1 Korinto 14 - Biblía Axweesantá Hhohho' ar Mungú 2004

Muruú hatlá' daanduú aleesleemuú Qeeruú Munguhe

¹ Kuungá' sla'aari ló'wa leelehhiitaak. Nee aleesleemuú Qeeru sleeme leelehhiitaak, kawa ure aleesleemuú tawa aaririinda'.

² Asma heedá' axweemamiís ar tsifrír xuawasl, inós i axweesiiká dír múk i alé, ala in axwees dír Mungú. Asma inós heé gu axamiís i kaahh. Inós muruú i axweesi a muruú lu/aaráy. Inós muruuwí gun axwees ar /uuruú Qeeruú hhoohhoó' oo Mungú.

³ Ala heé aaririím, inós dír i axweesi a dír muu, muu guri kwa/amis baraá haratlintaaor'ine nee guri gurbu'ún nee guri gurkwa/amis.

⁴ Heedaádá' axweés ar tsifrír xuawasl tin kilós kwa/amis baraá haratlintaaoorose. Ala kudá' aaririím, inós i kríshaanoó kwa/amis.

⁵ Aníng gár ni slaa' masók kuungá' sleémeero an axwesá' ar tsifrír xuawaslen, ala a ak slaá' kuungá' tawa aaririinda'. Asma heé aaririím ku ak úr ta kudá' axweesa ar tsifrír xuawasl, aqo har heedaádá' tsifrír xuawasl ga ar axweés barnaxes tsifriidá' ngaa ilaharmiís, as kahhó' kríshaanáy kuwa kwa/amisi.

⁶ Ala daxta, hhaee'eé', aníng barnaxes naa amorhúng i hardáh, niri axweés ar tsifrír xuawasl, gár kuungá' ta sleera' dir'eene a milá? Gár kuungá' ta sleera' i káhh, aníng barnaxes naa dirhúngií axweesiika ar geehhooeemaá, laqaá axweesantá xu'uti, laqaá aari, laqaá intsaahhatimis.

⁷ Tam xooslaadár daa'aangw a adoorí sleeme. Filiímbi laqaá mariímba barnaxes afór dimbadimbé gara daiká ar geehhooeema, daa'angwdá' aa dá' adór kur tsaahhi a adoomá?

⁸ Nee tarumbeéta barnaxes aa /a/iká ar afoodá' axaasa hho', heé ti amohhe'eés slaqwaraaro a heemá?

⁹ Axweesanayhúng sleeme an adoorí. Asma axweesanaydá' ta oiinda' ar tsifrír xuawaslen burku geehhooeeká, muu adór ngur tsaahhi? Kuungá' daqaní a adór múk sla/atí axweés.

¹⁰ Tsifrír yaariir baraaká' yaamuwo i deer, ala umuúqo tsifriiro ar adoorós koomaaká i káhh.

¹¹ Ala aníng barnaxes afór tsifriidá' a xuaaká, aníng a adór heé tsifir hatlo dír heedaádae, nee inós a adór heé tsifir hatlo dir'eene sleeme.

¹² Kuungá' sleeme an adoorí. Kuungá' aleesleemuú Qeeru un ló'wa leelehhitá'. Gawaá adoorihe kuungá' aleesleemuuduú Qeeru ak leelehhaak, kudá' múk kríshaanoó kwa/amís.

¹³ Gawaá adoorihe heé axweés ar tsifrír xuaawasl, inós i firin as aleesleemuú tsifriidá' ngiwa ilaharmisi nguwa slay.

¹⁴ Asma aníng bara firiím ar tsifrír xuawasl, qeeruueé' i firiirín, ala fuqurangw'eé' gár i slaslay i káhh.

¹⁵ Adór ni laaq ala a adoomá? Aníng a firiím ar qeeru, ala an firiím ar fuquraangw sleeme. Aníng an daá' ar qeeru, ala an daá' ar fuquraangw sleeme.

¹⁶ Asma barnaxes kuúng a Mungú xirfayeemís ar baraá qeeru, heé adoosíng xuaaká, inós adór ir ooi «Amin» a adoomá, barnaxes inós axweesanaydá' gwa tsaahhiiká?

¹⁷ Kuúng tam firoorók tidár sluufmis ka hhoe, ala heeduú hatlá' gár aa sláy i káhh.

¹⁸ Aníng Mungú u sluufmiís, asma aníng a ló'wa axweemaamiís ar tsifrír xuawaslen ta kuungá' sleémeerowo.

¹⁹ Ala dír dinkwár kríshaanayhe aníng a slaá' /ayma'aá kooán ngiwa oo' ar fuqurangw'eé', as múk hatlá' nguwa intsaahhatis, ta /ayma'aá kumuú wák ngiwa ooa awa tsifrír xuawaslen.

²⁰ Hhaee'eé', kuungá' masók a adór na/aá ninakweeká baraá fuqureerihunge. Baraá muruú tlakwe kuungá' masók a adór na/aá ninakw, ala baraá fuqureerihunge kuungá' masók a múk urén.

²¹ Baraá hara'ayár Mosewo kaa gooín, «Aako i kaahi, ‹Aníng an axweés dír mukwí i alé ar tsifir hatlo nee ar tsifrír múk hatlá', ala tam adoorihe inooín aníng i iiárií qaasiaaká.› »

²² Gawaá adoorihe, aleesleemuú Qeeru oo hee iwa axweesi ar tsifrír xuawaslen dír mukdá' aa haratlintii'iikahe, a laya, ala dír mukdá' aa haratlintii'i a layaarooká. Ala aleesleemuú Qeeru oo hee iwa aariirin, a laya dír mukdá' aa haratlintii'i, ala dír mukdá' aa haratlintii'iikahe a layaarooká.

²³ Laqaá an ooaan, kríshaanáy sleémeero bira burumburiít, nee sleémeero barta axwees ar tsifrír xuawaslen, aluuwo múk adoodá' xuaaká, laqaá múk aa haratlinti'iiká, bar naa dáh, ta ooiikáhe mukwí a daktana?

²⁴ Ala sleémeero barnaxes tan aariirín, aluuwo heé aa haratlintii'iiká, laqaá heé adoodá' xuaaká, bar naa dáh, inós ti kilós tsaáhhiíke, ar /aymi'iidá' aa axaás, nee slám /aymi'iidá' sleémeero inós ngu sakwasleemuutíaáke?

²⁵ Lu/aaroó muunaáwós iri geehhooúy. Inós daqaní Mungú guri i tumbarara'aat, guri sluufmiis, iri ooi, «Ar ló', Mungú i baraá tla/angwhúngií dirii'.»

Mura' sleémeero tleehhaak ar digir wakeetiingw

²⁶ Ala hháe, adór ta laqa' a adoomá? Qoomár kuungá' bar aga burumburité', umuúqo heewo dirhunge barnaxes i daa'ángw kón, laqaá axweesantá intsaahhasa, laqaá axweesantá taa amoorós i geehhooeés, nee laqaá axweesantá tsifrír xuawaslen, laqaá ilaharmisuú axweesantadá', masók muruuwí sleémeero in tleehharuut as múk kríshaanáy kuwa kwa/amisi.

²⁷ Ala muu bir deer oo axweés ar tsifrír xuawaslen, múk tsár, laqaá múk tám ku pa/ángw i haniisi, ala oo hatlá' pa/aangw munguwa sláy. Slám barta axwees ti wakeetine'. Nee heé wák axweesantadá' ngi ilaharmiisi.

²⁸ Ala heé ilaharmiisuú aleesláw bir kaahh, heedá' axweés ar tsifrír xuawasl i xasliiti baraá dinkwár kríshaanayhe, ala i kilós axweesi baraá muunaáwós i alé, nee dír Mungú.

²⁹ Múk tsár laqaá tám i aariirine, nee múk hatlá' aaridá' ngi alqaytsiti.

³⁰ Ala heé hatlá' oo aa iwiit, barnaxes axweesani kaa dirós i geehhoatís, heedaáduú geera i xasliiti.

³¹ Gawaá adoorihe kuungá' sleémeero a aleesleerá' tawa aaririinda' ar wakeetiingw as kuungá' sleémeero intsaahhasa kawa sleera' nee gurkwa/asa.

³² Slám aleesleemuú Qeeru oo hee iwa aariirin, aleesleemuuwí ku baal nee heedaádá'.

³³ Asma Mungú a Munguú leexwaywooká, ala a Munguú wayda. Ar adoodá' múk hhohhó' oo kríshaanáy i tlehhahhiti umuúqo diiro,

³⁴ tam ayahunge sleeme /ameena i xaslit baraá dinkwár Krishaanayhe, asma ya/aám i káhh ar inooín iwa axweesiya', ala gár kiwa hariím masók in ilaiwawa/iyá', adoodá' hara'ayár Mose i kat sleeme.

³⁵ Inooín garka barnaxes ngi xu'utír wa slaiyá', hhawaateeín ngi yaahamisiye' dír maray'ín wa alé. Asma a gár murér koom /ameeni iwa axwes baraá dinkwár kríshaanayhe.

³⁶ Xáy, kuungá' ka xua' axweesantá Mungú amór i dahh a amorhúnge? Laqaá a kuungá' kiloohúng nuna i hardáti?

³⁷ Hee barnaxes ti kilós tsatsahhán iwa kaahi, «Aníng a aarusmo», laqaá, «Aníng a heé aleesleemuú Qeeru gu koóm», inós gár kuwa hariím axweesanay'eé' kwí naa dirhúngií gooiím masók gun tsaahh adór tar hara'ayár Aako.

³⁸ Ala heé kaangwí gu gaárií xuaaká, inós sleeme mukuwa hhasliít nee hee.

³⁹ Gawaá adoorihe, hháe, aleesleemuú Qeeru ló'wa leelehhiitaak, kuduú aaru'uuma, nee slám hee mu ila/aamara' iwa axweesi ar tsifrír xuawasl.

⁴⁰ Ala mura' sleémeero i tleehharuumiti ar hhohhoaari nee ar digir wakeetiingw.