Ромӕгтӕм 15 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Алчи уӕ йӕхи мӕт ма кӕнӕд, фӕлӕ кӕрӕдзийы зӕрдӕ ӕлхӕнут

¹ Мах, йӕ уырнындзинад тыхджын кӕмӕн у, уыдон хъуамӕ ӕрмӕст нӕхи кой ма кӕнӕм, фӕлӕ ӕнӕбонтӕн ӕххуыс кӕнӕм сӕ лӕмӕгъдзинӕдты уаргъ хӕссын.

² Алчидӕр нӕ хъуамӕ хъуыды кӕна, йе ’фсымӕры монон рӕзт ӕмӕ уырнындзинад фидар кӕнынӕн ахъаз цы у, уый тыххӕй.

³ Уымӕн ӕмӕ Чырысти дӕр Йӕхи мӕт нӕ кодта. Уымӕ гӕсгӕ зӕгъы Сыгъдӕг Фыст: «Дӕу чи ӕлгъыста, уыдоны ӕлгъыстытӕ Мӕныл ӕрцыдысты».

⁴ Сыгъдӕг Фыст цыдӕриддӕр зӕгъы, уый ныффыстӕуыд махӕн зонд амонынӕн — дӕтты нын фӕразондзинад ӕмӕ ӕхсар, цӕмӕй нӕ ныфс уа фидар.

⁵ Фӕразондзинад ӕмӕ ӕхсар дӕттӕг Хуыцау уын раттӕд иумӕ ӕмзондӕй фӕцӕрыны хорзӕх,

⁶ цӕмӕй, Йесо Чырыстийы фӕзмгӕйӕ, ӕмзӕрдӕйӕ ӕмӕ ӕмдзыхӕй стауат Хуыцауы, нӕ Бардарӕг Йесо Чырыстийы Фыды.

Фарны Уац — муртаттӕгтӕн

⁷ Чырысти сымахыл куыд ӕнувыд у, афтӕ ӕнувыд ут сымах дӕр кӕрӕдзиуыл Хуыцауы кадӕн.

⁸ Зӕгъын уын, Хуыцау Йӕ дзырд кӕй нӕ сайы, уый равдисыны тыххӕй Чырысти сунӕтгӕндтӕн сси лӕггадгӕнӕг, цӕмӕй сӕххӕст кӕна, Хуыцау сын сӕ рагфыдӕлтӕн зӕрдӕ цӕмӕй бавӕрдта, уый

⁹ ӕмӕ муртаттӕгтӕ стауой Хуыцауы Йӕ хорзӕхы тыххӕй, Сыгъдӕг Фыст куыд зӕгъы, афтӕ: «Уый тыххӕй стаудзынӕн Дӕу муртаттӕгты ӕхсӕн, Дӕуыл уыдзысты мӕ зарджытӕ».

¹⁰ Ӕмӕ ма ноджы у загъд: «Цин кӕнут Хуыцауы адӕмимӕ, муртаттӕгтӕ».

¹¹ Ӕмӕ ма ноджыдӕр: «Стаут Дунедарӕджы, ӕппӕт муртаттӕгтӕ, кад Ын кӕнӕнт ӕппӕт адӕмтӕ».

¹² Исайа дӕр зӕгъы: «Фӕзындзӕн Йессейы Ӕвзар ӕмӕ адӕмтӕн хицауиуӕг кӕндзӕн; адӕмтӕ Йыл дардзысты сӕ зӕрдӕ».

¹³ Ныфс Чи дӕтты, уыцы Хуыцау уын уырнындзинады фӕрцы раттӕд цин ӕмӕ фарн, цӕмӕй Сыгъдӕг Уды хъаруйӕ уӕ ныфс кӕна фидарӕй-фидардӕр.

Павел — муртаттӕгты апостол

¹⁴ Дызӕрдыг нӕ кӕнын, ме ’фсымӕртӕ, алы хорз миниуӕг ӕмӕ зонынадӕй ӕххӕст кӕй стут ӕмӕ уӕ бон кӕй у кӕрӕдзийы ахуыр кӕнын.

¹⁵ Фӕлӕ уӕм уӕддӕр мӕ ныфс бахастон ныффыссын, цӕмӕй уӕ зӕрдыл лӕууой мӕ ныхӕстӕ. Ӕз уый бакодтон, Хуыцауӕй мын цы хорзӕх лӕвӕрд ис, уымӕ гӕсгӕ —

¹⁶ Хуыцау мын бафӕдзӕхста, цӕмӕй муртаттӕгтӕн уазлӕггад кӕнон Йесо Чырыстийы номӕй ӕмӕ сын хъусын кӕнон Хуыцауы Фарны Уац, цӕмӕй муртаттӕгтӕ суой, Сыгъдӕг Уд кӕй ссыгъдӕг кодта, ахӕм фӕндиаг цардӕгас нывонд.

¹⁷ Уӕдӕ Йесо Чырыстиимӕ иудзинады фӕрцы мӕ бон раппӕлын у, Хуыцауы номыл цы уазлӕггад кӕнын, уымӕй.

¹⁸ Цӕмӕй муртаттӕгтӕ Хуыцауы коммӕ кӕсын райдайой, уый тыххӕй Чырысти мӕ фӕрцы цы сарӕзта, уымӕй уӕлдай мӕ ныфс ницӕй тыххӕй зӕгъынмӕ хӕссын. Чырысти уыдӕттӕ сӕххӕст кодта ныхас ӕмӕ хъуыддагӕй,

¹⁹ ӕвдисӕйнӕгтӕ ӕмӕ диссӕгтӕй, Сыгъдӕг Уды хъаруйӕ. Афтӕмӕй Чырыстийы Фарны Уац ӕз айхъуысын кодтон Йерусалимӕй суанг Иллирикмӕ.

²⁰ Ӕз архайдтон, Чырыстийы кӕм нӕ зыдтой, Фарны Уац уым хъусын кӕныныл, цӕмӕй кӕйдӕр арӕзт бындурыл ма амайон,

²¹ фӕлӕ, Сыгъдӕг Фыст цы зӕгъы, уый сӕххӕст кӕнон: «Кӕмӕн нӕ загъдӕуыд Уый тыххӕй, уыдон фендзысты, ӕмӕ, чи нӕ фехъуыста, уыдон базондзысты».

Павелы фӕнд Роммӕ ацӕуыны тыххӕй

²² Гъе, уыдӕтты аххосӕй мын нӕ бантыст, кӕд бирӕ хӕттыты хъавыдтӕн, уӕддӕр нырмӕ сымахмӕ ӕрцӕуын.

²³ Уыцы рӕтты ныр ӕз мӕ куыст ахицӕн кодтон ӕмӕ, бирӕ азты дӕргъы сымахмӕ цӕуынмӕ кӕй бӕллыдтӕн,

²⁴ уымӕ гӕсгӕ, Испанимӕ цӕугӕйӕ, сымах фенынмӕ дӕр фездӕхдзынӕн ӕмӕ уӕм иу цасдӕр афӕстиат уыдзынӕн. Стӕй мын, дызӕрдыг нӕ кӕнын, сымах баххуыс кӕндзыстут мӕ фӕндагыл дарддӕр ацӕуынмӕ.

²⁵ Ныр та цӕуын Йерусалиммӕ, сыгъдӕджытӕн уазлӕггад кӕнынмӕ.

²⁶ Уымӕн ӕмӕ Македони ӕмӕ Ахайы уырнджыты бафӕндыд, Йерусалимы сыгъдӕджытӕй мӕгуыр чи у, уыдонӕн баххуыс кӕнын.

²⁷ Бафӕндыди сӕ, стӕй сӕ хӕсджын дӕр сты. Уымӕн ӕмӕ, иугӕр муртаттӕгтӕ схайджын сты чырыстон иудейӕгты монон исбонӕй, уӕд сын хъуамӕ уыдон дӕр сӕ зӕххон хъуӕгтӕ баххӕст кӕнынмӕ феххуыс кӕной.

²⁸ Ӕз уый куы саразон ӕмӕ, цы ӕрӕмбырд ис, уый сӕм мӕхӕдӕг куы фӕхӕццӕ кӕнон, уӕд Испанимӕ мӕ фӕндаг сараздзынӕн сымах уылты.

²⁹ Уый зонын, ӕмӕ уыл куы сӕмбӕлон, уӕд уын мемӕ кӕй ӕрхӕсдзынӕн Чырыстийы ӕнӕкӕрон зӕрдӕбын арфӕтӕ.

³⁰ Ӕфсымӕртӕ, нӕ Бардарӕг Йесо Чырыстийы хатырӕй ӕмӕ, Сыгъдӕг Уд кӕй дӕтты, уыцы уарзты хатырӕй курын сымахӕй: зӕрдиагӕй мын кувут Хуыцаумӕ,

³¹ цӕмӕй мӕ Иудейы ӕнӕуырнджытӕй бахиза, Йерусалимы сыгъдӕджытӕ та мын ме ’ххуысыл ӕхсызгонӕй сӕмбӕлой.

³² Ӕмӕ уӕм, Хуыцауы фӕндӕй, уӕд зӕрдӕрухсӕй фӕзындзынӕн, ӕмӕ мӕ уд ӕрулӕфдзӕн уемӕ.

³³ Фарндӕттӕг Хуыцау уӕд уе ’ппӕтимӕ дӕр. Аммен.