1 Korinto 16 - Biblía Axweesantá Hhohho' ar Mungú 2004

ohme as múk Mungú

¹ Daanduú ohme as múk hhohhó' oo Mungú, kuungá' gár tunduwa hariím adoodá' án naa hara'ayiím dír múk kríshaanáy oo yaamaá Galatia an tlehhá'.

² Umuúqo deelór Jumapiíliro umuúqo heewo dirhunge gár kuwa hariím a ohmeedá' i haniisár wa slai gan baats, ar adoodá' inós ngir slaslay. Adoorí na tlehhahhitaak, as qoomár aníng binda hardáh, masók ohmeedá' an sangw iimu/uunda'aaká.

³ Muu tsawaaraak baraá tla/angwhunge, nee daqaní aníng binda hardáh, mukwí u ya/aáw nee barwá ay Yerusalemu, as ohmerhúng tisíng kawa huwi.

⁴ Barnaxes aníng sleeme gár tiwa hariím a an daqáw, daqaní inooín nee aníng ti alkoomaán.

Digir wakeetíngw aai

⁵ Aníng bara waaraáhh ar baraá yaamaá Makedonia, aníng niqo amorhúngií hardáh. Asma aníng a slaá' niwa waaraahh ar tla/ángw yaamaá Makedonia.

⁶ Ala án ngi slaá', aníng a ayaahúng wa hoót deelór niinawe, dooqa qoomaadár tsaaqwa sleémeerowo. Daqaní kuungá' aníng i alee/isá' niwa kumiit baraá aaieene, umuúqo didá' ni kawa.

⁷ Asma aníng a sla'aaká nee kuungá' tiwa araan hamihe, qoomaarí niwa tawó waaraahh. Asma aníng harahhifo a koóm ar nee kuungá' tawa alhootaan deelór niinawe, Aako birnga slaá'.

⁸ Ala aníng a meét baraá yaamaá Efeso ay qoomár Pentekoste.

⁹ Asma pa/ángw hhoó' kungwa haniís oo gadiyér ur ngiwa ló'wa tleehh, tam múk yaariír oo aníng i baqamiím i deero.

¹⁰ Ala Timoteo barnaxes naa hardáh amorhúng i alé, amohhe'eemisaak as miwa hoót ar dae. Asma inós a heé gadiyér Aakoó tlehhiít adór aníng wa alé.

¹¹ Gawaá adoorihe hee tumu wák inós munguwa waaqaá'. Alee/iisaak iwa kumiiti baraá aaiiwose ar wayda, as niwa hardihi amor'eé' ale. Asma aníng nee hhae inós un daamaaramaán.

¹² Ala daanduú hhiyaarén Apolowo, aníng inós una ló'wa harhheehhe'eés, as niwa amorhúng kay dinkwa nee hhaeedaá hatlá'. Ala inós gaa slaiiká niwa daqay hamihe. Ala pa/aangw burngwa sláy, ni amorhúngií hardah.

/Ayma'aá alhhe'eesaay

¹³ Kuungá' dalaaé', sihhitano hhe'eesé' baraá haratlintaaorhunge. Kuungá' masók a gurkwa/á', nee masók a múk /uuruú koóm.

¹⁴ Muruuhúng sleémeero tlehhiitaak ar baraá sla'aari.

¹⁵ Nee slám hháe, kuungá' kángw múk doó Stefana u xuá' inooín taa giirín haratlintaaooro baraá yaamaá Akayaro. Nee slám inooín taa haniisiyé' múk hhohhó' oo Mungú nguwa sagadiyuusiya'.

¹⁶ Kuungá' geeraharu'uumár múk adór kwí naa eeharaak, nee ar umuúqo heewo oo gadiyér tleéhh nee oo ti daawiitimiís dinkwa nee inooín.

¹⁷ Aníng a qwalalaá/ asma Stefana nee Fortunato nee Akaiko naa amoorí hardihiyé'. Asma gadaádá' aníng iga wa /aaruur as adoodá' kuungá' tawa kahha', inooín ngaa haniisiyé'.

¹⁸ Asma muunaáeé' ngwa kwa/asiyé', nee tam munerhúng sleeme. Múk adór kwí inslaslaango i harín.

¹⁹ Múk kríshaanáy oo baraá yaamaá Asiár i dirií' kuungá' nu intsihhiimiis. Kuungá' tundu ló'wa intsihhiimiis ar baraá Aako nee Akila nee Priska dinkwa nee kríshaanáydá' ti baraá dooíní dogaagiít.

²⁰ Hhae sleémeero kuungá' nu intsihhiimisiyá'. Kuungá' ti intsihhiimise' ar ma'amisuudá' hhohhó'.

²¹ Anuú Paulo intsihhiisantí ar diirí ana gooiím ar dakw'eé' oo kilá'.

²² Umuúqo heewo oo Aako gu sla'aaká, inós ku lu'usi. Maran ata, gídaabárós: Aakoorén, hardaháng.

²³ Tsuuqaá Aako Yesu masók i dinkwa nee kuungá'.

²⁴ Sla'aarir'eé' masók i dinkwa nee kuungá' sleémeero ar baraá Kristo Yesuwo.