miguuseedá' Daudi gwaa ale/is baraá slaqwaraaro.

² Kuká' awa tlahhoó Benyamini tlahhayduú Saulo. Inooín maheeri tlaqutuuwo ngi ló'wa baaliyá' nee tlaa/e tlaqutuuwo ar dákw doó /iyáy nee oo doó basayhe.

³ Geeraharusmooín oo úr a Ahieseri, nee aluuwo tay Yoashi, inooínaká' tsaraawo a daaqoó Shema'a kuduú gixsár Gibea, nee Yesieli nee Peleti daaqoó Asmaweti, nee Beraka nee Yehu kudaá Anatoti,

⁴ nee Ishmaya kuduú Gibeoni, inós a migusmoó wák sleeme baraá kudaá mibeeraá tame, nee an geeraharusmooín dinkwa nee Yeremia, nee Yahasieli, nee Yohanani nee Yosabadi kuduú Gedera,

⁵ nee Elusai, nee Yerimoti, nee Bealia, nee Shemaria, nee Shefatia kuduú guruú doó Harufi,

⁶ nee Elkana, nee Ishia, nee Asareli, nee Yoeseri nee Yashobeamu kudaá guruú doó Kora,

⁷ nee Yoela, nee Sebadia, daaqoó Yerohamu kuduú gixsár Gedori.

Múk tlahhoó Gadi oo Daudi gwaa eehaar

⁸ Askaárír tlahhoó Gadi ar miguuse ar slaqwara gaa intsahh, kudá' naa tlaye' amór Daudi baraá koo/idá' gawit baraá darma, inooín ki ilakaaharen lawlu duqumisuuwo nee baqamór gaambuwo, gitsee/er'ín i dae tláq adór direeri, hi'iinór gawaá tlom'iiwo ki inslahh adór saaraga.

⁹ Geeraharusmooín oo úr an Eseri, nee oo tsár a Obadia, nee oo tám an Eliabu,

¹⁰ nee oo tsiyáhh a Mishmana, nee oo kooán a Yeremia,

¹¹ nee oo lahhoó' a Atai, nee oo faanqw a Elieli,

¹² nee oo dakaát a Yohanani, nee oo gwaleél a Elisabadi,

¹³ nee oo mibaangw a Yeremia, nee oo mibaá nee wak a Makbanai.

¹⁴ Mukuú Gadi a geeraharuusér slaqwara, oo niiná daqtá slaqwaruusér tsiiru gan geerahaar, nee oo úr daqtá slaqwaruusér kumuú wák gan geerahaar.

¹⁵ Kuká' yaaér Yordani ngina waarahhiyé' qoomár slahhángw geera, qoomaadae yaaér Yordani ina háts ay gawaá gangeefaay. Inooín mukdá' baraá xatsaá hoót kuri diyaá/ bihhaá da/aáw nee awa /uwawo awa yaaér Yordani.

Múk tlahhoó Benyamini nee oo Yuda oo Daudi gwaa ehaar

¹⁶ Múk tlahhoó Benyamini bahh'ale nee oo Yudawo tana amór Daudi káy baraá koo/idá' gawit.

¹⁷ Daudi ngiwa ár gina al'áy, giri báy, «Kuungá' bar nina hardaté' as tawa mulqer'eé' nee iwa alee/isa', do' ló'wa awaare'. Ala kuungá' barnaxes aníng in geewaqatá' dír wakuuser'eene, tam aníng kuungá' na sadakuusiikahe, Munguú baabi'iirén i xumiis nee kuungá' nu iigahhaati.»

¹⁸ Naagáy Qeeruú Mungú Amasai gway hatsiís, kuduú geeraharusmoó úr oo kudaá mibeeraá tám, iri oó', «Aá, Daudi garmoó Yese, atén a kók, atén a bartók, aá garmoó Yese! Wayda, eeít wayda ta amoorók, nee wayda dír kudá' kuúng u alee/imiisá'. Asma Munguúwók an kudá' kuúng u ale/iimiís.» Aluuwo Daudi giri ilaaóh. Giri qaás geeraharuusér slaqwaruusér wa ale.

Múk tlahhoó Manase oo Daudi gwa eehaar

¹⁹ Askaárír hatlá' ar tlahhoó Manase tana haragwaá' amór Daudi qoomár Daudi nee múk Filisti tiwa alkona' as tawa slaqwi nee waawutmo Saulo. Ala Daudi múk Filisti gwaa alee/isiiká, asma geeraharuusér múk Filisti ta xurumiit, Daudi ngiwa geewaqaati dír Saulo, gawaá adoorihe Daudi kway alií ki/ís.

²⁰ Qoomár Daudi iwa Siklagírí kií/, múk tlahhoó Manase iri haragwaá' amór Daudi. Múk aa haragwaa' a kwí: Adna, nee Yosabadi, nee Yediaeli, nee Mikaeli, nee Yosabadi, nee Elihu, nee Siletai. Umuú heewo baraá kukae a geeraharusmoó slaqwaruusér múk kumuú wák baraá tlahhoó Manasewo.

²¹ Inooín Daudi nguna alee/iisiyé' as tawa slaqwi nee slaqwaruuse, asma inooín a múk miguuse nee geeraharuusér slaqwara.

²² Deeloodae umuúqo baalaaro múk /abén ina doogiigín baraá slaqwaruusér Daudiwo. Slaqwaruuse ina doogiín iri tláhh adór slaqwaruusér Mungú.

Faarór slaqwaruusér Daudi

²³ Qoomár Daudi iwa amór Hebroni i dirii'i, slaqwaruusér xooslaá koom nee ar slaqwarár xuu' ina hardáh dír Daudi ale, as nguwa alee/is as inós iwa waawuti'in kitángw Saulo wa ale, ar adoodá' AAKOÓ MUNGÚ ngira oó'. Faaror'ín a tí:

²⁴ Múk Yuda a kume lahhoó' nee tsiire dakaát oo lawlaá koóm nee gaambuwo.

²⁵ Múk tlahhoó Simeon a kume faanqw nee tsiiruú wák miguusér slaqwarár xuu'.

²⁶ Múk tlahhoó Laáwi a kume tsiyáhh nee tsiire lahhoó'.

²⁷ Yehoyada kuduú geeraharusmoó tlahhoó Aroni, múk nee inós dinkwa a kume tám nee tsiire faanqw.

²⁸ Sadoki masoomoó migusmo baraá slaqwararo, inós a dinkwa nee geeraharusér slaqwara ar mibeeraá tsár nee tsár baraá guruú doó baabuúine.

²⁹ Múk Benyamini hha'aá Saulo a kume tám, ala múk yaariír oo Benyamini ku inkihhím dír múk doó Saulowo.

³⁰ Múk Efraimu a kume mibeeri tsár nee tsiire dakaát, a miguuse nee a múk iiatleét baraá tlahhay'ine.

³¹ Múk tlaqtá tlahhoó Manase a kume mibaá nee dakaát, múk taa tsawaár oo Daudi gu qaás baraá waawuti'iimárí ale.

³² Múk Isakari geeraharuuse a tsiire tsár, nee hhaeeín sleémeero awa ta ya/abiiti. Geeraharuuseerí xu'utír qom'i ga koón nee ka xuu' gár múk Israeli kus hariím tleehhamooro.

³³ Múk Sebuluni a kume mibeeri kooán, mukwí an múk slaqwara ga baál, múk aa intsahhan slaqwaraaro. Xosluuín sleémeero awa slaqwara ngina amohhe'eesiyé' asma tawa tsabin Daudi kuwa ale/iisi.

³⁴ Geeraharuusér slaqwaruusér tlahhoó Naftali a kumuú wák, nee múk slaáqw ar gaambu nee lawlu a kume mibeeri tám nee faanqw.

³⁵ Múk tlahhoó Dani a kume mibeeri tsár nee dakaát nee tsiire lahhoó', oo taa amohhe'ees as slaqwara.

³⁶ Slaqwaruusér tlahhoó Asheri a kume mibeeri tsiyáhh ar taa amohhe'es slaqwaraaro.

³⁷ Múk tlahhoó Reubeni nee oo Gadi, nee tlaqtá tlahhoó Manase kudaá gayuú yaaér Yordani a kume tsiiru nee mibeeri tsár. Mukwí xooslaá slaqwara sleémeero gi kón.

³⁸ Slaqwaruuseerí sleémeero tina amohhe'és slaqwaraaro, tay tláy ay Hebroni, as Daudi kuwa waawutmoó yaamaá Israeli sleémeero wa qaasi. Múk Israeli kudá' aa meet sleeme kana slaá' Daudi kuwa waawutmooín wa qaasi.

³⁹ Inooín tana amoodá' i tlatla/iít deelo tame dinkwa nee Daudi, tawa /ayin nee tawa wahan. Muruú /aymaadá' taa amohhe'eés nee hhaeeín.

⁴⁰ Nee sleeme inslaaway'ín oo tseéw nee oo sawe, adór amór Isakari, nee Sebuluni nee Naftali, inooín muruú /ayma nguna huwiyé' ar daqwaaye, nee ar angaamiía nee ar wayshama', nee ar awe. Muruú /aymár tinda huúw a puurú, mikaátér tiíni, /ar'aá sabiíbu aa kah, difaái nee di/i, awe nee bee/aango. Múk Israeli iri ló'wa qwalaá/.