1 Korinto 8 - Biblía Axweesantá Hhohho' ar Mungú 2004

Yaahasa daanduú fu'unaá taa ilahhooár wa hanmiís dír munguaá hatlá'

¹ Daxta kángw ni oo' a kángw fu'unaydá' taa hanmamisi dír munguaá hatlá'. Atén aga qaroó xuaán adór atén sleémeero xu'uti kar koomaán daanduú kaangwihe. Ala xu'uti gár ni huwaahup dír heewo a daara/aangw. Ala sla'aari gár ni huwaahup dír heewo a kwa/asa.

² Hee bir kaahi, «Aníng gaarí a xuú',» inós gadaádá' gaa baloó xuiiká ar adoodá' kus hariím xu'utiro,

³ ala heé Mungú gu slaá' inós ku xuu' nee Mungú.

⁴ Ala gawaá daanduú /aymár fu'unaydá' taa ilahhooár wa hanmiisi dír munguaá hatlá' gár ni oo' a tí, atén a xuaán adór munguaá hatlá' tar gaarooká baraá yaamuwo, ala Mungú a wak.

⁵ Munguaá yaariir i dayá' mungui gawaá dooriwo nee tam baraakaá yaamuwo. Gawaá adoorihe i ya/aán tawa ooaan, mungui ki yaariir, nee bariise ka yaariir.

⁶ Tam adoorihe direne Mungú a wak, inós an Baabá. Mura' sleémeero ina tleehharuút ar inós. Nee atén an dawaán as inós. Nee slám Aako a wak, inós an Yesu Kristo. Mura' sleémeero ina tleehharuút ar inós nee atén an dawaán ar inós.

⁷ Ala a muu sleémeerowooká oo xu'utirí ga koóm. Bahh'alé baraá slafingw'ine kaa ló'wa intsatsaáhh mungui kiwa ilaiwawa/i kwaáo in slafiyá'. Gawaá adoorihe fu'unaá taa ilahhooár wa hanmiís dír munguaá hatlá', birnga /ayiyé', kin slahh'eemiis baraá muner'ine, as adoodá' haratlintaaor'ín iwa tunuunu/ inooín kiri meetagaas.

⁸ Ala muruú /ayma atén ti hardahaasiiká amór Mungú. Fu'unaay bira mawaán /aymaaro, gár atene /aaruw i káhh. Nee bira /ayaán, gár atene doogiim i káhh sleeme.

⁹ Ala amohhooarí ta koonda' ga/aawaak miwa dukuutsmo tleehhít dír mukdá' haratlintaao tununuu/a.

¹⁰ Ar slaqsaywo, kuúnguusíng xu'utír koóm, burta ár tawa /ayiin baraá doó munguaá hatlá' wa alé, heé haratlintaaoorós tununuu/, inós fu'unaydá' taa ilahhooár wa haniís gi /aymár áyke sleeme?

¹¹ Gawaá adoorihe Krishaanmoodá' haratlintaao tununuú/ kudá' Yesu aa sa gwaá', kwaa qwaareés as xu'utirók.

¹² Ala hhaeehúng barnaxes ina sadakumisé' ar adoorí, nee haratlintaaor'ín tidá' tununuu/ kari slahh'eemisé', heé ta sadakusé' a Kristo.

¹³ Gawaá adoorihe, muruú /ayma barnaxes hhiyaaeé' gu dukuutsmoó i qamín, aníng fu'unaay i baloó /ayaaká ay alhhe'eesay wasle, as aníng mawa dukuutsmo tleehhiít dír hhiyaaeene.