1 Korinto 3 - Biblía Axweesantá Hhohho' ar Mungú 2004

Sagadiyuusér Mungú

¹ Ala hhaee'eé', aníng niwa axweés dirhúngií alé, aga aleeslawiiká niwa axwees ar adoodár /iisí nir axweemaamiis dír múk Qeeruú kooma. Ala ana dirhúngií axweés ar adoodá' nir axweemaamiis dír múk Qeeruú koomaakahe, nee ar adoodá' nir axweemaamiis dír na/aá ninakw baraá Kristowo.

² Án kuungá' nuna /aymiís ar ilwa, slám ar muruú /aymár gawdeneeká. Asma muruú /aymár gawdén u aleesleera'aaká. Nee tam hamí sleeme u aleesleera'aaká.

³ Asma tam hamí kuungá' a hotaatiindá' ar adoodár múk Qeeruú koomaaká ir hotaatin. Asma baraahunge da/i i deer, nee kaangaani. Gaarí gár i laqaaqaan a kuungá' heeuumarhúng tidár tlakweema an eeharahadá'aáke, nee an hotaatiindá'aáke ar adoodá' múk baraaká' yaamu ir hotaatin?

⁴ Asma baraahunge kooko i kaahi, «Aníng a heé Paulo», nee kuqá' i kaahi, «Aníng a heé Apolo.» Ala bar adoorí kuungá' a adór múk baraaká' yaamuúwoóke?

⁵ Ala Apolo a heemá? Nee Paulo a heemá? Atén a sagadiyuusér Mungú, nee kuungá' ana dirén wa haratlintié'. Asma umuúqo heewo direne gadiyeérós gana tleéhh ar adoodá' Aako ngira aténí.

⁶ Aníng ana dahaasiím. Apolo ma'aay gina eemiís. Ala heé aa ureemiis a Mungú.

⁷ Ala heedaádá' dahaasiím inós a gaarooká, laqaá tam kudá' ma'aá eemiís sleeme. Ala heé afhhamít a Mungú, kudá' ureemiís.

⁸ Heedaádá' dahaasiím nee kudá' ma'aá eemiís, inooín a gár wák. Nee umuúqo heewo bu'utuuwós gu sláy ar adoodá' ira gadiyuús.

⁹ Asma atén a sagadiyuuse, tidá' gadiyuus dinkwa nee Mungú. Kuungá' a qaymór Mungú, nee a doó Mungú.

¹⁰ Aleesleemuudá' Mungú naa amor'eénií haniís, aníng una ar gadiyuús, iihhafiirír hhoo' ngiri qaás, ar adoodá' tleehharusmoó do' ir tleehhimamiti. Nee heé hatlá' i gawaá iihhafiiridá' in tleehhiit. Ala umuúqo heewo adór ir gawaá iihhafiiridií tleehhiti ngi alqaytsiti.

¹¹ Asma iihhafiirír taa qaroó qaás a Yesu Kristo. Nee heé iihhafiirír hatlá' qaasaro ga aleesláw i kaahh.

¹² Ala hee bira tleehhiít gawaá iihhafiirirí aleeró, gár ira tleehhiít barnaxes a sahaábu, laqaá muqslár peésa, laqaá barnaxes a tlaa/aá tlaxo gawden, laqaá barnaxes a xaai, laqaá tsaaráy, laqaá barnaxes a slarhhí,

¹³ gadiyér umuúqo heewo i geehhoouúr. Asma Baalaadár Kristo gadiyér umuúqo heewo gan geehhooés ar baraá asla. Nee asltadá' gadiyér umuúqo heewo gari iiát áx a gadiyér adoomá.

¹⁴ Do'dá' hee aa tleéhh gawaá iihhafiiridá, bar asla gwa /agiká, heedá' bu'utu gu sláy.

¹⁵ Ala do' bar asla gwa /ák, heedá' bu'utu gu slayká. Inós kilós kuqo ba/amis, ala a adór heé naa baraá asltá wa /uy.

¹⁶ Kuungá' a xua'akáhe adór kuungá' tar Doó Mungú, nee adór Qeeruú Mungú ir baraahúng hoót.

¹⁷ Hee barnaxes Doó Mungú gwa hhitín, Mungú heedaádá' aqo gun hhitín. Asma Doó Mungú a Doó hhoohhoó'. Nee Doó Mungú an kuungá'.

¹⁸ Hee mitiwa kilós al/agín. Hee birti kilós harafadiit adór inós ir sagalooár kón, ar adoodá' múk baraaká' yaamu sagalooa ngir ga/ay, heewí gár kuwa hariím in ala daktu'uut, as masók daqaní sagalooaadár ló' ngiwa slay.

¹⁹ Asma sagalooár muu a daktu'uuma dír Munguhe. Asma Gooi i kat, «Mungú múk sageeloén gu ohaahín baraá al/aymar'ine.»

²⁰ Nee slám Gooi i malé kat, «Aako inslawoó múk sageeloén gu xuu' adór tar tawo.»

²¹ Gawaá adoorihe hee miwa daara/án as muu. Asma umuúqo gaaro a toohúng.

²² Paulo a koohúng, nee Apolo nee Kefa sleeme. Yaamu a koohúng, nee slafiingw, nee gwa'ara sleeme. Nee qoomaarí hám dáw a toohúng, nee tidá' hardaha sleeme.

²³ Nee kuungá' a múk Kristo, nee Kristo oo Mungú.