1 Korinto 5 - Biblía Axweesantá Hhohho' ar Mungú 2004

Sakwasleemár tsaatu'uuma

¹ Án kangwko ugwa axaás heeko i deer baraá tla/angwhunge oo fuquús nee harér baabuúwós. Fuqtá adór tí kaa dii wa axaasiiká tam baraá múk pakaanayhe.

² Ala bar adoorí, kuungá' gár ta daara/aanda' a milá? A tsiní alók geeraawo barnaxes ana gurhaamuté'. Heé tlehhemuú adór kwí gu tlehhiít gár kuwa hariím a kun paraatl dír múk kríshaanayhe.

³ Aníng hamí ti saáw dirhunge, ala tam adoorihe a dinkwárií dirií' nee kuungá' baraá qeeruuwo. Án geera bar dinkwárií dirií' nee kuungá', aníng heesíng adoosíng gaa tleehh geera ugwa qaroó sakwasleemuút. Ala tam hamí aníng ugwa qaroó sakwasleemuút

⁴ ar umuú Aako Yesu Kristo. Kuungá' bara burumburiité' dinkwa nee qeeruueé', nee /uuruú Aakoorén Yesu,

⁵ daqaní heesíng ku hanisá' amór Neetlángw i alé, as slaqwtós kwa hhitin, as qeeruuwós daqaní iwa ba/an Baalaadár Aakoorén Yesu binda hardát.

⁶ Daara/angwhúng kwisíng i harinká. Kuungá' a xuá'aáke, «Gadaádá' mikaáte kar sluuftimaamisi tam ka niiná, xwaanteedár mikaáte sleémeero aqo gan sluuftís.»

⁷ Kuungá' gadaádár aáng ar mikaáte kar sluuftimaamisi, tidár tlakweema, hingeesaak dirhunge, daqaní kuungá' a hhohhoouurá'. Daqaní kuungá' a xwaantér /aben ar mikaáte tleehhitá', tidá' taa sluuftisiiká. Nee adoorí an adoodá' kuungá' hám tay dir'a', asma deelmoorén oo Pasaáka gaasaro kwaa qaroó hhe'eés. Nee inós an Kristo.

⁸ Gawaá adoorihe atén deelór ur masók an tleehhaán. Ala mawa tleehhaán ar mikaáteedár aáng taa sluuftimís, tidár tlakweema nee slasla/aruwo. Ala masók deelór ur an tleehhaán ar mikaáteedá' /aben ar taa sluuftisiiká, tidár hhohhoaari nee looeema.

⁹ Baraá barwito'or'eé' tidá' naa amorhúngií gooimi nuna báw, kuungá' ma al dinku'uumisaara' nee fuquuse.

¹⁰ Aníng a kaahaaká ma dinku'uumisaara' nee múk baraá yaamu, kuduú fuquuse nee kudá' qahuuse, nee fisuuse, laqaá mukdá' munguaá hatlá' haratlintaatií'. Asma geera bar adoorí ngaa oó', geera alók kuungá' gár tunduwa hariím a baraaká' yaamu in geexeerá'.

¹¹ Ala aníng gár naa gooiím a tí, ma dinku'uumisaara' nee heé ta babay Krishaanmo, ala laatí inós a fuqusmo, laqaá qahusmo, laqaá heé munguaá hatlá' haratlintaatií', nee laqaá heé múk /ooslisliím, laqaá oonitusmo, laqaá fisusmo. Ala heé adoorí mu ya/aamara' tam tawa al/ayiinda' nee inós.

¹² Asma mukdá' kaáhh baraá múk kríshaanayhe aníng gár ngus sakwasleemuut a milá? Kuungá' sleeme múk ta sakwasleemuta' a kuduú baraá múk kríshaanáyheéke?

¹³ Ala mukdá' baraá múk kríshaanayhe kaáhh, heé gu sakwasleemuút a Mungú. Asma Gooi i kat, «Heé tlaákw hingeesaak baraá tla/angwhunge.»