1 QOM'I 11 - Biblía Axweesantá Hhohho' ar Mungú 2004

Daudi kuwa waawutmoó Israeli nee oo Yuda wa qaás

¹ Múk Israeli sleémeero tari burumburiít baraá Hebroni dír Daudi, kway báy, «Ga/aaweek, atén a slaqwatók nee aa tseereerók ar kilá'.

² Qoomaadá' Saulo tawa waawutmo, kuúng slaqwaruusér Israeli ana geerahát baraá slaqwaraaro. Nee AAKOÓ MUNGÚ, Munguúwók kuúng uri báy, ‹Kuúng a de'eemusmoó muk'eé' oo Israeli, nee kuúng tari geeraharusmoó muk'eé' oo Israeli.›

³ Aluuwo bariisér múk Israeli sleémeero tay daqáy dír waawutmo Daudi baraá Hebroni. Inós alqado giri oó' dir'ín geeraá AAKOÓ MUNGÚ wa ale. Inós kway iimbalaáx as tawa waawutmoó múk Israeli, ar adoodá' AAKOÓ MUNGÚ ngira oó' dír Samueli.»

⁴ Daudi nee múk Israeli sleémeero tari tláy gixsár Yerusalemu. Qoomaadae Yerusalemu ka bay Yebusi nee yaamuloouuse a múk Yebusi.

⁵ Yaamuloouusér Yebusi Daudi ngway bayé', «Kuúng a datká baraaká'.» Ala Daudi gixsadá' koo/i gawit ar Siyoni gari hayóh, gixsadá' kari báy, «Gixsár Daudi.»

⁶ Kár Daudi iri káh, «Heé geera oo múk Yebusi gwaa tsitsiihh ku geeraharusmoó slaqwaruusér wa qaas.» Naagáy heé geera tay Yoabu garmoó Seruya, inós kway heé úr wa qaás.

⁷ Daudi iri hotaá áy baraadaá gixsár koo/i gawit, gawaá adoorihe didá' kay báy, «Gixsár Daudi.»

⁸ Inós gixsadá' gay tleéhh bihhe sleémeerowo, ngina iimír Milór wa iimu/ún, gay harweér. Yoabu yaameedá' aa hhiturumit ar gixsadá' gari alhhe'eés slukiiriro.

⁹ Daudi /uuru gway sláy baraá uraywose, asma AAKOÓ MUNGÚ Aleesleemusmo a dinkwa nee inós.

Faarór miguuseedár Daudi

¹⁰ Kuká' an geeraharuusér miguusér Daudi, kudá' ngwaa alee/isiye' baraá waawuti'iimarose, dinkwa nee múk Israeli sleémeero kudá' inós gwaa waawutmoó wa qaas ar adoodá' AAKOÓ MUNGÚ ngira oó' daanduú múk Israeliwo.

¹¹ Miguusér Daudi a tí: Yashobeamu oo tlahhoó Hakmoni, geeraharusmoó slaqwaruusér mibeeri tám. Inós múk tsiire tám guna tsuú/ ar lawaala baraá slaqwarár wake.

¹² Heé hatlá' baraá tla/ángw miguuseedá' tame, a Eleasari garmoó Dodo, oo tlahhoó Ahohi.

¹³ Looarka wake inós nee Daudi ta dinkwár i dirii' baraá Pas-damimu. Qoomaadae múk Filisti taa burumburiyé' as slaqwara, amoodae qaymór aanganoó yaariír oo shayiri i deer. Múk Israeli tari geeraá múk Filistír wa goów.

¹⁴ Ala Eleasari nee Daudi tari baraá tla/ángw qaymoodá' wa siinootín as tawa slaqwi, nee múk Filisti kuri tsuú/, AAKOÓ MUNGÚ giri tuú/, giri baalír úr i haniís.

¹⁵ Aluuwo miguusér tám baraá tla/ángw tidá' mibeeri tame tindina aweér tlaa/aaro, Daudi kuri amór mar'ír Adulamu i áy, qoomaadae slaqwaruusér múk Filisti xafaay ngwa tleehhiyé' baraá xatstá Refaimu.

¹⁶ Qoomaadae Daudi i baraá gixsár koo/ír gawít i dirii', slaqwaruusér múk Filisti gixsár Betilehemu ngaa i dahiyé'.

¹⁷ Daudi iri oó', «A slaá' hee ma'aá wahangw'eé' ngiwa hheeki baraá hhalangwdá' bihhaá afkú gixsár Betelehemúr i dirií'.»

¹⁸ Aluuwo miguuseedá' tám tari tláy tay waaraáhh ar baraá tla/ángw xafoó múk Filisti, ma'aay ngay iihheekiyé' baraá hhaalangwduú Betilehemúr wa ale, ngay huwiyé' amór Daudi. Ala inós ma'aydá' gaa wahiiká. Ma'aydá' gina ku'uús as tawa ilahhooa dír AAKOÓ MUNGÚ,

¹⁹ iri oó', «Munguúeé', adoosíng ma'ayká' ngiwa wah, ngi pa/asi dir'eene. Xáy, aqo qiítla tseerér mukwí ngiwa wah? Kuká' ma'ayká' ngaa hheekiye' ar slafingw'ín nguwa baraá tsaxwí dahaás.» Gawaá adoorihe ma'ayká' inós gaa wahiiká. Muruuwí an kudá' miguuseedá' tám aa tlehhít.

²⁰ Abishai hhiyoó Yoabu sleeme a geeraharusmo oo slaqwaruusér mibeeri tám. Inós ina slaáqw ar lawaala múk tsiire tám guri tsuú/. Inós sleeme kuna harafaár baraá tla/ángw miguuseedá' tame.

²¹ Inós aa iiatleerúy baraá tla/ángw miguuseedá' mibeeraá tám, inós kway geeraharusmooín wa qaás, ala adór miguuseedá' tám gaa ayká.

²² Benaya, garmoó Yehoyada, oo Kabse'eli inós a migusmo muruú waa/oo/amo guna tlehhiít. Inós sleeme daaqoó tsár oo Arieli oo Moabu guna tsuú/. Sleeme diraangw guna haraadáh baraá bohoongw qoomaadár tsaaqwaaro gway gaás.

²³ Sleeme heeko oo yaamaá Misri guna gaás, heé tlenaango miíta tsár, lawaalár yangaariir ga kón dakose, harmahaywós uraywo a adór xa'anoó ta inqwarúr tlehhahhiti. Ala Benaya guri i haratláy ar hhara, lawaalarós tidá' gari hayóh, heewuú Misri guri gaás ar lawaalarós ar kilá'.

²⁴ Benaya garmoó Yehoyada muruuwí guna tleéhh, inós kuri harafaár baraá tla/ángw miguuseedá' tám.

²⁵ Dír kudaá mibeeraá tame Benaya ilaiwa/ame gana ló'wa sláy, ala dír kudá' tám awa geera ga ayká. Daudi inós guri heé úr wa qaás oo xuumuuseerós.

²⁶ Slaqwaruusér hatlá' ar miguuse a Asaheli, hhiyoó Yoabu, nee Elhanani garmoó Dodo, kuduú Betilehemu,

²⁷ nee Shamoti kuduú Harodi, nee Helesi kuduú Peloni,

²⁸ nee Ira garmoó Ikeshi kuduú Tekoa, nee Abieseri kuduú Anatoti,

²⁹ nee Sibekai kuduú Hushati, nee Ilai kuduú Ahohi,

³⁰ nee Maharai kuduú Netofati, nee Heledi garmoó Ba'ana kuduú Netofati,

³¹ nee Itai garmoó Ribai kuduú Gibea oo tlahhoó Benyamini, nee Benaya kuduú Piratoni,

³² nee Hurai kuduú ya'aá Ga'ashi, nee Abieli kuduú Arbati,

³³ nee Asmaweti kuduú Baharumu, nee Eliaba kuduú Sha'alboni,

³⁴ nee daaqoó Yasheni kuduú Gisoni, nee Yonatan garmoó Shage'e kuduú Harari,

³⁵ nee Ahiamu garmoó Sakari kuduú Harari, nee Elifali garmoó Uri, nee Heferi garmoó Mekeroti.

³⁶ Heferi oo tlahhoó Mekerati, nee Ahiya kuduú Peloni,

³⁷ nee Hesro kuduú Karmeli, nee Na'arai garmoó Esbai,

³⁸ nee Yoeli hhiyoó Natani, nee Mibhari garmoó Hagri,

³⁹ nee Seleki oo tlahhoó Amoni, nee Naharai kuduú Be'eroti. Inós an kudá' xooslár slaqwara ar Yoabu, garmoó Seruya, ga loohamaamiís.

⁴⁰ Ira nee Garebu kudaá Itiri,

⁴¹ nee Uria kuduú Hiti, Sabadi garmoó Alai,

⁴² nee Adina garmoó Shisa kuduú tlahhoó Reubeni, geeraharusmoó múk tlahhoó Reubeni, ta dinkwa nee kudaá mibeeraá tám.

⁴³ Hanani garmoó Ma'aka, nee Yoshafati kuduú Mitani,

⁴⁴ nee Usia kuduú Ashterati, nee Shama, nee Yeieli daaqoó Hotamu kuduú Aroeri.

⁴⁵ Yediaeli nee Yoha a hhae, daaqoó Shimri, kuduú Tisi.

⁴⁶ Elieli kuduú Mahawi, nee Yeribai, nee Yoshafia daaqoó Elna'amu nee Itima kuduú Moabu,

⁴⁷ nee Elieli nee Obedi, nee Ya'asieli kudaá Mesobai.