1 Korinto 15 - Biblía Axweesantá Hhohho' ar Mungú 2004

Waasle/uú Kristo

¹ Hhaee'eé', hám daxta aníng kuungá' nu inslawtís kángw Ya/abtoodá' hho' naa dirhúngií alki/iít. Kuungá' Ya/abtoodá' hho' kari ilaoté', nee slám tari baraá Ya/abtoodá' hhó' wa kumité'.

² Slám kuungá' tundu ba/amis ar Ya/abtoorí, barnaxes aga kumité' Ya/abtoorí hho' kawa haratlintia' ar adoodá' aníng ngira dirhúngií alki/iít. Ala bar adoorír kumita'aaká, kuungá' daqaní ana tawó haratlintié'.

³ Kaangwí afhhamít aníng una ilaóh nguri kuungá' i oó'. Kaangwí an kwí, Kristo ina gwaá' as tlakweemaarén, ar adoodá' Gooi i kat,

⁴ nee kuri foól, nee bál tame iri waasleé/ ar adoodá' Gooi ngir kat,

⁵ nee Kefa guri harati'iít, nee aluuwo tam kudaádá' mibaá nee tsár.

⁶ Aluuwo hha'aá dinkwárí diriiá' awa tsiire kooane waarahhá' giri harati'iít. Awa yaariir baraá tla/angw'ine tam hamí i slafiyá', ala bahh'alé naa qatliyé'.

⁷ Aluuwo Yakobo guri harati'iít, nee aluudae tay ya/abuuse sleémeero.

⁸ Alaá mukwí sleémeerowo aníng iri harati'iít, ala aníng tam a adór na/oó taa laqwaali oo qooma gaa ayká.

⁹ Asma aníng a heé niiná dír ya/abuuseero. Slám a hariimaaká tiwa babay ya/abusmo, asma aníng múk Mungú una slahh'eemiís.

¹⁰ Ala gár aníng nis adoorí dirii' a tsuuqaá Mungú. Slám tsuuqaawós kuká' naa aníngí haniís a tawoorooká. Ala aníng gadiyeé ana ak tleéhh ta kudá' hatlá' sleémeerowo. Ala heé gaa tleehh a aningeeká, ala a tsuuqaá Mungú kudá' dinkwárí diriia' nee aníng.

¹¹ Ala barnaxes a aníng, laqaá barnaxes a kudaá hatlá', adoorí an adoodá' ta alki/iitaan, nee an adoodá' kuungá' ta haratlintaia'.

Waasle/uurén

¹² Ala bar kaangwí Kristo niwa waasleé/ baraá múk aa qaátl wa alé ku alki/iit, ahaá, baraahunge bahh'alé mas ta kaahi, waasle/uú múk aa qaatl i kaahh.

¹³ Ala barnaxes waasle/uú múk aa qaatl i kaahh, Kristo sleeme aa waaslee/iiká.

¹⁴ Nee Kristo bira waaslee/iiká, alki/ituurén oo Ya/abtór hho' kawa alki/itaan a tawo, nee haratlintaaorhúng sleeme a tawo.

¹⁵ Nee slám bar adoosíng, atén sleeme a adór lamabu'uusér Mungú ar lamuuse. Asma atén Mungú una lamabu'uumaán adór inós Kristo ngura waaslee/atís, ala laatí gwa waaslee/atisiiká, barnaxes kangwhúng kwisíng oo ló' oo múk aa qaatl iwa waaslee/iiká.

¹⁶ Asma múk aa qaatl barnaxes i waaslee/iiká, Kristo sleeme aa waaslee/iiká.

¹⁷ Ala Kristo barnaxes aa waaslee/iiká, haratlintaaorhúng a tawo, nee kuungá' a baraá tlakweemaahúng i kahhá'.

¹⁸ Nee barnaxes a adoorí, mukdaádá' aa qaatl oo Kristo gwa haratlintii', inooín daqaní taa hhán.

¹⁹ Atén harahhifoorén tidá' Kristo kuwa harahhifaán barnaxes ar slafingwí kilós, atén daqaní a múk liitlakwén ta múk hatlá' sleémeerowo.

²⁰ Ala looeema a kuká', Kristo aa waasleé/ baraá múk aa qaátl wa alé. Inós a bu'ungwdá' aa giirin oo mukdá' aa qaatl.

²¹ Asma adoodá' gwa'ara kingira huúw nee hee, tam waasle/uú múk aa qaatl sleeme kunguna huúw nee hee.

²² Asma adoodár muu sleémeero ir qatlatlin baraá Adamuwo, adoorí an adoodá' muu sleémeero kur waaslee/atisi baraá Kristowo.

²³ Ala umuúqo heewo nee qoomaarós. Kristo an bu'ungwdá' aa giirin. Nee gár aluudá' gi haar a mukós, qoomár inós binda kií/.

²⁴ Daqaní alhhe'eesaay nay hardah. An qoomár Kristo waawuti'iima ngiwa amór Mungú Baabá i haniisi, alaá waawuti'iima sleémeero binga hhaamiís, nee aleesleemu sleémeero, nee /uuruuwo.

²⁵ Asma Kristo gár kuwa hariím aqo in waawuti'ín ay dír Mungú wakuuseerós ngay gawaá dabaawós i qaasi.

²⁶ Wakusmoó alhhe'eesaay oo ta hhaamisi a gwa'ara.

²⁷ Asma Gooi i kat, «Mungú mura' sleémeero gway baál, gway gawaá dabaá Kristó i qaás.» Ala gooirí iwa kat, «Mura' sleémeero kwa gawaá dabaawós i qaás», gaarí ka geehhoo' adór Mungú ir kaáhh baraá muruudá' sleémeerowo. Asma Mungú an kudá' mura' sleémeero gwa baal guri qaás gawaá dabaawós i alé.

²⁸ Ala mura' sleémeero burkwa hhe'eés qaasaro gawaá dabaá Garma, daqaní Garma sleeme ti kilós qaas baraá dabaá Mungú. Asma Mungú an kudá' mura' sleémeero gwa gawaá dabaá Garmá i qaas, as masók Mungú iwa mura' sleémeero tleehhiti baraá muu sleémeerowo.

²⁹ Asma mukko i deer oo ta baatimiisi as múk aa qaatl. Ala adoorí barka tleéhh, mukdá' aa qaatl gár kuwa alee/iisi a milá? Asma mukdá' aa qaatl barnaxes iqo waaslee/iiká, mukwí gár kus baatimiisi as inooín a milá?

³⁰ Nee atén awa kilá' gár tas baraá tsaxwií darahaan a milá umuúqo daqto?

³¹ Hhaee'eé', kuungá' a xuá' adór aníng tir aleesláw tiwa xirfayeemiis as kuungá' ar baraá Kristo Yesu Aakoorén. Ala kaangwí oo ló'. Adoorí bar ar ló', kaangwí sleeme oo ló' oo aníng umuúqo deelooro niwa baraá tsaxwaá gwa'arár i dirii'.

³² Baraá gixsár Efesowo ana slaáqw nee makaá xaraaslá'. Ala qoomaadae bar ana slaáqw as heeuumar'eé', gár geeraawo ni slaw a milá? Barnaxes múk aa qaatl i baloó waaslee/iiká, «Gimsé', an /ayiimaán nee an wahaamaán, asma matlo a qatlaán.»

³³ Kuungá' miti kiloohúng al/agiimaara', «Asma mulqér tlakw i tlehhema'aá hhó' hhitiín.»

³⁴ Daarkiité' baraá oonitimerhunge, nee fuqurangwhúng ar gadiyuusaak, slám tlakweema mi tlehhiitara'. Asma kuungá' bahh'alé Mungú u xua'aaká. Aníng adoorí an káh as kuungá' nuwa mureekees.

Slaqwtadá' waaslee/

³⁵ Ala heeko i yaahaas, «Adór múk aa qaatl kur waaslee/atisi a adoomá? Slaqwaá ni slaya' a slaqwaá adoomá?»

³⁶ Kuúng a daktani! Gadaádá' taa dahás i ti'itká bar aa ala gwaiká.

³⁷ Kuúng bar dahaasiín, gadaádá' ta dahaasiin a tidaádá' aa ureeriiká, ala a ilmo kilós, daqtakaaro laqaá ilmoó angaáno, laqaá ilmoó balángw hatlá'.

³⁸ Ala Mungú ilmoodá' gun slaqwtá i hanmiis ar adoodá' i slai. Umuúqo balaaliro slaqwtá i sleer a tidár da'awtós.

³⁹ Fu'unaay sleémeero a wakeeká. Fu'unaay bahh'alé awa muu, kookaari awa makaay, kookaari awa tsir/o nee kookaari awa siyó.

⁴⁰ Nee slám slaqwaá gawaá doori i dayá', tam slaqwaá baraá yaamu i dayá' sleeme. Ala slaqoodaá gawaá doori nee kudaá baraá yaamu xirfuuín a dimbadimbé.

⁴¹ Tsee/amá i gwa/aateemaawós kón, nee slahhaangw gwa/aateemaawós a hatlá', nee slám tsatse/ gwa/aateemaawós a malé hatlá'. Nee tam tsatse/ gwa/aateemaaín ti alkon'aaká.

⁴² Waasle/uú múk aa qaatl sleeme an adoorí. Slaqwa kan baraá hhapérí fool adoodár ilmo kur dahaasi. Slaqwtadá' taa foól a slaqwtá hhitiruut, tidá' waaslee/ a slaqwtadá' hhitiruutaaká.

⁴³ Slaqwtadá' taa foól a tidá' murér koom, tidá' waaslee/ a slaqwtadá' xirfuú koom. Slaqwtadá' taa foól a tidá' daqatlaakw, tidá' waaslee/ a slaqwtadá' /uuruú koom.

⁴⁴ Slaqwtadá' taa foól a tidá' hee kura tleéhh, tidá' waaslee/ a slaqwtá qeeru. Ala bar slaqwtadá' hee kura tleéhh i deer, slaqwtá qeeru i deer sleeme.

⁴⁵ Adoorí an adoodá' Gooi i kat sleeme, «Heeduú geera, Adam, inós kuna slaqwtá slaáf i haniís.» Ala Adamuduú alhhe'eesaay inós aa Qeeru tleehhiít, kudá' slafíngw hanmiís.

⁴⁶ Ala slaqwtadá' ar qeeru, inós i giiriindaaká, ala slaqwtadá' hee kura tleéhh in giiriín, aluuwo tidár qeeru niri hardát.

⁴⁷ Heé geera dír i dahhi a baraá yaamu, gár kura tleéhh a hhape. Ala heé tsár dír i dahhi a gawaá doori.

⁴⁸ Mukdaádá' taa tleéhh ar hhape, inooín aa slaqás nee heedaádá' taa tleéhh ar hhape. Ala mukdaáduú gawaá doori, inooín aa slaqás nee heedaáduú gawaá dooraá daáhh.

⁴⁹ Adoodá' atén tar slaqás nee heedaádá' taa tleéhh ar hhape, adoorí an adoodá' sleeme atén tir slaqsi nee heedaádá' gawaá dooraá daáhh.

⁵⁰ Hhaee'eé', gár án ni kah a tí, slaqwtadár baraaká' yaamu, tidá' taa tleéhh ar fu'unaay nee tseere, waawuti'iimár Mungú ga alká. Slám tidá' hhitiruut muruú hhitiruutaaká gu alká.

⁵¹ Ga/aawaagáy, aníng gár lu/aaráy ngi dirhúngií oó'. Atén sleémeero a qatlanaaká, ala atén sleémeero ti warqees

⁵² ar gaanslaay adór kwisliitár ila, qoomár tarumbeétadár alhhe'eesaay bira /á/. Asma tarumbeéta iqo /á/, nee múk aa qaatl kuri waasle/atis, tari múk qatlaaká baloó ale, nee atén sleeme tiri warqees.

⁵³ Asma slaqwtí hhitiruut gár kawa hariím in warqeér tawa slaqwtá hhitiruutaaká. Nee slaqwtí gwagwa'aam gár kawa hariím in warqeér tawa slaqwtá gwagwa'aamaaká.

⁵⁴ Ala slaqwtí hhitiruumiit qoomár bira warqeér tawa slaqwtá hhitiruutaaká, nee slaqwtí gwagwa'aam qoomár bira warqeér tawa slaqwtá gwagwa'aamaaká, daqaní axweesantí Gooi i kat aa bó/, tí kah, «Gwa'ara kaa guú/, arba/ati kaa sláy.»

⁵⁵ «Xáy, Gwa'ára, arba/atirók i amá? Xáy, Gwa'ára, slahh'eemisuuwók i amá?»

⁵⁶ slahh'eemisuú gwa'ara a tlakweema, nee /uuruú tlakweema a hara'aya.

⁵⁷ Ala Mungú ku sluufmiisi, kudá' arba/ati ngaa haniis ar loohír Aakoorén Yesu Kristo.

⁵⁸ Gawaá adoorihe, hhaee'eé' awa sla'aaruúse, kuungá' gawduwé', ma daaraaxaatara', kumiité' ló'wa alé baraá gadiyér Aakoowo umuúqo daqto. Asma kuungá' a xuá' baraá Aakoowo gadiyérhúng tidá' ta tlehhahhita' a taworooká.