1 Korinto 10 - Biblía Axweesantá Hhohho' ar Mungú 2004

Nanaaqa as munguaá hatlá' kiwa may

¹ Hhaee'eé', aníng kuungá' nu inslawtisár wa slaá' kángw baabi'iirene. Qoomaadae inooín sleémeero ta baraá guruú huunki, sleémeero tana waraáhh ar baraá tlawi.

² Nee sleémeero kina baatimiís ar baraá huunki nee ar baraá tlawi as inooín tawa múk Mose.

³ Inooín sleémeero muruú /aymár qeeru oo taa /aáy a wak.

⁴ Nee slám inooín sleémeero ma'aá qeeru awa taa wahán a wak. Asma inooín nina wahané' dír tlaa/adár qeeru, tidá' inooín gaa eehat. Nee tlaa/adá' an Kristo.

⁵ Ala tam adoorihe awa yaariir baraaine Mungú ngwa sla'atisi'iiká. Gawaá adoorihe tu'uuín niri tlufaafuiyé' baraá xaanxáy wa alé.

⁶ Muruuwí ina tleehharuút as iwa slaqsay tleehhiti direne, as kahhó' atén mawa baraá tlakweemií dahaán adoodár inooín wa alé.

⁷ Nee slám kuungá' munguaá hatlá' mi haratlintiaara', adoodár muu bahh'ale baraaine aa tleéhh. Asma Gooi i kat, «Muu ina iwiít, tari /ayín nee tari wahán. Aluuwo tari sihhiít as tawa neeti.»

⁸ Nee slám atén tsaatu'uuma mawa tleehhaán, adoodá' inooín bahh'alé naa tleehhiyé', múk kume mibeeri tsár nee tám iri qaátl baraá looár wák i alé.

⁹ Nee slám atén Aako muwa iiara'araán adór inooín bahh'alé ngura iiariyé', nee kiri hhaamiís nee dayshe.

¹⁰ Slám kuungá' ma qununu/aara' adór inooín bahh'alé nira qununu/iyé', kiri hhaamiís nee Hhitusmo.

¹¹ Muruuwí ina tleehharuút as tawa slaqsaay, nee kuri gooín as atén tiwa intsaahhatisi. Asma qoomaarí atén tay diriiaan a qoomár alhhe'eesoó yaamu.

¹² Gawaá adoorihe heé ti kilós xuú' adór ira sihhiít, inós ti harmagaahhi miwa huú'.

¹³ Kuungá' iiara'aduú taa sleeré' a adór kuduú /iisikó muu i slaaslay. Nee Mungú ku inkihhím. Inós iiara'aduú aleesleemuuhúng gu baá/, gu ya/anká kuungá' kuwa sleera'. Ala iiara'at barnaxes naa hardáh, inós loohi ga tleehh ar kuungá' tar ti'ita' baraá iiara'aduudae, as kuungá' tawa qiqtliinda' baraá iiara'aduudá' wa alé.

¹⁴ Gawaá adoorihe, sla'aaruuser'eé', kuungá' sluufmisuú munguaá hatlá' ilaguwaak.

¹⁵ Aníng an dirhúngií axweés tawa adór múk fuqurángw koóm. Axweesantí án ni axwees, kuungá' aldakuutaak.

¹⁶ Xooslmooduú tsuuqa, kudá' atén ta tsuuqumaan bur ar wahaamaán, gár i huwahuwi a dinku'uumár tseerér Kristowookáhe? Mukatmoodá' ta qasmiisaan bur /ayaán, gár i huwahuwi a dinku'uumár slaqwtá Kristowookáhe?

¹⁷ Atén a slaqwtá wák, tam atén ti yaariire, asma mukatmo a wak, nee atén sleémeero tlaqtá mukatmoodá' wák a ilaohiimaán.

¹⁸ Múk Yahudi ga/aawaak. Mukdá' fu'unaá taa ilahhooár wa haniís gi /aáy, inooín ta dinku'uumísiíke nee kitangwduú ilahhooa?

¹⁹ Daxta gár ni ooár wa slaa' a milá? A fu'unaá taa ilahhooár wa haniís an gaarookáhe? Laqaá munguaá hatlá' an gaarookáhe?

²⁰ Aasla'áy. Ala múk pakaanáy ilahhooár muruú ta tsu/i birngi hanmiisiyá', a ngin hanmiisiyá' amór neetlaame ala a amór Munguheeká. Ala aníng a sla'aaká kuungá' tawa dinku'uumisa' nee neetlaame.

²¹ I ya/aandaaká kuungá' xooslmoó Aako kuwa ar wahaanda', nee xooslmoó neetlaame sleeme kuri malé ar wahaandá'. I ya/aandaaká kuungá' tawa dinku'uumisa' dír meésár Aakoowo, nee tari malé dinku'uumisá' dír meésár neetlaame sleeme.

²² Ahaá, atén aqo qitlána Aako kuwa buhhtisaan? Atén a ak /uuruú koomaána ta inose?

Umuúqo gaaro tleehhaak as xirfuú Mungú

²³ Aníng a aleesláw mura' sleémeero nguwa tleehh, ala a sleémeerowooká oo hariím. Aníng a aleesláw mura' sleémeero nguwa tleehh, ala a sleémeerowooká oo muu gu kwa/ás.

²⁴ Hee tidá' inós i slai mingiwa leelehhiít, ala masók a tidá' heé hatlá' gu alee/iis gan leelehhiit.

²⁵ Umuúqo gaaro ar ta weerimiisi didár mura' kuwa weerimiisi, /ayaak, slám amór i dahh ma yaahamisaara', as haratlintaaorhúng.

²⁶ Asma Gooi i kat, «Yaamu nee umuúqo gaaro ar baraá yaamií diriia a ar Aako.»

²⁷ Bar heé Krishaanmowooká kuungá' naa dahi'ís, nee kuungá' barnaxes a daqeemuú sla'á', umuúqo gaaro /ayaak, tidá' taa geeraahúng i qaás. Amór i dahh ma yaahamisaara', as haratlintaaorhúng.

²⁸ Ala barnaxes hee kuungá' naa báy, «Gaarí kaa ilahhooár wa gaás,» kuungá' daqaní gadaádá' ma /ayaara', as heedaádá' ngaa oo', nee as haratlintaao.

²⁹ Ala haratlintaaoorí ni kah, a togeeká, ala a haratlintaaór heedaáduú hatlá'. Ala án i yaahasá' tawa oa', «Haratlintaaor'eé' gár kas ila/an a milá as haratlintaaór heé hatlá'?

³⁰ Aníng Mungú un sluufmiís as muruú /aymar'eé'. Ala heé hatlá' gár aníng is sakwasleemuuti a milá as muruú /aymaadá' ni /aay, kudá' Mungú nguwa sluufmiis?»

³¹ Barnaxes kuungá' a /ayiindá', laqaá bar wahaandá', laqaá umuúqo gaaro ar ta tlehha'a, sleémeero tlehhiitaak as xirfuú Mungú.

³² Kuungá' ma dukuutsmo tleehhitaara' dír múk Yahudiro, laqaá dír múk Yunaniro, laqaá tam dír múk kríshaanayhe,

³³ ar adoodá' aníng ni tlehhaahhiit. Asma aníng umuúqo heewo un sla'atisár wa slaá' baraá muruudá' sleémeerowo ni tlehhiita. Gadaádá' aníng i gaa wa buu' a leelehhiitaaká, ala a tidá' múk yaariír gu gaa wa buu' an leelehhiít, as kahhó' inooín kiwa ba/amisi.