1 Petro 5 - Biblía Axweesantá Hhohho' ar Mungú 2004

De'eemuusér múk kríshaanáy

¹ Kuungá' bariíse, án kuungá' nu gurbuú'. Asma aníng sleeme a aakoó adór kuungá'. Slám aníng a lamabu'usmoó slahha'amaayér Kristo. Tam aníng a dinku'uús baraá xirfuudá' tindi geehhooeesi.

² Gawaá adoorihe án kuungá' nu gurbuú', kuungá' bee/ángw Mungú de'emaak, kudá' taa dabaahúng i saayín, nee kuwa sageesihhimita'. Ala adoorí ma tleehhara' as tunduwa harakeemisi, ala masók an tlehhá' ar sla'aarirhúng ar kilá', asma an adoodá' Mungú i slai. Slám ma tleehhara' as peésa kawa sleera' kilós ala na tleehhaak ar muunuú /awaák.

³ Nee slám kuungá' miti baaluuse tlehhiitara' daanduú kudá' taa dirhúngií saayini, ala masók kuungá' an slaqsaay tleehhitá' dir'ine.

⁴ Nee qoomár de'eemusmoodá' úr burkwa geehhooeés, kuungá' slamangwduú xirif u sleerá', oo baloó hhitiruutaaká.

⁵ Kuungá' masoómba sleeme, iialooemisé' dír múk urene. Kuungá' sleémeero niinaweema ya/aamaak, as tiwa kiloohúng sagadiyusa'. Asma kaa gooín, «Mungú múk daara/aám gu sii', ala mukdá' ti niinaweemiís gu gurtláy.»

⁶ Gawaá adoorihe, ti niinaweese' baraá dákw Mungú, kudá' /uuruú koóm, as inós nuwa uráy i haniisi, qoomaarós bira xeér.

⁷ Daawitamerhúng sleémeero gawaawós ti qase', asma inós ti daawitimiis as kuungá'.

⁸ Kuungá' masók a múk qoóm. Dalaaé', asma wakusmoohúng, Neetlaangw, i adór dirángw wa harweerirín, kudá' aahhamiím, as heé i gu/i nguwa leelehhiiti.

⁹ Ala kuungá' inós siaak, tawa ló'wa sihhita' baraá haratlintaaooro. Asma kuungá' a xuá' slahh'amuú adór kwí kuungá' ta slasleera', hhaeehúng sleeme ngu slaslayá' umuúqo dír i dirii'iia baraakaá yaamuwo.

¹⁰ Alaá bur tunda slahh'eemiís deelór niinawe, daqaní Munguúdá' tsuuqa sleémeero gi tawó hanmiís, kudá' kuungá' naa ateet as xirfuuwós kuduú alhhe'eesay wásl kuwa sleera' ar loohír Kristo, inós kungá' nu aleesleemuú i haniis nee nu gawdees, nu /uurií haniis, nee nu sihhitis baraá haratlintaaooro.

¹¹ Aleesleemu a kós ay alhhe'eesay wasle. Amin.

Intsihhiisantá alhhe'eesaay

¹² Án barwaárí naa amorhúng i gooiimi a Silwano ina alee/iís. Inós a hhiyoó ló'wa inkihhím. Barwaárí ngina gooiím as kuungá' nuwa gurbuu' nee nuwa lamabu'uum gídaabá gaarí a gurtleemuú ló' oo Mungú. Gawaá adoorihe sihhtano hhe'eesé' baraá gurtleemuuwihe.

¹³ Múk kríshaanáy kudá' taa tsawaár adór kuungá' wa ale oo baraá yaamaá Babulonírí dirií' kuungá' nu intsahhiimiis. Nee garmaaeé', Marko, sleeme kuungá' nu intsihhiimiis.

¹⁴ Kuungá' ti kiloohúng intsihhiimise' ar ma'amisuú sla'aari. Mungú kuungá' nu waydií haniisi, kuungaásingá' sleémeero awa baraá Kristó i diriiá'. Amin.