1 QOM'I 10 - Biblía Axweesantá Hhohho' ar Mungú 2004

Gwa'arár waawutmo Saulo

¹ Múk Filisti tana slaáqw nee múk Israeli, múk Israeli iri goów geeraá múk Filisti wa ale, múk Israeli kuri tsuú/ gawaá tloomár Gilboár wa ale.

² Múk Filisti Saulo nee daaqaywose ngiri ohiné'. Múk Filisti daaqaywuú Saulo kuri tsuú/: Yonatan nee Abinadabu nee Malkishua.

³ Slaqwara Saulo guri albúhh, mahángw taa tsaxaár inós kuri sláy, iri slahhaá'.

⁴ Aluuwo Saulo garmaadá' xooslarós tidár slaqwarár loohiís guri báy, «Símeérók tataahhang, aníng gaasáng, as kahhó' mukwí taa al/utlinká miwa niqís.» Ala garmaadá xooslár slaqwarár loohiís iri da'ayuút adoodá' tleehharo. Aluuwo Saulo simeerós gari taataáhh iri gawaadií huú'.

⁵ Garmaadá' xooslaarós loohiís ngiwa ár Saulo aa gwaá' inós sleeme símeérós gana i huú' iri gwaá'.

⁶ Saulo nee daaqaywós tamaawo nay qatliyé', tay alhhe'eesoó waawuti'iima doó Saulowo.

⁷ Múk Israeli kuduú baraá xatsa kawa ár adór Saulo nee daaqaywose tara qaátl, inooín nina /akumiitiyé', gixsaduín ngay geexayé' nay gowiyé'. Múk Filisti niri hardáh tay hotaá ay baraá gixsaduudá' i alé.

⁸ Bál tsare, múk Filisti tana tláy tawa haasaánguú leehhi, tuuár Saulo nee awa daaqaywose ngay slayé' gawaá tloomár Gilboa wa alé.

⁹ Ngway tlaba duuxiyé', ngway saga tsatiyé', nee xooslaarós ar slaqwara ngiri ar tlayé'. Afo ngiri ilaharisiyé' baraá yaamaá Filisti sleémeero nee dír murslaaqatuudá' nee dír muko.

¹⁰ Xooslaarós tidár slaqwara ngiri qaasiyé' baraá doó munguii'ín, nee sagós nguri qaasiyé' baraá doó munguú ta bay Dagoni.

¹¹ Múk Yabesh-gileadi ngiwa axaasiyé' tidá' sleémeero múk Filisti aa tleéhh dír Saulo,

¹² miguuse sleémeero nina tleér, slaqwtá Saulo nee slaqwaá daaqaywose ngay huwiyé' ay Yabeshi. Aluuwo faduuín kiri foól dír gamuú xa'anoó ta/eewi amoodár Yabeshi. Inooín tari gwaawín deelo faanqw.

¹³ Saulo ina gwaá' asma inkihhimu wasleerós, inós inkihhimu guna dakuús dír AAKOÓ MUNGUHE ar hara'ayár AAKOÓ MUNGÚ ngiwa oohiiká, nee sleeme inós gi'i gina yaahamisuú áy ale/iisaay nguwa slay,

¹⁴ nee adoodá' AAKOÓ MUNGÚ nguwa yaahasár ayká. Gawaá adoorihe, inós kway gaás nee AAKOÓ MUNGÚ, waawuti'iima kari haniís dír Daudi garmoó Yese.