1 Korinto 1 - Biblía Axweesantá Hhohho' ar Mungú 2004

¹ Anuú Paulo barwaárí ngina gooiím. Aníng tina ateét tawa Ya/abusmoó Yesu Kristo ar adoodá' Mungú aa slaá'. Aníng nee hhiyaarén Sostene barwaárí ngina gooiimaán

² amorhúng i alé, kuungaásingá' kríshaanáy, awa baraá yaamaá Korintór i diriia'. Kuungá' a múk Mungú gwa haratlintii'. Kuungá' tunduna hhoohhooeés ar baraá Kristo Yesu, tunduri ateét, as tawa múk hhohhó' oo Mungú, dinkwa nee mukdá' sleémeero oo Aakoorén Yesu Kristo gu ateetiím umuúqo diiro. Inós a Aakooín, nee slám a Aakoorén.

³ Mungú Baabuúrén nee Aako Yesu Kristo kuungá' nu tsuuqi nee nu waydií haniisi.

Tsuuqaá baraá Kristo

⁴ Aníng Mungú un sluufmiís as kuungá' umuúqo daqto. Un sluufmiís as tsuuqaadaá Mungú kuungá' taa sleeré' ar baraá Kristo Yesu.

⁵ Asma baraawose kuungá' mura' sleémeero ugwa sleeré', tam axweesani sleémeero nee xu'uti sleémeerowo.

⁶ Asma lamabu'úngw Kristo baraahunge /uuru guna sláy.

⁷ Gawaá adoorihe aleesleemuú Qeeru oo aa /aaruy dirhunge i kaahh, qoomaarír Aakoorén Yesu Kristo kuwa daamaaraanda', as kuwa geehhooeesi.

⁸ Inós sleeme kuungá' nu /uurií haniis ay alhhe'eesaay, as kahhó' kuungá' tawa múk dakuús wásl baraá umuúqo gaaro bál deelór Aakoorén Yesu Kristowo.

⁹ Mungú ku inkihhím. Inós an kudá' kuungá' naa ateet as tawa data' baraá dinku'uumadár Garmaawós Yesu Kristo, Aakoorén.

Partlituú múk kríshaanáy

¹⁰ Hhaee'eé', án kuungá' nu harhheehhe'eés ar aleesleemuudá' Aakoorén Yesu Kristo naa aníngí haniís, kuungá' axweesanayhúng masók a wak. Slám miti partliitara'. Ala masók kuungá' a adór múk taa haragwaa', munerhúng tawa wak nee inslawaywo.

¹¹ Hhaee'eé' aníng kangwhúng ugwa axaás dír múk doó Kloe wa alé, adór baraá tla/angwhunge kaangani ir deér.

¹² Gár án ni kah a tí, «Baraahunge heeko i kaahi, ‹Aníng a heé Paulo.› Kuqá' i kaahi, ‹Aníng a heé Apolo.› Nee oo hatlá' i kaahi, ‹Aníng a heé Kefa.› Nee kuqá' i kaahi, ‹Aníng a heé Kristo.› »

¹³ Ahaá, Kristo tina qasmiísi? Ahaá, Paulo kuna kikií'i as kuungá'? Laqaá kuungá' tunduna baatimiísi ar umuú Paulo?

¹⁴ Ala aníng a qwalalaá/ asma baraá tla/angwhunge heé naa baatiís i kaahh, aqo har Krispo nee Gayo.

¹⁵ Gawaá adoorihe heé oó' kuna baatiís ar umuueé' i kaahh.

¹⁶ (Nee slám múk doó Stefana una baatimiís. Ala heé hatlá' oo naa baatiís u xuaaká.)

¹⁷ Asma Kristo aníng iga ya/aawiiká as niwa baatimiis, ala ina ya/aáw as Ya/abtór hho' ngiwa alki/iit. Ala a ooaaká an alki/iít ar sagalooár muu. Asma adoorí bar aga tleéhh, daqaní /uuruú msalaábár Kristo ugwa hingeés.

Kristo an /uuru nee sagalooár Mungú

¹⁸ Asma kángw msalaába dír mukdá' qwaqwadiima a dakti'iima, ala dír ateéká' ta ba/amiimisi a /uuruú Mungú.

¹⁹ Asma kaa gooín, «Aníng sagalooár mukdá' sageloén a hhitiím, Nee fuqurángw mukdá' fuqureeraá koóm u sií'.»

²⁰ Gawaá adoorihe heé sagalooár koóm i diimá? Nee intsaahhatusmooduú hara'aya i diimá? Nee slám heé tlaampa'aamis gu baál i diimá de'emaakae? Ahaá, Mungú sagalooár múk baraaká' yaamu gaa laqáníke adór tar dakti'iima.

²¹ Asma Mungú gana slaá' baraá sagalooarose, muu inós munguwa tsaáhh ar sagalooar'ín ar kilá'. Gawaá adoorihe inós kwasleema gari tsaát kilós alé as mukdá' haratlintaatií' kuwa ba/amisi ar axweesantadár dakti'iima, tidá' atén ta alki/iitaan.

²² Asma múk Yahudi gár i leelehhiiti a laya. Nee múk Yunani gár i leelehhiiti a sagalooa.

²³ Ala atén gár ta alki/iitaan a kángw Kristo, kudá' taa kikií' gawaá msalaába. Ala kaangwí dír múk Yahudiro a dukuutsmo, nee dír múk Yunaniro a dakti'iima.

²⁴ Ala dír mukdá' taa ateeti bar múk Yahudi laqaá múk Yunani, Kristo an /uuruú Mungú nee an sagalooár Mungú.

²⁵ Asma dakti'iimár Mungú i sagalooár koón ak alé ta sagalooár muko. Nee daqaatlakwér Mungú i /uuruú koón ak alé ta /uuruú muko.

²⁶ Gawaá adoorihe, hhaee'eé', kuungá' inslawaak adór kuungá' tay dir'a', qoomár Mungú nuwa ateét. Qoomaadae baraá tla/angwhunge múk sagalooár koóm, ar adoodá' muu ngir tsatsahhan, ku yaariireeká, slám múk aleesleemuú koóm ku yaariireeká, nee slám múk ta ilaiwawa/i ku yaariireeká sleeme.

²⁷ Ala Mungú muruudá' taa dakti'iimár i harafaár nee muu, guna tsawaár, as múk sageloén nguwa mureekeesi. Nee slám muruudá' taa liitlakwér i harafaár nee muu, Mungú guna tsawaár, as kudá' /uuruú koóm nguwa mureekeesi.

²⁸ Nee slám tidá' taa gaárií xuiiká nee muu, nee tidá' taa waaqaá', tidá' gaa wasl, Mungú gana tsawaár, as tidá' afhhamít ngiwa dahhi.

²⁹ Adoorí gana tleéhh as hee mitiwa kilós xirfayeemiís dír geeraá Munguhe.

³⁰ Ala kuungá' a baraá Kristo Yesu i dir'á'. Adoorí heé gaa tleehh a Mungú. Mungú Kristo Yesu guna sagalooarén tleéhh. Slám inós a gan'amuurén, nee hhohhoaarirén nee gweermoorén.

³¹ Gawaá adoorihe, adoodá' Gooi i kat ina tleehharút, «Heé ti kilós xirfayeemiís, masók ti xirfayeemiis as Aako.»