1 Korinto 2 - Biblía Axweesantá Hhohho' ar Mungú 2004

Heé ta alki/itaan a Kristoodá' taa kikií'

¹ Hhaee'eé', aníng qoomár niwa hardáh amorhúng i alé, nina hardáh as kángw naaqór Mungú nguwa alki/ituú aw. Ala ngwa alki/ituú awiiká as aníng tawa heé axweesanoó baál, laqaá sagalooár muu ngiwa ar axwees.

² Asma qoomár án niwa amorhúng i dirii', gár naa slaá' baraá muunaáeene a aníng masók gár hatlá' mawa xuú', ala a kángw Yesu Kristo kilós, ak alé kángw gwa'araarós ar gawaá msalaába.

³ Gawaá adoorihe aníng niwa hardáh, ti daqatlaákw ana daaraáx daeero.

⁴ Aníng axweesantá Mungú ngiwa amorhúng i alki/iít, aníng kuungá' naa afa /asliimiiká ar axweesantá sagalooár muu. Ala ngina alki/iít ar /uuruú Qeeruú Mungú.

⁵ As kahhó' haratlintaaorhúng masók i gawaá sagalooár mukooká, ala masók i gawaá /uuruú Mungú.

Sagalooár Mungú

⁶ Ala sagalooa i deer ar atén ta axweesaan dír múk aa kwa/i baraá slafíngw qeeruuwo. Ala sagalooarí atén ta axweesaan ti slasleeraaká nee sagalooár yaamuuká'. Slám ti slasleeraaká nee sagalooár mukdá' aleesleemuú koóm baraaká' yaamuwo. Asma inooín kaa qaroó sakwasleemuút kiwa qwaareesi.

⁷ Ala sagalooarí aníng ni axwees a sagalooár Mungú, tidá' taa luú/. Sagalooarí an tidá' Mungú aa iimír aáng wa tsawaár, qoomár yaamu kiwa tleehhiiká, as atén tiwa xirfuú i haniisi ar loohír sagalooarí.

⁸ Múk aleesleemuú koóm oo baraaká' yaamu sagalooarí gaa tsaahhiiká. Asma inooín geera bar sagalooarí ngaa xuiyé', geera alók Aakoó xirif ngwa kikii'ii'iiká.

⁹ Sagalooarí an tidá' Gooi iwa kat, «Gadá' taa baloó ariiká nee iltá hee, nee ar taa baloó axaasiiká nee iiár hee, nee slám ar hee aa baloó xuiiká baraá muunaáwose, gaarí an tidá' Mungú aa amohhe'eés as mukdá' inós gu slaá'.»

¹⁰ Muruuwí an kudá' Mungú naa dirénií geehhooatís ar loohír Qeeruuwós. Asma Qeeruú Mungú mura' sleémeero gu xuuxu'ún, tam muruudá' taa luú/ oo baraá muunuú Mungú i dirií'.

¹¹ Heé muruú baraá muunuú hee gu tsaáhh a heemá? A qeeruú heedaádáeéke, kudá' baraawós wa hoót? Gawaá adoorihe muruú baraá muunuú Mungú i dirií', heé gu tsaáhh i kaahh, aqo har Qeeruú Mungú kilós.

¹² Ala atén Qeeruú taa slawaán a qeeruú yaamuukaeeká, ala a Qeeruudá' amór Mungú daáhh, as atén masók muruudá' kuwa tsaahhaan oo Mungú naa diréní haniís ar qeemuuwós.

¹³ Qoomár atén kaangwí bur axweesaán, u axweesanaaká ar axweesanoó sagalooár muu, ala un axweesaán ar axweesanaydá' Qeeru naa atén i intsaahhatimís. Asma atén muruú Qeeru un axweesaán ar axweesanoó Qeeru.

¹⁴ Heé Qeeruú Mungú gu koomaaká, muruuduú Qeeruú Mungú gu ilaoohiiká. Asma muruudá' dirose a adór daktu'uuma nee slám tsaahharo gu aleeslayká. Asma muruudá' gár kur tsatsahhan a Qeeruú Mungú.

¹⁵ Ala heedaádá' Qeeruú Mungú gu koóm, inós mura' sleémeero tsaahharo gu aleesláy. Ala heé inós tsaahharo gu aleesláw i kaahh.

¹⁶ Asma Gooi i kat, «Heé muunuú Aako gu tsaáhh a heemá? Nee slám heé inós gu intsaahhatís a heemá?» Ala atén baraarene muunuú Kristo u koomaán.