1 Korinto 12 - Biblía Axweesantá Hhohho' ar Mungú 2004

Aleesleemuú ta hanmiisi nee Qeeruú hhoohhoó' oo Mungú

¹ Hhaee'eé', gár án ni slaa', kuungá' kángw aleesleemuú ta hanmiisi nee Qeeruú hhoohhoó' oo Mungú masók un xuá'.

² Kuungá' a xuá', qoomár kuungá' tawa pakaanáy. Qoomaadae kuungá' ana ya/aandé' tunduwa huwahuwi nee mungi'iidá' afe waslen, kudaá murslaaqat, adoodá' kuungá' tundura geeraharahaár.

³ Gawaá adoorihe án kuungá' nu xu'utís hee i kaahh oo axweés ar baraá Qeeruú hhoohhoó' oo Mungú oo káh, «Yesu ku lu'usi.» Nee slám heé taa geerahariiká nee Qeeruú hhoohhoó' oo Mungú, ga aleeslayká iwa ooi, «Yesu a Aako.»

⁴ Aleesleemuú dimbadimbé oo Qeeru i deer, ala Qeeru a wak.

⁵ Nee slám gadiyér dimbadimbé i deer, ala Aako a wak.

⁶ /Uureemaá dimbadimbé awa gadiyuusá' i dayá', ala Munguúdá' gadiyeédá' sleémeero ga tlehhahhiít, inós a wak.

⁷ Ala aleesleemuuduú Qeeruú hhoohhoó' oo Mungú gu geehhooeemiís, ku hanmiis dír umuúqo heewo ar adoodá' alee/isoó huwahuuw dír múk kríshaanayhe.

⁸ Asma heé wák aleesleemuú axweesantá sagalooa gun sláy ar Qeeru, nee kuqá' aleesleemuú axweesantá xu'uti gun sláy ar Qeeruuduú kilá'.

⁹ Nee oo hatlá' aleesleemuú haratlintaao gun sláy ar Qeeruuduú kilá', kuqá' aleesleemuú hungu/umis gun sláy ar Qeeruuwí wák.

¹⁰ Nee oo hatlá' aleesleemu gun sláy oo muruú waa/oo/amo nguwa tlehhiiti. Kooko aleesleemu gun sláy oo iwa aariirin. Oo hatlá' aleesleemu gun sláy oo qeeruú dimbadimbé nguwa tsatsahhan. Nee kooko aleesleemu gun sláy oo iwa axweesi ar tsifrír dimbadimbé ar xuawaslen, nee oo hatlá' aleesleemu gun sláy oo tsifridá' ngiwa ilaharmiisi.

¹¹ Heé muruuwí sleémeero gu tleéhh a Qeeruú Mungú kudá' wák kilós. Qeeru aleesleemu gun hanmiis dír umuúqo heewo ar adoodá' i slai.

Slaqwa a wak diqiya' ki yaariir

¹² Slaqwtá hee a wak, ala i diqoó yaariír koón. Ala diqaywí tam ku yaariire, sleémeero burkwa haragaás an slaqwtá wák kilós. Adoorí an adoodá' Kristo sleeme i dirii'i.

¹³ Asma atén bahh'alé a múk Yahudi, bahh'alé a múk Yunani, kookaari a lawaale, nee kookaari a lawaaleerooká. Ala atén sleémeero tina baatimiís ar Qeeruudá' wák as tawa slaqwtá wák tleehhitaan. Nee slám atén sleémeero tina wahaás ar Qeeruudá' wák.

¹⁴ Slaqwtá hee a diqtá wakeeká, ala a diqiyaá yaariir.

¹⁵ Yaae bira ó', «Aníng ar slaqwtooká asma aníng a dakooká,» xáy, yaae ar slaqwtookáhe as adoorí?

¹⁶ Nee iia bira ó', «Aníng ar slaqwtooká asma aníng a iltooká,» xáy, iia ar slaqwtookáhe as adoorí?

¹⁷ Ala slaqwa sleémeero geera barnaxes a ila kilós, geeraawo adór tar axamiisi a adoomá? Nee slám slaqwa sleémeero geera barnaxes an iia kilós, geeraawo adór tar tsaa'amin a adoomá?

¹⁸ Ala Mungú umuúqo diqto gana gawaá slaqwtá i qaás ar adoodá' inós aa slaá'.

¹⁹ Diqaay sleémeero geera barnaxes a diqtá wák kilós, geeraawo slaqwa i amá?

²⁰ Ala hám daxta diqaay ku yaariír, ala slaqwa inós a wak.

²¹ I ya/aandaaká ila dawa nguwa beer, «Án kuúng gár uwa yaahamiis i káhh.» Nee slám i ya/aandaaká saga ya'a' ngiwa bay, «Án kuungá' gár nuwa yaahamiis i káhh.»

²² A adoosingeeká, ala a adoorí, diqaydá' geera ta xui tawa diqiyaá ak daqeetlakwen, an kudá' ak afhhamít.

²³ Nee diqayduú slaqwa, kudá' geeraawo ta gaárií xuanaaká, an kudá' ta ak afhhamít. Nee diqaydá' ta samuruumitaan, an kudá' ta ak amohhe'eemisaan ar ilaiwa/ame.

²⁴ Ala diqaydá' ta samuruumitaanaaká, gár kus adoorír amohhe'eemisaan i káhh. Ala Mungú slaqwa gaa haragaás ar adoorí, «Diqito'oodá' aa /aaruur gaa ak ilaiwa/amér i haniís.»

²⁵ Asma tlaampa'aamis pa/aangw munguwa sláy baraá slaqwto, ala diqaay ti amohhe'eemaamisi umuúqo diqto nee diqito'ór hatlá'.

²⁶ Nee diqito'ór wák barnaxes aa slahhá', diqaay sleémeero aa slahhaá' dinkwa nee diqito'oodá'. Ala diqito'ór wák barnaxes kaa xirfayeés, diqaay sleémeero i qwalalaa/ dinkwa nee diqito'oodá'.

²⁷ Gawaá adoorihe kuungá' a slaqwtá Kristo, nee umuúqo heewo dirhunge a diqito'ór wák gawaá slaqwtihe.

²⁸ Baraá tla/ángw kríshaanayhe Mungú muu bahh'alé guna qaás. Múk geera a ya/abuuse, múk tsár a kuduú aaruuse, múk tám a intsaahhatuuse. Múk aluudá' a kudá' aleesleemu gu koóm oo muruú waa/oo/amo nguwa tlehhiiti. Nee slám múk aluudá' a mukdá' aleesleemu gu koóm oo tiqtuuse kawa hungu/umiisi, nee kudá' aleesleemu gu koóm oo muu kuwa alee/iimisi. Nee oo hatlá' a mukdá' aleesleemu gu koóm oo muu kuwa geeraharaahari, nee oo hatlá' a kudá' aleesleemu gu koóm oo tawa axweesi ar tsifrír dimbadimbé ar xuawaslen.

²⁹ Xáy, sleémeero a ya/abuuseéro? Laqaá sleémeero a aaruuseéro? Laqaá sleémeero a intsaahhatuuseéro? Nee slám sleémeero i muruú waa/oo/amór tlehhiitiía?

³⁰ Nee sleémeero aleesleemu ngu kón'a oo tiqtuuse kawa hungu/utimisi? Nee slám sleémeero ta axweési ar tsifrír xuawaslen? Nee sleémeero tsifriirí ka ilaharmiísi?

³¹ Ala kuungá' aleesleemuudá' ak afhhamít na leelehhiitaak. Nee aníng loohír ak hhoo' ngi kuungá' i laqaám.