1 Korinto 4 - Biblía Axweesantá Hhohho' ar Mungú 2004

Gadiyér Ya/abuuse

¹ Gawaá adoorihe hee atén ti tsaahhi adór atén tar sagadiyuusér Kristo nee saayuusér kangwdá' taa luú/ oo Mungú.

² Ala dír mukduú saayuuseero gár ta slai masók kin inkihhím.

³ Ala aninge a gaarooká aníng tam kuungá' i sakwasleemuta'a, laqaá tam múk hatlá' oo muu gu sakwasleemuút. Tam aníng sleeme ti kilooeé' sakwasleemuutaaká.

⁴ Asma baraá muunaáeene gár aníng i sakwasleemuut i káhh. Ala aníng ti gan'amií harafaariiká as adoodá' muunaáeé' iwa sakwasleemuutiiká. Ala heé aníng i sakwasleemuút an Aako.

⁵ Gawaá adoorihe hee mu gaanslár sakwasleemuutara', ay dír Aako nay hardihi. Inós muruudá' taa luú/ baraá giwti, ngun geehhooatis dír gwa/aátií alé, nee inslawoó munér muu nguri geehhoatis. Daqaní umuúqo heewo xirfuudá' inós wa hariím gu sláy dír Munguhe.

⁶ Hháe, diirihe aníng nee Apolo a slaqsaay dirhunge. Adoorí ana tleéhh as kuungá' kaangwí kuwa dirén wa intsahha', «Adoodá' Gooi i kat ma mawaara'.» Hee dirhunge miwa daar/án as daanduú intsaahhatusmooko oo hatlá' guri waaqaaqaa'.

⁷ Asma heé kuúng ugwa iia tleerees ta múk hatlae a heemá? Kuúng gár ta koon i deéro ar taa tawó sleeriiká dír Munguhe. Ala bar kuúng aga tawó sleér, ahaá ala, kuúng mas daara/aán adór heé gaa gaa tawó slayká?

⁸ Kuungá' aga qaroó axé'. Aga qaroó daqaari'ité'. Nee kuungá' waawuti'iima aga sleeré', ala atén a kahhaán. Ala geeraawo alók kuungá' masók an waawitá, asma daqaní atén a alwaawuti'iimaán nee kuungá'.

⁹ Asma án ngi slaá', ateéká' ya/abuuse, Mungú tina alhhe'eesáy qaás adór múk taa sakwasleemuút kuwa tsu/i. Asma atén a adór muruú ta laqaqan dír muu sleémeero, nee tam dír malayke sleeme.

¹⁰ Atén a daktana as Kristo. Ala kuungá' a múk sagalooár koóm baraá Kristowo. Atén ti daqeetlákw, ala kuungá' a /uuruú koondá'. Kuungá' tundu ilaiwawaa/, ala atén ti waaqaaqaa'.

¹¹ Tam ay hamí atén a qwariitaán, nee a waxiitaán, nee atén a /aankwets. Atén ti muux, slám maraay i koomanaaká.

¹² Nee slám a daawimiitaán ar gadiyeé kawa tlehhiitaan ar dabaarén awa kilá'. Muu barnaxes atén ti /ooslislín, atén inooín in tsuuqumaán. Atén barnaxes ti slahh'eemiis, a qiqtliimaán.

¹³ Laqaá barnaxes atén ti niqimis, atén axweesanoó hhó' un ki/imisán. Atén ana xwaansláy tleehhitaán baraá yaamuwo, nee tari adór slooroodá' ta hingeemisi, dír ilaá muu sleémeerowo. Adoorí an adór atén tay diriiaan tam hamí.

¹⁴ Muruuwí ngwa amorhúngií gooimiiká as nuwa murekemiis, ala nguna gooiím as kuungá' nuwa gurbuu', adór na/iieé' awa sla'aaruuse.

¹⁵ Asma intsaahhatuuserhúng baraá Kristowo tam ka yaariire, tam kumér mibaango, ala baabi'iihúng ki yaariireeká. Asma baraá Kristowo aníng ana baabuúhúng tleehhiít qoomár Ya/abtór hho' ngiwa amorhúngií huúw.

¹⁶ Gawaá adoorihe án kuungá' nu gurbuú', aníng na eehararé'.

¹⁷ Asma gaarí an gár Timoteo ngusa amorhúngií ya/aáw. Inós an garmaaeé' kuduú sla'aarusmo nee oo inkihhím baraá Aakoowo. Inós kuungá' nu inslawtis daanduú lohuueé' awa baraá Kristo Yesuwo, kudá' ni intsaahhatimis umuúqo diiro dír múk kríshaanayhe.

¹⁸ Bahh'alé baraá tla/angwhunge ta kaahi aníng ni amorhúngií daqawká, niri daara/uumitiyé'.

¹⁹ Ala aníng ni amorhúngií hardáh ar gaanslaay, bar Aako ngaa slaá'. Aníng binda hardáh, gár ni tsaahh, a axweesanoó mukdá' aa daar/uut kiloseeká, ala tam /uuruuín sleeme.

²⁰ Asma waawuti'iimár Mungú a axweesantooká, ala a /uuru.

²¹ Kuungá' gár ta sla'a' a milá? Aníng nin amorhúngií hardáha ar hhara, laqaá nin hardáh ar sla'aari nee ar muunuú tsatsa'areema?