1 Petro 1 - Biblía Axweesantá Hhohho' ar Mungú 2004

¹ Anuú Petro, ya/abusmoó Yesu Kristo, barwaárí ngina gooiím amór múk taa tsawaár oo Mungú, oo aa diyaayaa/aat, oo baraá yaamaá dahaayi'iimár wa hoót, baraá yaamaá Ponto nee Galatia nee Kapadokia nee Asia nee Bitinia.

² Kuungá' tunduna tsawaár as adoodá' Mungú Baabá inósuú kilá' aa slaá', as kuungá' tunduwa múk hhohhó' tleehhi ar Qeeruuwós, nee as Yesu Kristo kuwa ilaiwawa/a' nee tunduwa tseerér Yesu Kristó i hikimiisi. Tsuuqaá Mungú nee wayduuwós i ló'wa doogine' dirhunge.

Harahhifór slafíngw koom

³ Mungú Baabuú Aakoorén Yesu Kristo i xirfuuti. Inós atén tina sagaáwa tsár wa laqwaál ar gurtleemuuwós oo yaariír, qoomár Yesu Kristo nguwa waaslee/atís baraá múk aa qaátl wa ale, as atén harahhifór slafiingw kawa slawaan,

⁴ nee aalír hhitiruutaaká a slawaán tidá' ta meetagaasiiká, slám i /otská. Tidá' ta gawaá doorí wa amohhe'eemisi as atén.

⁵ Kuungá' tundun de'én nee /uuruú Mungú ar loohír haratlintaao, as ba/amadá' taa qaroó amohhe'eés kawa ilaota', tidá' tindi geehhooeesi bál deelór alhhe'eesaywo.

⁶ Gawaá adoorihe kuungá' a ló'wa qwalaala/á', ala tam gurhaamuta'a qoomaarí niinawe as iiara'aduú dimbadimbé, asma adoorí i pa/aká.

⁷ Iiara'aduuwí gídaabárós i deer. A haratlintaaorhúng kan iiara'ar, xáda xáy haratlintaaorhúng tisíng ar lóe? Sahaábu a gár qwaar, tam ku iiari ar baraá asltadár sahaábu kur hhoohhooeemiis. Ala haratlintaaorhúng ka ló'wa afhhamít ta sahaábuwo. Asma haratlintaaorhúng bar kaa iiár, i hariín kawa diidi'iimiisi nee kawa xirfayeemisi nee kan ilaiwawaa/ qoomár Yesu Kristo burkwa geehhooés.

⁸ Kuungá' inós u sla'á' tam ugwa aandi'iikahe. Slám inós u haratlintaatiá' tam hamí u ara'aanda'aakahe. Kuungá' u sageeqwalaala/á' ar qwal/uú xirfuú koóm, kudá' alki/ituuwo ta aleesleera'aaká,

⁹ asma haratlintaaorhúng gár i huwaahup a ba/amár munerhúng.

¹⁰ Ba/amarí an tidá' aaruuse aa leelehhít nee aa tsee/aariín. Aaruuseedá' ina aaririín kángw ba/amadá' kuungá' nu i hardaha,

¹¹ qooma gari leelehhít axáy i tleehharuuti a qooma gaalá, nee a qoomár adoomá. Asma Qeeruú Kristo, kudá' baraaín i dirií', kángw qoomaadá' gwa qaro geerií oó', nee slahha'amaayér Kristo i slay gari dir'ín i lamaabu'ún, nee xirfuú i slay aluudae.

¹² Kaangwí kuri dir'ín i gwa/atís adór inooín kaangwí gár kus kaahi tar inooineeká, ala as kuungá'. Nee hám daxta kaangwí kunga oó' dirhunge nee mukdá' Ya/abtór hho' ngaa dirhúngií alki/iit ar loohír Qeeruú hhoohhoó' oo Mungú, kudá' tinda ya/aáw gawaá doorí wa ale. Muruuwí tam malayke sleeme gun ilatleerús nguwa artá wa sla'.

Ateetamór tawa hooti ar hotaá hhohho'

¹³ Gawaá adoorihe inqwaruuhúng siinootaak, nee ta dal'á'. Kuungá' masók tsuuqaadá' tindi haniisi qoomár Yesu Kristo burkwa geehhooeés, in ló'wa harahhifá'.

¹⁴ Kuungá' masók a na/aá ilaiwa/amér koomá', slám ma kumiitara' tunduwa uuruxun nee ilatleerirhúng, tidá' taa eehadé' qoomár tunduwa iimi boó/.

¹⁵ Kudá' kuungá' naa ateet ku hhoohhoó'. Gawaá adoorihe kuungá' sleeme masók a múk hhohhó' baraá muruudá' sleémeero ta tlehhita'a.

¹⁶ Asma Gooi i kat, «Kuungá' masók a múk hhohhó', asma aníng ti hhoohhoó'.»

¹⁷ Kuungá' Mungú bur firiiriindá', un Baabár ateetiindá', inósuudá' umuúqo heewo gu sakwasleemuút ar qoomoó tlehhemi'iiwós ar barqaanti wasle. Gawaá adoorihe, kuungá' hooté' ar Mungú kuwa ilaiwawa/a' baraá qoomaarí tawa hota' baraakaá yaamuú wa ale adór dahaaye.

¹⁸ Kuungá' a xuá' adór gár tundura tlaáxw tar muruudá' hhitiruumitaaká, a peesaarooká, laqaá sahaábuwooká, as kuungá' niwa ti'ita' baraá tlehhemi'iihúng kudá' hariima'aakahe, kudá' taa ilaaoté' dír baabi'iihúng wa ale.

¹⁹ Ala gár kuungá' tundura tlaáxw a tseerér afhhamít ar Kristo, kuduú adór deelmoó bee/i, oo slasla/areeká, oo xaslxaansli wásl.

²⁰ Gaarí an gár inós kusa tsawaár nee Mungú iimír yaamu kiwa tleehhiiká, nee hamí baraá deeloorír alhhe'eesaywo kuna geehhooeés as kuungá'.

²¹ Kuungá' Mungú ugwa haratlintié' ar inós, Munguúdá' inós gwa waaslee/atis baraá múk aa qaátl wa ale, guri xirfuú i haniís. As kuungá' Mungú kuwa haratlintia' nee kuwa haraxua'.

²² Kuungá' taa hhoohhooesé' asma looeema kiwa ilaiwawa/é', as tawa hota' ar sla'aarír hhaahhafiingw wasl dír hhaeewo. Gawaá adoorihe kuungá' ti ló'wa sla'aaslae' ar mune sleémeero.

²³ Asma kuungá' tunda laqwaál sagaáwa tsare, ar xwaylár slaqwtooká, ala ar xwaylár qeeru. Xwaylarí ina tleehharút ar /uuruú axweesantá Mungú, tidá' slafíngw koom, nee slám i hotaatiín ay alhhe'eesay wasle.

²⁴ Asma Gooi i kat, «Muu sleémeero a adór gitso, nee hhohhoarir'ín sleémeero a adór /ayór gitso. Gitso in kát, nee /ayo iri páhh.

²⁵ Ala axweesantá Aako in hotaatiín ay alhhe'eesay wasle.» Axweesantí an Ya/abtór hho', tidá' tinda dirhúngií alki/iít.