1 Korinto 6 - Biblía Axweesantá Hhohho' ar Mungú 2004

kríshaanoó ti kilooín sakwasleemuút

¹ Baraá tla/angwhunge heé wák barnaxes i kwasleemár kón nee heé hatlá', adór ir qiitli kwasleemadá' ngiwa huwi dír geeraá múk hota gana'aaká. Gár geeraawo hariim a gan huuw dír geeraá múk hhohhó' oo Mungú.

² Kuungá' a xua'akáhe muu sleémeero kuwa sakwasleemuuti nee múk Mungú. Ala kuungá' barnaxes muu sleémeero u sakwasleemutá', a hariindá'aáke kwasleemár ninakw ar adór tisíng kawa tlaqa'?

³ Nee slám kuungá' a xua'akáhe atén malayke kawa sakwasleemuutaan? Ala malayke bar sakwasleemuutaán, muruú slafingwí un ak sakwasleemuutaánaáke?

⁴ Kuungá' bar kwasleemár koondá' ar muruú baraá slafingwí, ala kuungá' adór kwasleemadá' kar huba' dír geeraá mukdá' kríshaanáy gu gaárií xuaaká.

⁵ Gaarí a gár murér koom dirhunge. Heé sagalooár koóm baraá tla/angwhunge iqo káhhi, oo kwasleemár Krishaanmo nee kuqá' tsatto ga aleesláw?

⁶ Ala laatí, dirhunge Krishaanmo kuqá' gun sakwasleemár áy dír geeraá mukdá' Mungú gwa haratlinti'iiká.

⁷ Ala kuungá' bar ti kiloohúng sakwasleemutá' dír geeraá sakwasleemuusér wa alé, gaarí gár i laqaaqaan a kuungá' slafiingw ugwa harslaaqaté'. Ahaá, a tsiníheéke bar aga ya/aán tam ta sadakuusi? Ahaá, a tsiníheéke bar aga qítl tam taa gaa hayohi?

⁸ Ala laatí kuungá' kilá' a /aytuuse, nee muruú muu un hayohiindá', tam muruú hhaeehúng awa kríshaanáy.

⁹ Ahaá kuungá' a xua'akáhe adór /aytuuse waawuti'iimár Mungú ngir baloó alká? Kuungá' miti kiloohúng al/agiimara'. Múk tsaatuuse waawuti'iimár Mungú ga aaliiká, laqaá tam múk munguaá hatlá' haratlintaatií', nee tam fuquuse, laqaá hhawaateedá' nee hhawaataá hatlá' fuquusá', laqaá /ameenadá' nee /ameenár hatlá' fuquus,

¹⁰ nee tam fisuuse, laqaá qahuuse, laqaá ooniituuse, laqaá múk /ooslisliím nee laqaá múk aa dee/aanuut.

¹¹ Baraá tla/angwhunge bahh'alé aáng a múk adór kwí. Ala kuungá' tunda hamaátl, tunda hhoohhooeés, tunda gan'amí harafaár ar umuú Aakoorén Yesu Kristo nee ar /uuruú Qeeruú Munguúrén.

Mungú xirfayeemisaak ar slaqoohúng

¹² Heeko in ooi, «Dir'eene umuú gaaro i qoón.» Adoosíng ar ló', ala a umuú gaarooká ar hariim. Dir'eene umuú gaaro ngiwa tleehh a aleesláw, ala umuú gaaro aníng i sawaawuti'iindaaká.

¹³ Kuungá' a kata', «Muruú /ayma oo gura', nee gura' oo muruú /ayma.» Adoosíng ar ló', ala Mungú looarka wake muruuwí tsaraawo sleémeero gu qwaarees. Slaqwa kaa tleehhiiká as fuqi, ala slaqwa ar Aako, nee inós an Aakoó slaqwa sleeme.

¹⁴ Mungú Aako guna waaslee/atís baraá múk aa qaátl wa alé, nee Munguúwí atén sleeme ti waaslee/atis ar /uuruuwós looarka wake.

¹⁵ Kuungá' a xua'akáhe adór slaqoohúng tar diqoó slaqwtá Kristo? Ala aníng diqoó Kristo unqo taataáhha nguri diqoó tsaatuso'o tleéhh? Aasla'áy, adoorí i ya/aandaaká.

¹⁶ Laqaá a xua'akáhe heedaádá' ti haragaás nee tsaatuso'o, heedaádá' a slaqwtá wák nee inós. Asma Gooi i kat, «Kuká' tsár tari adór slaqwtá wák.»

¹⁷ Ala heedaádá' taa haragaas dír Aako, heedaádá' qeeruuwós nee Aako aa wák tleehhiít.

¹⁸ Gawaá adoorihe kuungá' fuqi ilaguwaak. Umuúqo tlakweemaá hee i tleehhi, gi slaqwtósí tlehhiitiiká. Ala heé fuquús, inós slaqwtós gan tlakweemií tlehhiit.

¹⁹ Kuungá' a xua'akáhe adór slaqoohúng tar Doó Qeeruú hhoohhoó' oo Mungú, kudá' baraahúng wa hoót? Inós an kudá' tinda haniís nee Mungú. Kuungá' ti kiloohúng bal'aaká. Ala kuungá' awa Mungú.

²⁰ Asma inós kuungá' nuna tlaáxw ar tlaxór ur. Gawaá adoorihe, kuungá' Mungú xirfayeemisaak ar slaqoohúng.