1 Petro 2 - Biblía Axweesantá Hhohho' ar Mungú 2004

Tlaa/ár slaaf nee Xoorór hhoohhoo'

¹ Gawaá adoorihe tlakweema sleémeero hingeesaak, lama nee hhaahhafiingw sleémeero, nee da/i nee /ayseeno sleémeero.

² Adoodár na/aá qaweero ilwa ngir ilatleeruumaamisiya', kuungá' sleeme ilwadaá ló' awa axweesantá Mungú, ilatleeruusaak, as kuungá' axweesantí nuwa ureemis ay dír ba/ama kay i hardata,

³ barnaxes ar ló' awa adór Aako kur hhoó' kuungá' aga tsaqé'.

⁴ Qwalaasé' amoorós, inós a tlaa/adá' slaaf, tidá' taa sií' nee muu, ala dír geeraá Munguhe a tlaa/adá' taa tsawaár, tidá' afhhamít.

⁵ Kuungá' kilá' sleeme masók a adór tlaa/aá slafá', tundu tleehhi tawa doó qeeru tleehhita'. Kuungá' masók a kaahamuusér Mungú ar hhohho', nee ilahhooár qeeru ar muruú ta tsu/i kawa huba', tidá' ta ya/an nee Mungú ar loohír Yesu Kristo.

⁶ Asma Gooi i kat, «Ga/aaweek, aníng tlaa/ár ur ar do' ir gawduy, tidá' taa tsawaár nee ar afhhamít, a qaás gawaá Siyoni. Umuúqo heewo oo inós gwa haratlintii' ku mureekeesiiká.»

⁷ Gawaá adoorihe inós i xirif tleehhiit dír kuungaásingá' aga haratlinti'ii'i. Ala dír kudá' naa haratlinti'ii'ikahe a adór «tlaa/aadá' qwatsiiruuse aa sí' aa tlaa/ár ur tleehhít ar do' ir gawduy.»

⁸ Nee kaa malé gooín, «tlaa/ár inooín gi dukuuts, nee tlaa/ár inooín ta i huui.» Inooín Axweesantadá' haratlintaaooro kan siaasii'. Gawaá adoorihe axweesantadá' iri dukuutsmo tleehhít dir'ine, asma gaarí an gár Mungú aa qoomeés daandeemooine iimír iimu/uungo.

⁹ Ala kuungá' a xoorór taa tsawaár, kaahamuusér waawuti'iimár Mungú, xoorór hhoohhoo', xooroodá' Mungú aa tós tleéhh, as kuungá' tlehhemi'iiwós kudá' xirfayen kiwa alki/ita', kudá' inós aa tleéhh. Inós kuungá' nuna ateét baraá giwtír wa ale, nuri dahaás baraá gwa/aateemaawós kudá' waa/oo/amór koomá'.

¹⁰ Asma kuungá' aáng geeraawo a xooroorooká, ala hám daxta a xoorór Mungú. Kuungá' aáng gurtleemuú Mungú ugwa sleeri'iiká, ala hám daxta gurtleemu ugwa sleeré'.

Lawaalér Mungú

¹¹ Sla'aaruuser'eé', kuungá' a adór múk waaraáhh nee adór dahaaye tawa hota' baraakaá yaamuwo. Ala án kuungá' nu gurbuú', kuungá' ti harmagahhe' nee ilatleeri sleémeero ar slaqwa, asma i sláqw nee qeeru.

¹² Slafingwhúng masók i tlehhema'aá hhohhó' laqaaqán dír geeraá múk xoorduuwo. As qoomár inooín burtundu /ayseenií tlaaq, tawa kaahi, a muruú tlákw tlehhitá', ala inooín tlehhemi'iihúng awa hhohho' birka ara'ár, daqaní inooín Mungú ku xirfayees bál inós birna hardáh.

¹³ Kuungá' iialooemisé' as Aako dír muu sleémeero oo aleesleemuú kooma, kudá' taa uráy hanmiís nee muu. Iialooemisé' dír waawutmoowo, asma inós i aleesleemuú kón ta muu sleémeerowo.

¹⁴ Iialooemisé' dír ga/awuuseerose, asma inooín a múk tinda ya/aáw nee inós, as mukdá' tlakweema gaa tlehhiit kuwa doohhomiisi, nee kudá' tlehhema'aá hhohho' gaa tlehhiit kuwa diidi'iimisi.

¹⁵ Asma gár Mungú i slai a tí, kuungá' bar hhooeema iga tlehhé', daqaní múk axweesantá dakti'iimár axweés u xasltisá'.

¹⁶ Kuungá' a múk taa gweér baraá lawaali'iimár wa ale. Gawaá adoorihe gweermoosíng tunduwa gweér masók a Mungú un sagadiyuusá', ala ma tlakweemár lu/u/umaara'.

¹⁷ Muu sleémeero ilaiwawa/aak. Hhae sla'asla'aak, Mungú ilaiwawa/aak. Waawutmo ilaiwa/ame ti hanise'.

Slaqsoó slahh'eemisuú Kristo

¹⁸ Kuungá' lawaále, iialooemisé' dír daqaarerhunge ar ilaiwa/amér yaariir. Ala a dír kudá' hho' nee kudá' tsatsa'aren kilooineeká, ala tam dír kudá' xaraaslá' sleeme.

¹⁹ Daqaní Mungú kuungá' nu tsuuq, asma Mungú ku sla'atimis nee heé slahh'amu gu sa qiqtlaatliím as gan'amu. Heé qiqtliím as Mungú baraá slahh'amaayeedá' inós wa hariimaaká, inós ku tsuuq nee Mungú.

²⁰ Ala heé qiqtliím baraá slahh'amaayeedá' inós wa hariima as tlakweemaadá' aa tleéhh, inós gár kus xirfayeemisi a milá? Ala kuungá' adór ganaa' bar ana tlehhé', slahh'amu kuri qiqtliindá', daqaní tundu tsuuq nee Mungú.

²¹ Gaarí an gár kuungá' tundusa ateét. Asma Kristo kuna slahh'eemiís as kuungá', inós iri slaqsaay tleehhiít as kuungá' digiruuwós kuwa eehada'.

²² Inós tlakweemaá aa tleéhh i kahhiyá', slám lama afkose gaa baloó ooiiká.

²³ Inós qoomár kuwa /ooslislín, /ooslima gaa tiqár buiiká. Qoomár kuwa slahh'eemiís, mukdá' gwa slahh'eemiis gwa dae tsatiiká, ala tiri qaás gawaá dabaá Mungú, kudá' sakwasleemár ganaa' ga tleéhh.

²⁴ Kristo inósuú kilá' tlakweemaarén gina gagaár ar gawaá slaqwtós ay gawaá msalaába, as kahhó' atén tawa adór múk aa qaatl baraá tlakweemaawo, nee slám atén masók a múk slaáf baraá gan'amuuwo. Kuungá' tunduri hungu/uús as inkahhi'iidá' inós aa sláy.

²⁵ Kuungá' aáng a adór bee/ángw aa qwaar, ala hám daxta naa ki/é' amór de'eemusmo nee xuumusmoó munerhúng.