1 Korinto 7 - Biblía Axweesantá Hhohho' ar Mungú 2004

Yaahamis daanduú duuxo

¹ Ala gawaá kangwdá' kuungá' naa gooiindi'i, a gár hhoo' hhawaata /ameeni ngiwa kwatitiiká.

² Ala as adoodá' fuqi iwa tláhh, umuúqo hhawaatuuwo masók in hareerós kón, nee umuúqo /ameeniro masók in hhawaatuuwós koón.

³ Hhawaata hareerós ngi hariímarós i haniisi, nee hare sleeme hhawaatuuwós ngu hariímarós i hanis.

⁴ Asma hare slaqwtós ga balká, ala heé slaqwtós ga baál a hhawaata. Nee slám hhawaata slaqwtós ga baaliiká, ala heé ga baál a hare.

⁵ Kuungá' miti /ita/itaara'. Ala aqo tin axweesani axamisá' gídaabá tiwa /ita/ita' ar har qooma, as pa/ángw tawa firiinda' kuwa sleera'. Aluuwo ti malé inki/e', as Neetlaangw pa/aangw munguwa diirír sláy oo nuwa iiara'ari asma kuungá' ila/aango tiwa aleesleera'aaká.

⁶ Aníng kaangwí nguna oó' ar adoodá' an ngur ga/aw, ala a hara'ayaarooká.

⁷ Asma aníng geera gár ni slaa' masók umuúqo heewo geera a adór aníng. Ala umuúqo heewo aleesleemuuwós oo Qeeru gu kón, kudá' taa haniís nee Mungú. Heewí a adoorí nee kuqá' a adorqá'.

⁸ Ala án gár ni kah dír mukdá' aa duuxuuxunkahe, nee dír kwaeeliwo a tí, a tsiní dir'ine bir kumiitiyá' tawa hooti kilooín ale, adoodár aníng nir kilooeé' hoot.

⁹ Ala barnaxes ila/aro ti aleeslay'aaká, a tsiní i duuxuuxune', laqaá kiwa duxuuti. Asma a tsiní hee iwa duuxun laqaá /ameeni kawa duuxi, ta asltá ilatleeri ngiwa al ohiinda.

¹⁰ Ala mukdá' aa qaroó duuxuuxun, nee /ameenadá' taa qaroó duxuút, aníng inooín in hara'ayiyiím. Ala a aningeeká, ala a Aako gin hara'ayiyín iwa kaahi, /ameeni hhawaatuuwós munguwa geexeér.

¹¹ Ala bar ngwa geexeér, i adoodá' wa hot, makawa duúx, laqaá nee hhawaatuuwós ti axweesani axaasiye'. Nee slám hhawaata hareerós mingiwa geexáy.

¹² Ala mukduú hatlá' heé gu ádbáw a aníng, a Aakoowooká, an kah, «Krishaanmo barnaxes hare ga kón ar Krishaanto'oorooká, nee hareedá' bar inós aa ya/aán tawa al hooti nee inós, hareerós mingiwa guús.

¹³ Nee hare barnaxes hhawaatuú Krishaanmowooká gu koón, nee hhawaatuuwí bira ya/án tawa al hooti nee inós, hhawaatuuwós munguwa geexeér.

¹⁴ Asma hhawaatuuduú krishaanmowooká, ku hhoohhooees ar loohír hareerós. Nee hareedár krishaanto'oorooká ka hhoohhooees ar loohír hhawaatuuwós. Asma geera bar adooriheeká, na/iihúng geera ki hhohhoeká. Ala hám ki hhohho'.

¹⁵ Ala hhawaatuuduú krishaanmowooká barnaxes hareerós ga talaákár i haniisár wa slaa', ngi haniisi. Laqaá hareedár krishaanto'oorooká barnaxes hhawaatuuwós gu geexeemuú wa slá', ngu geexeer. Asma hhawaatuuduú krishaanmo, laqaá hareedár krishaanto'o, inooín kaa tseegiiká nee hara'aya baraá muruuwihe. Mungú atén tina ateét as tawa hootaan ar wayda.

¹⁶ Asma kiíng háre, adór kar xu' a adoomá adór hhawaatuuwók kur ba/amís? Laqaá kuúng hhawaáta, adór kar xu' a adoomá adór hareerók kar ba/amís?»

Adoodá' Mungú ura ateét ar hooteek

¹⁷ Ala umuúqo heewo gár kuwa hariím masók i kumiit hotaango ar adoodár aleesleemuú Qeeru, kudá' Aako aa dirós i haniís, nee adoodá' inós i dirii'i qoomár kuwa ateét nee Mungú. Gaarí an gár ni hara'ayiyiim dír kríshaanáy oo umuúqo diiro.

¹⁸ Heé taa ateét nee Mungú barnaxes kwaa al/uútl, al/utloorós mingiwa luú/. Nee heé taa al/utliiká burkwa ateét nee Mungú, inós mukuwa al/uútl.

¹⁹ Hee burkwa al/uútl, laqaá burkwa al/utliiká, a gaarooká. Ala hara'ayár Mungú ka iialooeemisi.

²⁰ Umuúqo heewo i hooti ar adoodá' geeraawo i dirii'i qoomár kuwa ateét.

²¹ Kuúng tuwa ateét a lawaalmoówo? Ma gurhaamutaar as tawa lawaalmo. Ala pa/aangw bir deer oo kuúng tuwa gweeri baraá lawaali'iimaro, pa/angwsíng harmagahheek.

²² Asma heedaádá' taa ateét baraá Aakoowo qoomár inós tawa lawaalmo, inós a heé Aako aa gweér. Ala heedaáduú lawaalmoowooká kuwa ateét, heé adoorí an lawaalmoó Kristo.

²³ Kuungá' tunduna tlaáxw ar tlaxór ur. Ma lawaalér muu tleehhitaara'.

²⁴ Hhaee'eé', umuúqo heewo masók in hoot dír geeraá Munguhe ar adoodá' inós i dirii' qoomár kuwa ateét.

Yaahamis daanduú /ameenár taa duxuutiiká nee kwaeeli

²⁵ Ala gawaá daanduú /amaatliiteero aníng hara'ayár Aako ar ni koom i káhh. Ala gaarí ni oo' a adór aníng ni ga/aw. Asma aníng a heé taa gurtleemuú i haniís nee Aako, tawa heé muruú ló' káh.

²⁶ Adór án ngir ga/aawa a tsiní bar hee duuxo ngaa máy as slahh'amuuwí dáw de'emuukae.

²⁷ Kuúng barnaxes hare duuxooro aga hhe'és, loohi ma leelehhiitaar ar hareerók kawa gus. Nee barnaxes hare aga duxká, kuúng hare ma leelehhiitaar ar kawa dux.

²⁸ Ala bar aga duuxuún sleeme, tlakweema iga tlehhiká. Nee dasi bar kana duúx, tlakweema gaa tlehhiká. Tam adoorihe múk adór kwí slahh'amaaye ga sláy baraá slafingw'ine, nee aníng gár ni slaa' a kuungá' slahh'amaayeerí masók a sleera'aaká.

²⁹ Ala hhaee'eé', aníng gár ni kah a tí, qooma daxta aa niinawuúr. Ala iimír hamí mukdá' aa duuxuxun masók a adór múk aa duuxuxunká.

³⁰ Nee mukdá' /aa/amiím masók a adór múk /aa/amiimaaká. Nee mukdá' qwalalaá/ masók a adór múk qwalaala/aaká. Mukdá' muruú tlaxuúm masók a adór múk gár koomaaká.

³¹ Nee mukdá' muruú yaamuuká' gu eeharahár masók a adór múk gu eeharaharaaká. Asma yaamuuká' adoorí hám i diri'iia, i qwaariyá'.

³² Ala gár án ni slaa' masók kuungá' an daawimita'aaká. Heedaádá' aa duuxunká in daawiimiit as Aako, nee adór ngur qwal/atisi.

³³ Ala heedaádá' aa duuxun in daawiimiit as muruú baraakaá yaamu, nee adór hareerós ngir qwal/atisi,

³⁴ inslawaywós tari badu tsár. Nee /ameenidá' taa duuxiiká, nee /amaatliito'ooro, inooín sleeme in daawimitiyá' as Aako, as kahhó' tawa múk hhohhó' baraá slaqoowo nee baraá muneero. Ala /ameenidá' taa duúx, inós in daawimít as muruú baraakaá yaamu, nee adór hhawaatuuwós ngur qwal/atis.

³⁵ Aníng adoorí an káh as kuungá' nuwa alee/iis. Aníng a sla'aaká kuungá' nuwa harakeemiis. Ala gár ni slaa' masók kuungá' tidá' ganaa' an tlehhá', nee tidá' hhohho', masók tina hanisé' dír Aako baraá slafingwhunge, as kahhó' nee muruú hatlá' munduwa uuruxún.

³⁶ Ala daqtakaaro laqaá hee i da'ayuut iwa ooi, dasir'eé' tidá' taa duuxiiká bar aga haniisiiká dír heéwí alé, aga sadakuús. Barnaxes dasiidá' qoomár duuxo gaa eér, nee a gár hariím inós kawa duuxi, baabuúdá' adór inós i slai ngi tleehhi. Ala aa dakusiika barnaxes ya/aám gaa haniís tiwa duxuutiya'.

³⁷ Ala baabuúdá' barnaxes baraá muunaáwose gaa slaá' iwa kaahi, dasir'eé' tí a haniisaaká, inós bir xurumiitiiká baraá muunaáwose, nee barnaxes gaa tleehhiiká ar harakeesa, ala inósuú kilá' adoodá' aa slaá' gana tsaát baraá muunaáwose, inós adór hhoo' gaa tleéhh.

³⁸ Gawaá adoorihe heé dasiirós ga haniís, adór hhoo' gaa tleéhh. Nee kuda' dasiirós ga haniisaaká, inós adór hhoo' gaa ak tleéhh.

³⁹ /Ameenír taa duúx, hhawaatuuwós bir slaaf, /ameenidá' makawa duúx. Ala bar hhawaatuuwós aa gwaá', i ya/aán kawa duuxi nee heé inós i sla'. Ala adoorí ka tleehhi ar baraá Aako.

⁴⁰ Ala a gár ak hhoo' dirose bar duuxo ngaa meér. Gaarí aníng an káh, ala tam aníng sleeme án ngi slaá' Qeeruú Mungú u koóm.