1 Korinto 11 - Biblía Axweesantá Hhohho' ar Mungú 2004

¹ Aníng na eehararé', adoodá' aníng Kristo ngur eeharahar.

Tuntukúngw sage baraá saaliingo

² Aníng kuungá' nu xirfayeemiís as adoodá' kuungá' aníng iwa inslasleeré' baraá umuúqo gaaro, nee muruudá' sleémeero aníng naa dirhúngií intsaahhatimís ugwa eehadé'.

³ Ala aníng a slaá' kuungá' kawa xua' adór Kristo tar ságw umuú hhawaata, nee hhawaata an ságw hareerós, nee Mungú an ságw Kristo.

⁴ Umuúqo hhawaatuuwo barnaxes sagós gwa tuuntuúk, qoomár bir firiirín, laqaá qoomár bir ya/abtór amór Mungú daáhh axwees, inós sagós gun mureekeemiis.

⁵ Ala umuúqo /ameeniiro barnaxes sagós gwa tuntukká, qoomár bir firiiriín, laqaá qoomár bir ya/abtór amór Mungú daáhh axwés, inós sagós gun mureekeemís. Asma adoorí binga tléhh, inós a adór /ameenír taa saga deéqw.

⁶ Asma bar /ameeni sagós tuntukaro gu sla'aká, se'eengós burku tsati ku hhoó'. Ala barnaxes a gár murér koom /ameeni se'eengós nguwa tsat, laqaá sagós kuwa deeqwi, inós sagós ngu tuntuk.

⁷ A hariímaarooká hhawaata saga nguwa tuntuuki, asma inós a slaqsoó Mungú nee xirfuú Mungú. Ala /ameeni inós a xirfuú hhawaata.

⁸ Asma hhawaata kwa tleehhiiká ar /ameeni, ala /ameeni kana tleéhh ar hhawaata.

⁹ Nee slám malé alé hhawaata kwaa tleehhiiká as /ameeni, ala a /ameeni kana tleéhh as hhawaata.

¹⁰ Gawaá adoorihe /ameeni gár kawa hariím masók sagós gun tuntukuún as kawa laqan adór inós kar baliít. Adoorí ngi tlehhit as malayke.

¹¹ Ala baraá Aakoowo /ameeni a gaarooká bar hhawaata i kaahh, nee slám hhawaata a gaarooká /ameeni bir káhh.

¹² Asma adoodá' /ameeni kara tleéhh ar hhawaata, hhawaata sleeme kuna laqwaál nee /ameeni. Ala mura' sleémeero amór i dahhi a amór Mungú.

¹³ Kuungá' kiloohúng alqaytsitaak. Xáy, a gár hariíma /ameeni Mungú nguwa firiin barnaxes saga gwa tuntukiká?

¹⁴ Ahaá, tlehhemuusíng kuungá' tundura tleéhh, ngi laqaqankáhe dirhunge barnaxés hhawaata ku se'eengw tlét, a mure dirose.

¹⁵ Ala barnaxes /ameeni ka se'eengw tlet, dirose a xirif. Asma /ameeni se'éngw tlét guna sleér as tiwa tuntukuun.

¹⁶ Ala heé tlaampa'amisuú slaá' daanduú kaangwihe, inós ngi xui adór atén tlehhma'aá adór kwisíng kir koomanaaká, tam múk kríshaanáy oo umuúqo diiro gi konká.

Muruú /aymár Aako

¹⁷ Aníng baraá axweesantí ni dirhúngií ooa, aníng gár tiwa hariím a kuungá' nun iigahhaát gawaá gár wake. Asma dinku'uumarhúng gár ni huwahup a gár hhooeeká ala a gár tlaakw.

¹⁸ Gár har geeraá, aníng kaangw ugwa axaás qoomár kuungá' múk kríshaanáy bar burumburimitá', kuungá' taa partlité'. Ala aníng adór kaangwí turu ló' aga ya/aám.

¹⁹ Asma a gár hariím daqooroó adoosíng niwa ti'iiti baraá tla/angwhunge, as mukdá' haratlintaaór ló' ga koóm iwa geehhoouy.

²⁰ Qoomár kuungaá kríshaanáy bar burumburimitá', i ya/aandaaká muruú /aymár Aako kuwa /aga'.

²¹ Asma qoomár /aymaaro umuúqo heewo muruú /aymaarós gun kilós /aay. Ala gár aluudá' ngi haar a heé wák in didá' wa iwiwiit ar qwari, ala kuqá' aa qaroó ooniít.

²² Ahaá, kuungá' maraay i koonda'akáhe awa tawa /ayiinda' nee tawa wahaanda'? Laqaá a múk Mungú un waaqaqa'á'a, tam múk liitlakuuse kuri mureekeemisá'. Án gár kuungá' nu baw a milá? Nun xirfayeésa? Aasla'áy, nu xirfayeesaaká daanduú kaangwihe.

²³ Asma aníng intsaahhastí ana dír Aakoó wa ilaóh, nee ngiri kuungá' i oó', tí kah, Aakoorén Yesu xweeraadá' kuwa sakií/, mukaatmo guna taataáhh,

²⁴ iri sluufiís, guri parhhamiís, iri oó', «Gaarí an slaqwte'eé' ar tinda haniís as kuungá'. Adoorí tlehhiitaak as inslaslangw'eé'.»

²⁵ Nee alaá /aymaaro xooslmo guri adoodár óh sleeme, iri oó', «Gár baraá xooslmoowí a alqadór /aben, tidá' Mungú aa tleéhh ar tseerer'eé'. Adoorí tlehhiitaak qoomár bar wahaandá' as inslaslangw'eé'.»

²⁶ Asma qoomár kuungá' mukaatmoowí bur /agiindá' nee gár baraá xooslmoowí bar wahaandá', kuungá' a gwa'arár Aako an alki/itá' ay dír inós ni ki/i.

²⁷ Gawaá adoorihe, barnaxes hee mukaatmoowí gwa /aáy, nee gár baraá xooslmoó Aako gaa wáh ar loohír hariimaaká, heé adoorí slaqwtá Aako nee tseerér Aako gaa tlakweemií tleéhh.

²⁸ Gawaá adoorihe umuúqo heewo ti kilós alqaytsiti, daqaní mukaatmo ngu /ayi nee gár baraá xooslmoodá' ngi wahi.

²⁹ Ala umuúqo heewo oo /ayiím, nee oo wahaám, barnaxes slaqwtá Aako gaa tsaahhiiká, heewí taa kilós sakwasleemár i tleéhh ar loohír /ayma nee wahaangw.

³⁰ As adoorí gaarí an gár múk yaariír baraahunge kus daqeetlákw nee is tiqi, nee slám an gár múk yaariír isa qaátl dirhunge.

³¹ Ala geeraawo barnaxes atén kiloorén taa alqaytsiitaán, atén geeraawo alók taa sakwasleemutiiká.

³² Ala qoomár barnaxes atén ti sakwasleemuut, a Aako atén tin muux, as atén mitiwa sakwasleemuút dinkwa nee múk aa haratlintii'iiká.

³³ Gawaá adoorihe, hhaee'eé', qoomár kuungá' barnaxes a burumburimitá' as tawa /ayiinda', ti daamaaraande'.

³⁴ Ala hee barnaxes i qwariit, i /ayin dír do'ós wa alé, as burumburimituuhúng mindiwa sakwasleemár ar kií/. Nee muruudá' aa meet aníng binda amorhúngí hardáh ngu hara'ayiím.