1 Korinto 9 - Biblía Axweesantá Hhohho' ar Mungú 2004

Gár hariím dír ya/abusmoowo

¹ Ahaá, aníng a heé taa gweériíke? Ahaá, aníng a ya/abusmoowookáhe? Ahaá, aníng Yesu Aakoorén ugwa áriíke? Ahaá, kuungá' a mamaá gadiyér'eéneéke, ar baraá Aako?

² Ala aníng tam ya/abusmoowookahe dír múk hatlae, ala dirhunge aníng a ya/abusmo. Asma kuungá' a layar'eé' ar ga laqaqaam adór aníng tar ya/abusmoó Aako.

³ Gaarí an gár aníng tir aleekal/aam dír mukdá' ya/abusi'iimar'eé' ga siaasia.

⁴ Ahaá, atén a hariimanaakáhe tawa /ayiimaan nee tawa wahaamaan?

⁵ Ahaá, atén a hariimanaakáhe umuúqo dír ta kawana harér Krishaanto'o nee atén tiwa alkoomaan, adoodá' ya/abuuseedár hatlá' aa tléhh, nee hha'aá Aako, nee tam Kefa sleeme.

⁶ Laqaá án nee Barnaba kiloorén an hariimanaakáhe gadiyeé kawa mawaan?

⁷ Ahaá, askaarmo i deéro oo slaqwarár áw, tiri kilós buu'? Laqaá hee i deéro oo qaymór sabiíbu gaa dahaas, mamuudá' giri /ayiiká? Nee slám hee i deéro oo muruú de'eém, ala ilwaá muruudá' giri /ayiiká?

⁸ Aníng axweesanaywí ngu kaáha ar heeuuma? Ahaá, hara'aya sleeme adoorí ga kátke?

⁹ Asma baraá hara'ayár Mosewo kaa gooín, «Awuú balángw adaráh as nguwa pur/umiisi, mu afa tseegaar.» Xáy, diirihe Mungú gár i ga/ay a kángw awuúwo?

¹⁰ Ahaá, adoorí gár ngisa oó' a aténeéke? Asma axweesantí gár kasa gooín a atén. Heé doósl, i doosli ar haraxu'uti adór gaa ngir sláy, nee heé balángw pur/umiís, gadiyeérí ngi tleehhi ar haraxu'uti adór gaa sláy baraá bu'ungwdae.

¹¹ Bar atén muruú qeeru una dirhúngií dahaasaán, ala a gár hariimakáhe atén muruú slaqwa bur dirhúng wa bu'uumaán?

¹² Múk hatlá' barnaxes i harín kuungá' kuwa amohhe'eemisa', ala atén a ak hariimánaáke ta múk hatlae? Ala atén hariímarí aga ar gadiyuusaniiká. Atén ana qiqtliimaán gawaá umuúqo gaaro as Ya/abtór hho' ar Kristo mawa dukuutsmoó i qaasaán.

¹³ Ahaá, kuungá' a xuá'áke mukdá' baraá Doó Mungú wa gadiyuús, muruuduú Doó Mungú gun /aay? Nee slám a xuá'áke mukdá' didár kitángw ilahhooár wa gadiyuús hariímar'ín kan baraá muruudá' taa ilahhooár wa haniís wa sláy?

¹⁴ Nee slám Aako hara'aya gaa adoorír oó', as mukdá' Ya/abtór hho' ga alki/aa/iít, sleeme gár kiwa hariím a muruú /aymar'ín ngun slayá' ar Ya/abtór hho'.

¹⁵ Ala aníng hariímarí sleémeero aga ar gadiyuusiiká, tam gár wák, laqaá adoorí aga gooimiiká as hariímarí ngiwa slaw dirhúng wa alé. Asma a tsiní aníng bara gwaá', ta xirfuueé' kwí hee nguwa hingeesi.

¹⁶ Asma aníng tam a Ya/abtór hhó' alki/iita, gár tir xirfayees i káhh. Asma gaarí a gadiyér tinda aníng i haniís, a gár ni baqaaká tleehhamooro. Aníng Ya/abtór hho' bar alki/iitaaká, a tsaxwaaeé'.

¹⁷ Asma gadiyeérí bara tleéhh ar sla'aarir'eé' kilós, aníng bu'utu u sláw. Ala barnaxes a gadiyér aníng wá hariim, daqaní a gadiyér tinda aníng i saayín.

¹⁸ Gawaá adoorihe bu'utuueé' a milá? Bu'utuueé' a qwal/uudá' aníng ni koom, asma aníng a Ya/abtór hhó' alki/iít ar bu'utu wasle. Geeraawo a hariímar'eé' bu'utu nguwa slaw as adoodá' Ya/abtór hho' ngiwa alki/iít. Ala aníng hariímarí a iinuusaaká.

¹⁹ Aníng a lawaalmoó heewooká tam dír heemahe. Ala tam adoorihe aníng tina lawaalmo tleéhh kilooeé' alé dír muu sleémeerowo as múk yaariír nguwa slaw.

²⁰ Dír múk Yahudiro aníng tina adór heé Yahúdí tleéhh, as múk Yahudi nguwa slaw. Aníng a baraá aleesleemuú hara'ayár i diriiaaká. Ala dír mukdá' baraá aleesleemuú hara'ayár i diriia, aníng tina adór inooín laáq. Adoorí ana tleéhh as mukduú baraá aleesleemuú hara'ayár i dirií' nguwa slaw.

²¹ Aníng a hootaaká dír hara'ayár Mungú iwa kahh, asma aníng taa tseék nee hara'ayár Kristo. Ala dír mukdá' hara'ayár Mungú koomakahe, aníng tina adór inooín laqaá as mukdá' hara'ayár Mungú koomaaká nguwa slaw.

²² Dír mukdá' haratlintaao tununu/a, aníng tina adór inooín laáq, as mukdá' haratlintaao tununuú/ nguwa slaw. Gawaá adoorihe aníng dír umuúqo heewo tina adór inós laáq as umuúqo loohi ngiwa leelehhiit ar muu bahh'alé nguwa ba/amis.

²³ Aníng muruuwí sleémeero un tlehhiít as Ya/abtór hho', as kahhó' tsuuqaá Ya/abtór hho' kiwa eemaan nee múk hatlá'.

²⁴ Ahaá, kuungá' a xuá'aáke mukdá' qwaátl baraá ti'iingo, sleémeero tan ti'ii'ín, ala heé arba/ati ga sláw a wak kilós. Kuungá' sleeme adoorír qwaatlaak as arba/ati kawa sleera'.

²⁵ Umuúqo heewo oo qwaátl baraá neetooro, aqo tin ilaa/ baraá umuúqo gaaro. Mukwí adoorí gan tlehhiit as slamangwdá' hhitiruút kuwa slay. Ala atén adoorí an tlehhiitaán as slamángw hhitiruutaaká kuwa slawaan.

²⁶ Anínguú kilá' a tawó ti'ii'imaaká, ala amór ni ti'ii'iim a xuú'. Nee slám aníng a tawó tuu'utaaká, ala dír ni tuu' a xuú'.

²⁷ Asma aníng gár ni tuu'uut a slaqwte'eé', nee slaqwte'eé' ngiri baál, as masók anuúwí Ya/abtór hhó' alki/aa/iít amór múk hatlá' i alé, aníng mitiwa sií'.