Рацыд 9 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Фӕндзӕм ӕфхӕрд: фосы емынӕ

¹ Дунедарӕг Моисейӕн бафӕдзӕхста: «Фараонмӕ бацу ӕмӕ йын зӕгъ, афтӕ зӕгъы Дунедарӕг, дзуттӕгты Хуыцау: „Ауадз Мын Мӕ адӕмы, ӕмӕ Мӕм бакувой.

² Куынӕ сӕ ауадзай, куы та сӕ бауромай,

³ уӕд Дунедарӕг Йӕ къух сисдзӕни, быдырты дын цыдӕриддӕр фос ис, уымӕ — бӕхтӕм, хӕрджытӕм, теуатӕм, стуртӕм, сӕгътӕм ӕмӕ фыстӕм: карз емынӕ сыл сыстдзӕн!

⁴ Дунедарӕг бахиздзӕн израилӕгты фосы, мысырӕгты фосыл та нӕ бацауӕрддзӕн. Израилӕгты фосӕй иу дӕр нӕ фӕхъӕудзӕн“».

⁵ Ацы ӕфхӕрдӕн Дунедарӕг ӕмгъуыд дӕр скодта: «Райсом Дунедарӕг афтӕ бакӕндзӕн ӕппӕт бӕстӕйы!»

⁶ Дыккаг бон Дунедарӕг, куыд загъта, афтӕ бакодта: Мысыры фос иууылдӕр фӕцагъды сты, израилӕгты фосӕй та иу дӕр нӕ фӕхъуыди.

⁷ Фараон арвыста бӕрӕг базонынмӕ, ӕмӕ, ӕцӕгдӕр, израилӕгты фосӕй иу дӕр нӕ фӕхъуыд. Фӕлӕ та уӕддӕр фараон нӕ састи: нӕ уагъта израилӕгты.

Ӕхсӕзӕм ӕфхӕрд: хӕфдзаст хъӕдгӕмттӕ

⁸ Дунедарӕг загъта Моисей ӕмӕ Ааронӕн: «Пецы хуылфӕй фӕйнӕ армыдзаджы фӕнык райсут, ӕмӕ йӕ Моисей, фараон ӕй куыд уына, афтӕмӕй арвмӕ фехсӕд,

⁹ ӕгас Мысыры сӕрты куыд ахӕлиу уа. Уӕд адӕмӕн дӕр ӕмӕ фосӕн дӕр сӕ буар хӕфдзӕстытӕ фестдзӕн».

¹⁰ Моисей ӕмӕ Аарон фӕйнӕ армыдзаджы фӕнык райстой пецӕй ӕмӕ фараоны раз ӕрлӕууыдысты. Моисей фӕнык арвмӕ фехста, ӕмӕ адӕмӕн дӕр ӕмӕ фосӕн дӕр сӕ буар хӕфдзӕстытӕй нал зынди.

¹¹ Кӕлӕнгӕнджыты бон нал уыд Моисеимӕ сӕ тых ӕвзарын: уыдоны буар дӕр, иннӕ мысырӕгтау, хӕфдзӕстытӕ фестад.

¹² Фӕлӕ Дунедарӕджы фӕндӕй ныддур ис фараоны зӕрдӕ, ӕмӕ та уӕддӕр нӕ байхъуыста Моисей ӕмӕ Ааронмӕ, Дунедарӕг куыд дзырдта, афтӕ.

Ӕвдӕм ӕфхӕрд: ихуард

¹³ Дунедарӕг Моисейӕн бафӕдзӕхста, цӕмӕй райсом раджы фараонмӕ бацӕуа ӕмӕ йын зӕгъа: «Афтӕ зӕгъы Дунедарӕг, дзуттӕгты Хуыцау: Мӕ адӕмы Мын ауадз, ӕмӕ Мӕм бакувой.

¹⁴ Ацы хатт дӕ ноджы тынгдӕр бафхӕрдзынӕн — дӕхи дӕр, дӕ дӕлдӕрты дӕр ӕмӕ дӕ адӕмы дӕр, ӕмӕ уӕд базондзынӕ, зӕххыл Мӕнӕн ӕмбал кӕй нӕй, уый.

¹⁵ Мӕ къух дӕм куы систаин ӕмӕ дын дӕхиуыл дӕр ӕмӕ дӕ адӕмыл дӕр емынӕ куы сыстын кодтаин, уӕд зӕххы цъарыл дӕ кой дӕр нал уаид.

¹⁶ Фӕлӕ дӕ удӕгасӕй ныууагътон, цӕмӕй дын равдисон Мӕ хъомыс, цӕмӕй Мӕ ном айхъуыса ӕппӕт зӕххы цъарыл.

¹⁷ Ацы бон дӕр ма Мын ды Мӕ адӕмыл дӕ хъал калыс, дӕ фӕсонӕрхӕджы дӕр нӕй сӕ рауадзын.

¹⁸ Фӕлӕ йӕ зон, райсом, тӕккӕ ацафон, Ӕз Мысырыл, йӕ равзӕрынӕй нырмӕ кӕй нӕма федта, ахӕм ихуард рауадздзынӕн.

¹⁹ Батӕр дӕ фос сӕрӕмбӕрзт бынӕттӕм, быгъдӕг арвы бын дын цыдӕриддӕр ис, уыдон аууоны бафснай. Уымӕн ӕмӕ дын цыдӕриддӕр быдыры баззайа — адӕмӕй, фосӕй — ихы амӕттаг бауыдзысты, иу дӕр сӕ нӕ аирвӕздзӕн».

²⁰ Фараоны дӕлдӕртӕй Дунедарӕджы ныхасӕй чи фӕтарст, уыдон агъуысты бааууон кодтой сӕ цагъарты ӕмӕ сӕ фос.

²¹ Йӕ ныхас Ын чи ницӕмӕ ӕрдардта, уыдон та сӕ цагъарты дӕр ӕмӕ сӕ фос дӕр ныууагътой гом арвы бын.

²² Дунедарӕг Моисейӕн бафӕдзӕхста: «Арвмӕ сдар дӕ къухтӕ, ӕмӕ ӕгас Мысыры зӕххыл их ӕрцӕудзӕн. Их ныххойдзӕн адӕмы дӕр, фосы дӕр, зайӕгойты дӕр».

²³ Моисей йӕ лӕдзӕг арвмӕ сарӕзта, ӕмӕ Дунедарӕг зӕххыл арвы нӕрын, ихуард ӕмӕ ӕрвдзӕхӕр рауагъта. Дунедарӕг их ӕрцӕуын кодта Мысыры ӕппӕт зӕххыл дӕр.

²⁴ Их йӕ уарынӕй не ’нцад, арвы судзгӕ фӕттӕ йе ’хсӕнты цӕхӕртӕ калдтой. Ахӕм ӕбуалгъ ихуард цӕрынӕй-хӕрынмӕ никуыма федтой Мысыры цӕрджытӕ.

²⁵ Мысыры зӕххыл гом арвы бын цыдӕриддӕр баззад, — адӕймагӕй, фосӕй, зайӕгойӕ, — иууылдӕр сӕ их ныххоста. Суанг ма бӕлӕстӕ дӕр ныссаста.

²⁶ Ихуард нӕ уыдис ӕрмӕстдӕр Гошены зӕххыл — уым израилӕгтӕ цардысты.

²⁷ Фараон фӕдзурын кодта Моисей ӕмӕ Ааронмӕ, ӕмӕ сын загъта: «Тӕригъӕдджын дӕн ӕз. Дунедарӕг раст у, ӕз ӕмӕ мӕ адӕм та зылынджын стӕм.

²⁸ Балӕгъстӕ кӕнут Дунедарӕгӕн, ӕмӕ кӕрон уа Йӕ ӕрвнӕрд ӕмӕ Йӕ ихӕн. Ӕз уӕ уадзын, нал уӕ бауромдзынӕн».

²⁹ Моисей йын загъта: «Куыддӕр сахары ӕдде фӕуон, афтӕ мӕ къухтӕ Дунедарӕгмӕ сдардзынӕн, ӕмӕ налдӕр арвы нӕрд уыдзӕн, налдӕр — ихуард. Уый, цӕмӕй ды зонай, зӕххӕн йӕ хицау Дунедарӕг кӕй у.

³⁰ Фӕлӕ, куыд уынын, афтӕмӕй ды дӕр ӕмӕ дӕ дӕлдӕртӕ дӕр Дунедарӕг Хуыцауӕй уӕддӕр нӕма тӕрсут».

³¹ (Гӕн ӕмӕ хъӕбӕрхор ихдзагъд фесты, уымӕн ӕмӕ хъӕбӕрхор йӕ тӕккӕ ӕфсир ӕфтаугӕйӕ уыд, гӕн — дидинӕг калгӕйӕ.

³² Мӕнӕу ӕмӕ нӕлмӕнӕуӕн ницы уыд — уыдон фӕстӕдӕр байтауынц.)

³³ Моисей фараоны галуанӕй рацыд. Сахары ӕдде йӕ къухтӕ Дунедарӕгмӕ сдардта, ӕмӕ банцадысты арвы нӕрд ӕмӕ ихуард, арвӕй ӕртах дӕр нал ӕрхауд.

³⁴ Фараон куы федта, къӕвда, арвы нӕрын ӕмӕ их банцадысты, уӕд та йӕ раздӕры митыл схӕцыд: йӕ дӕлдӕртимӕ сӕ зӕрдӕтӕ ныддур кодтой.

³⁵ Дунедарӕг Моисейӕн куыд дзырдта, афтӕ та йӕ хивӕнд зӕрдӕйы уаг равдыста фараон ӕмӕ израилӕгты нӕ ауагъта.