Зарджыты зарӕг 4 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Лӕппу:

¹ — О, цӕй рӕсугъд дӕ, мӕ уарзон, цӕй диссаджы рӕсугъд дӕ! Хызы бын бӕлӕтты ’нгӕс — дӕ цӕстытӕ! Галаады хохы сӕрӕй цыма сӕгътӕ ’рцӕйцӕуынц, уыйау дӕ дзыккутӕ фӕйлауынц.

² Ногӕлвыд фыстӕ цыма найӕнӕй рацӕуынц, уыйау урс сты дӕ дӕндӕгтӕ; алкӕмӕн дӕр дзы — фӕйнӕ уӕрыччы, иу дӕр дзы йӕ ныййарӕг мадӕн сӕфт нӕу.

³ Дӕ былтӕ сты сырх ленты ’нгӕс, хӕрзаив. Хызы бын дӕ рустӕ гранаты ’рдджытау — сырх.

⁴ Давиды мӕсыг — тохы бонӕн амад, уый ӕнгӕс — дӕ хъуыр: мин уартӕй йӕ сфӕлыстӕуыд, иууылдӕр — ӕфсӕддонты уартытӕ.

⁵ Дӕ риутӕ — саджы дыууӕ лӕппыны кӕнӕ сычъийы фаззӕттӕ, кӕркусӕгты ’хсӕн хизынц.

⁶ Цалынмӕ нӕма сбон ис ӕмӕ аууӕттӕ нӕ фӕцыдӕр сты, уӕдмӕ ацӕудзынӕн дидинфӕлыст хохмӕ, буд бӕлӕсты къуыбырмӕ.

⁷ О мӕ уарзон! Къахӕй сӕрмӕ диссаджы рӕсугъд дӕ! Иу аипп дӕр дӕм нӕй ссарӕн!

⁸ Мӕ къайаг, цом мемӕ Ливанӕй! Фӕтагъд мӕм кӕн Аманайы хохы сӕрӕй, Сенир ӕмӕ Ермоны бӕрзӕндтӕй, домбӕйтты лӕгӕтӕй, фыранчытӕ цы хӕхты ’мбӕхсынц, уырдыгӕй!

⁹ Мӕ хо, мӕ къайаг, зӕрдӕскъӕфт мӕ фӕкодтай дӕ иу бакастӕй, ӕрмӕст дӕ хъуырыл ауыгъд фӕрдгуытӕй!

¹⁰ О мӕ хо, мӕ къайаг! Куыд ӕхсызгон мын у дӕ рӕвдыд, о, цас адджындӕр у сӕнӕй! Дӕ буары хӕрздӕф — дунейы ӕппӕт хӕрздӕфгӕнӕнтӕй хуыздӕр!

¹¹ О, мӕ къайаг! Дӕ былтӕ — адджындӕр мыдӕй, де ’взаджы бынӕй тӕдзы ӕхсыр ӕмӕ мыд, дӕ дарӕсы тӕф — ливайнаг нӕзыты хӕрздӕфау.

¹² О, мӕ хо, мӕ къайаг! Ӕхгӕд дыргъдон, ӕхгӕд цъайы ӕнгӕс дӕ! Ды — донгуырӕн, фӕлӕ дӕ нуазӕн нӕй!

^13-14 Дӕ дыргъдоны зайынц гранат бӕлӕстӕ, ӕмбисонды хӕрзад дыргътимӕ; шафран, хӕрздӕфгӕнаг хъӕз ӕмӕ корицӕ, алыхуызон буд бӕлӕстӕ; алой ӕмӕ миррӕ — алы диссаджы хӕрздӕфгӕнӕнтӕ.

¹⁵ Дӕ дыргъдоны астӕу — донгуырӕн, ног донимӕ цъай, Ливаны хӕхтӕй кӕлы.

Чызг:

¹⁶ — О, райхъал у, цӕгаты дымгӕ! О хуссары дымгӕ, фӕзын! Мӕ дыргъдоныл мын радым, уадз, йӕ хӕрздӕф уӕлдӕфы ахъара! Уадз, мӕ уарзон ӕрбацӕуа йӕ дыргъдонмӕ, йӕ адджын дыргътӕй йын бахӕра!