1 Petro 4 - Biblía Axweesantá Hhohho' ar Mungú 2004

Slafíngw /abén

¹ Kristo slahh'eemisuú slaqwa gwa sa qiqtlín. Gawaá adoorihe kuungá' sleeme gár tunduwa hariím a inslawoó adoorí un koondá', asma heedaádá' slahh'eemisuú slaqwa gwa sa qiqtlin, inós taa paraátl dír tlakweemaawo.

² Gawaá adoorihe qoomár aa meti baraá slafingwhúng oo baraakaá yaamuwo, kuungá' gár tunduwa hariím an hotá' ar sla'aarír Mungú kawa tlehha', ala ma hootara' ar ilatleerír muu kawa eeharahada'.

³ Asma qoomaadá' aa waarahhi kuungá' sla'aarír múk Munguú xuaaká ana eehadé'. Ala a ido daxta. Qoomaadae ana hoté' ar slafíngw slasla/arén oo mure wásl, nee ar ilatleerír tlakw. Ana hoté' ar oonitime nee hheehha nee layda, nee slám ana hoté' ar slaqsa'aá munguaá hatlá' kiwa sluufmisa' adoodá' hariimaaká.

⁴ Inooín i waa/oo/aminá' as adoodá' kuungá' nee inooín tiwa alkoomakoonda'aaká baraá tlehhemi'ii'ín kudá' slasla/arene, kudá' hariima wasle. Gawaá adoorihe tundu /ooslislín.

⁵ Ala inooín kángw slafingw'ín ngun kwaliliná' dír geeraá Mungú, kudá' taa amoohhe'ees as múk slaáf nee múk aa qatli nguwa sakwasleemuuti.

⁶ Asma gaarí an gár Ya/abtór hho' kasa alki/iít tam dír múk aa qatli, as kahhó' inooín tawa slafi baraá qeeruuwo, ar adoodá' Mungú ir slafi, ala tam inooín sakwasleemár slaqwa nga slay'i ar adoodá' muu kuwa hariím.

Saayuusér hho' ar tsuuqaá Mungú

⁷ Alhhe'eesoó mura' sleémeero aa nakaá/. Gawaá adoorihe kuungá' masók a múk ti ila/aám nee múk dalaá', as kahhó' kuungá' tawa múk Munguú firiiriím.

⁸ Ala gár afhhamít ta muruuwí sleémeerowo a tí, kuungá' kiloohúng ti sla'aaslae'. Asma sla'aari tlakweemaá yaariir gi tuntúk.

⁹ Nee slám kuungá' kiloohúng ti dahi'iimise' ar qununu/ay wasle.

¹⁰ Kuungá' ti kiloohúng sagadiyuumise' ar adoodá' Qeeruú hhoohhoó' oo Mungú umuúqo heewo ngura aleesleemuú i haniís, kuungá' masók a adór sagadiyuusér hho' ar tsuuqaá dimbadimbé awa Mungú gaa sleer.

¹¹ Heé axweesantá Munguú alki/iít, ngi alki/iiti ar adoodá' axweesantá Mungú i kat. Heé gadiyuús, i gadiyuusi ar /uuruudá' Mungú aa haniís dirós i alé, as kahhó' Mungú iwa xirfuuti baraá mura' sleémeerowo ar loohír Yesu Kristo. Xirif nee aleesleemu a kós tam ay alhhe'eesay wasle. Amin.

slahh'eemisuú kríshaanáy

¹² Sla'aaruuser'eé', kuungá' ma waa/oo/amiimara' as slahh'amuú yaariír kwisíng ta slasleera', oo adór iiara'aduú asla, tawa adór gár xuaawasl.

¹³ Ala kuungá' qwalaala/é' as adoodá' slahha'amaayér Kristo kawa tsaqé', as kuungá' tawa ló'wa qwalaa/a, qoomár xirfuuwós burkwa geehhooeés.

¹⁴ Kuungá' bar tundun /ooslislín as Kristo, kuungá' daqaní a múk amoohhoó'. Asma Qeeruú Xirif kuduú Mungú, i gawaahúng i dirii'.

¹⁵ Ala hee baraá tla/angwhunge mukuwa slahh'eemiís as iwa tsu/uút, laqaá as tlehhmuú tlákw nguwa tleéhh, laqaá as tawa heé ti dahamiís baraá muruú múk i aleeró.

¹⁶ Ala bar hee kun slahh'eemiis as inós tawa Krishaanmo, inós miwa muruút. Ala inós Mungú ngu xirfayeesi as adoodá' inós kuwa Krishaanmo babay.

¹⁷ Asma qooma naa xeér ar sakwasleema iwa iimu/uun dír múk Mungú wa ale. Ala barnaxes sakwasleema in iimu/uún dirén wa ale, ala alhhe'eesaywós a adoomá dír mukdaádá' Ya/abtór hho' ar Mungú gaa si'i?

¹⁸ Asma Gooi i kat, «Ala barnaxes ba/amár heé hota ganaá' a gár gawit, xáy, a adoomá dír heedaádá' Munguú ilaiwawa/aakahe nee oo tlakusmoowo.»

¹⁹ Gawaá adoorihe mukdaádá' ta slahh'eemisi ar adoodá' Mungú i slai, muner'ín ngi dabaá Mungú i qaasiye', asma inós a tleehharusmooín oo inkihhimuú koóm, nee inooín tawa qiqtlin baraá tlehhema'aá hhó' wa ale.