1 Petro 3 - Biblía Axweesantá Hhohho' ar Mungú 2004

Tlaawaay nee hhawaate

¹ Kuungá' tlaáwaay sleeme, iialooemisé' dír hhawaateehunge, asma tam hhawaateehúng kudá' axweesantá Mungú ngaa haratlinti'ii'iiká, ngi haratlinti'iye' as tlehhemi'iihúng, tam kaa ádbaykahe.

² Asma slafingwhúng kwa ár, adór kur hhohhó', nee adór ir ilaiwa/amér kon.

³ Kuungá' tlaáwaay, hhohhoaari ma leelehhitara' ar parootír slaqwa, adór se'eengw kuwa hhutlita', nee tiwa parootusa' ar sahaábu, nee ar inqwaruú hhohhó'.

⁴ Ala hhohhoaarirhúng masók a hhohhoaaridár baraá muuná, tidá' geetlaakw, slám i hhitirutaká. A hhohhoaaridár muunuú tsatsa'aár nee amohhoa. An tidá' ló'wa afhhamít dír geeraá Munguhe.

⁵ /ameenadá' hhohho' ar aáng hhohhoaari adór ngira leelehhít an adoorí. Inooín Mungú kuna harahhiíf, tam iri iialooemís dír hhawaateeine.

⁶ Sara adoorí gana tléhh. Inós ina iialooemís dír Abrahamuwo, guna aakoowós ar ateetiín. Kuungá' bar tlehhma'aá hhohho' iga tlehhé' awa adór kuká', nee bar hotá' ar dae wasle, daqaní kuungá' a na/iiwós.

⁷ Kuungá' hhawaáte, nee tlaawayhúng hooté' ar sagalooa, kiwa ilaiwawa/a' as inooín tawa múk /uuruú koomaaká ta kuungane, asma inooín nee kuungá' a al aaluusér slafíngw alhhe'eesay wásl, kudá' tinda tawó amorhúngií haniís. Adoosíng tleehhaak as firorhúng makawa baáq.

Slahh'eemis as tlehhema'aá ganaa'á'

⁸ /Aymuú alhhe'eesaay a kwí, kuungá' sleémeero masók a múk ti kaangw axamiís, nee múk tsaén, nee slám hhae na sla'asla'aak. Kuungá' masók a múk gurtleemuú koóm, nee múk ti kilooín niinaweemiís.

⁹ Tlakweema mi kuqár bu'uumara', laqaá /oosli ma tiqár bu'uumaara'. Ala kuungá' masók tsuuqaá Mungú in hanmisá'. Asma gaarí an gár Mungú kuungá' nusa ateét sleeme as tsuuqa kiwa ala'.

¹⁰ Asma kaa gooín, Umuúqo heewo oo slafiingós gu slaá', nee oo deelór qwal/amaaye ga leelehhiít, inós tsifraangós ngu ilaa/i tlakweema mingiwa oín, nee afkós ngu ilaa/i lama mingiwa káh.

¹¹ Inós tlakweema ngi may nee tlehhema'aá hho' ngi tleehhi. Wayda ngu leeleehhi ar ilakaaharu.

¹² Asma Aako mukdá' gan'amuú koóm gun ga/áy, nee firor'ín ga axamiis umuúqo siiwaro. Ala xaraasleemaawós i gawaá daanduú mukdá' tlakweemaá tlehhiít.»

¹³ Ala heé kuungá' nu aleesláw slahh'eemisuuwo a heemá bar kuungá' gár ta sla'a' a hhooeema in tlehhá'?

¹⁴ Ala kuungá' bartundun slahh'eemiis as gan'amu kuwa tlehhiité', kuungá' daqaní a múk amohhoó'. Kuungá' mutunduwa tawó dae tlaáq, laqaá ma tawó amoqwaqwadiimara'.

¹⁵ Ala Kristo na xirfayeemisaak baraá munerhunge tawa Aakoohúng. Umuúqo siiwaro kuungá' masók taa amohhe'esé' heé yaahamiís kuwa mu/aywatsa' ar adór hariim daanduú harahhifoodár baraahúngií diriia.

¹⁶ Ala adoorí tleehhaak ar tsatsa'areema nee ilaiwa/ame, munerhúng masók ka hhohho'. As kahhó' mukdá' kuungá' nu daanda kaantiím as slafingwhúng oo Krishaanu'uuma, kiwa mureekeesi.

¹⁷ Asma a tsiní burtu slahh'eemiis as tlehhema'aá hhohho', barnaxes a sla'aarír Mungú, ta tuwa slahh'eemisi as tlehhema'aá tlakw.

¹⁸ Tam Kristo sleeme ina gwaá' as tlakweema. Ina gwaá' sagaáwa wák wa ale as tlakweema sleémeero. Inósuudá' gan'amuú koóm kuna slahh'eemiís as mukdá' gan'amuú koomaaká, as inós atén tiwa huwi amór Mungú. Slaqwtós kana gaás, ala kuri waaslee/atís ar Qeeru.

¹⁹ Slám iri tláy ar baraá Qeeru ay dír muneedár baraá tseegamór i dirii', gari i dahareemiís.

²⁰ Mukwí an kudá' Mungú gwa sii' qoomár de'emaá Noawo. Qoomaadaádae Mungú ina daamarán ar qiqtliingw qoomár miringamoó úr kuwa tlehhiiti. Baraá miringamoodae múk niiná ina ba/án ar baraá ma'aay, inooín a dakaát kilós.

²¹ Ma'aydá' a slaqsoó baatiísmo, kudá' kuungá' nu ba/amiimís de'emakaákae. Baatiísmo a slasla/aruú slaqwa gun hingeemiisiiká, ala baatiísmo a hee Mungú gun firiirín as muunuú hhoó' nguwa slay, ar /uuruú waasle/uú Yesu Kristo.

²² Inós ina tsa/án gawaá doori, iri iwiít dákw doó /iyáy oo Mungú. Malayke nee kudá' aleesleemuú koomá' nee kudá' /uuruú koomá' kaa gawaá dabaawósií qaás.