Рацыд 39 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Сауджынты дарӕстӕ

¹ Ӕрвхуыз, игӕрхуыз ӕмӕ сӕнт сырх тӕбынӕй скодтой Ааронӕн дарӕстӕ, Уаз Цӕрӕны лӕггад кӕнынӕн, Дунедарӕг Моисейӕн куыд бафӕдзӕхста, афтӕ.

² Сыгъзӕрин ӕндахӕй, ӕрвхуыз, сӕнт сырх ӕмӕ игӕрхуыз тӕбынӕй ӕмӕ здыхт гӕнӕй бауафтой ефод.

³ Уый тыххӕй сыгъзӕринӕй скодтой тӕнӕг уадздзӕгтӕ, уадздзӕгтӕй рауагътой ӕндӕхтӕ. Уыцы сыгъзӕрин ӕндӕхтӕй, ӕрвхуыз, сӕнт сырх ӕмӕ игӕрхуыз тӕбынӕй ӕмӕ лыстӕг гӕнӕй бауафтой нывӕфтыд раздарӕн.

⁴ Ефоды дыууӕ кӕроныл бафидар кодтой уӕхскбостӕ.

⁵ Ефодӕн йӕ астӕубос дӕр скодтой, йӕхӕдӕг цӕмӕй у, уымӕй: сыгъзӕрин ӕндахӕй, ӕрвхуыз, сӕнт сырх ӕмӕ игӕрхуыз тӕбынӕй ӕмӕ лыстӕг гӕнӕй, Дунедарӕг Моисейӕн куыд бафӕдзӕхста, афтӕ.

⁶ Ӕрцамадтой оникс дуртӕ, мыхуырыл фыстытӕ куыд скъахынц, афтӕ сыл скъахтой Израилы фыртты нӕмттӕ, бавӕрдтой сӕ сыгъзӕрин фӕлгӕтты

⁷ ӕмӕ сӕ бафидар кодтой ефоды уӕхскбостыл — Израилы фыртты мысынӕн, Дунедарӕг Моисейӕн куыд бафӕдзӕхста, афтӕ.

⁸ Ефод цӕмӕй конд ӕрцыд, уымӕй скодтой риуылдарӕн дӕр — сыгъзӕрин ӕндахӕй, уыимӕ ӕрвхуыз, игӕрхуыз ӕмӕ сӕнт сырх тӕбынӕй ӕмӕ здыхт гӕнӕй уафт хъуымацӕй, нывӕфтыдтимӕ.

⁹ Уый уыд цыппӕрдигъон, дӕргъмӕ дӕр ӕмӕ уӕрхмӕ дӕр — уылынг, дыдагъ уӕфтӕгӕй конд.

¹⁰ Риуылдарӕныл бафидар кодтой зынаргъ дуртӕ — цыппар рӕнхъӕй. Фыццаг рӕнхъы уыдысты лал, топаз, изумруд;

¹¹ дыккаджы — малахит, сапфир, алмаси;

¹² ӕртыккаджы — гиацинт, агат, аметист;

¹³ цыппӕрӕмы — хризолит, оникс, яшмӕ. Ӕвӕрд ӕрцыдысты сыгъзӕрин фӕлгӕтты.

¹⁴ Зынаргъ дуртӕ нымадӕй уыдысты дыууадӕс, Израилы фыртты нӕмттимӕ: мыхуырыл фыстытӕ куыд скъахынц, афтӕ сыл къахт ӕрцыдысты Израилы дыууадӕс хӕдзарвӕндаджы нӕмттӕ, алы дурыл дӕр — иу ном.

¹⁵ Риуылдарӕнӕн сыгъдӕг сыгъзӕринӕй баздыхтой зӕринбыд рӕхыстӕ, бӕндӕн куыд баздухынц, афтӕ.

¹⁶ Скодтой дыууӕ сыгъзӕрин фӕлгӕты ӕмӕ дыууӕ сыгъзӕрин цӕджы ӕмӕ дыууӕ цӕджы бафидар кодтой риуылдарӕны дыууӕ къуымы.

¹⁷ Дыууӕ зӕринбыд рӕхысбосы бафидар кодтой дыууӕ цӕгмӕ риуылдарӕны къуымты,

¹⁸ рӕхысбосты иннӕ кӕрӕттӕ — ефоды уӕхскбосты дыууӕ фӕлгӕтмӕ разӕрдыгӕй.

¹⁹ Ноджы ма скодтой дыууӕ сыгъзӕрин цӕджы ӕмӕ сӕ риуылдарӕны бинаг дыууӕ къуымыл мидӕджырдыгӕй — риуылдарӕн ефодыл кӕм бадт, уым — бафидар кодтой.

²⁰ Ноджы ма скодтой дыууӕ сыгъзӕрин цӕджы ӕмӕ сӕ бафидар кодтой ефоды раззаг хаймӕ, бынӕй, ефодӕн йӕ астӕубосы сӕрмӕ.

²¹ Риуылдарӕны бинаг цӕгтӕ ефоды цӕгтимӕ бабастой ӕрвхуыз синагӕй, астӕубосы сӕрмӕ риуылдарӕн ефодыл ӕнгом куыд бада. Дунедарӕг афтӕ бафӕдзӕхста Моисейӕн.

²² Ефоды бын дарынӕн бауафтой пӕлӕз, ӕгасӕй дӕр — ӕрвхуыз тӕбынӕй.

²³ Пӕлӕзы астӕуӕй скодтой къӕртт — сӕрыл ӕркӕнынӕн. Йӕ кӕрӕттӕ йын фидар бахуыдтой, цӕмӕй ма скъуыйа.

²⁴ Пӕлӕзы фӕччийыл кӕрӕй-кӕронмӕ ӕрвхуыз, игӕрхуыз ӕмӕ сӕнт сырх тӕбынӕй скодтой гранат фӕткъуыйы хуызӕн тымбылӕгтӕ,

²⁵ уыдоны ’хсӕнты та ӕрцауыгътой сыгъзӕрин дзӕнгӕрджытӕ.

²⁶ Фӕччийыл кӕрӕй-кӕронмӕ ӕхсӕнмӕ-ӕхсӕнты — дзӕнгӕрӕг ӕмӕ тымбылӕг, дзӕнгӕрӕг ӕмӕ тымбылӕг. Дунедарӕг Моисейӕн куыд бафӕдзӕхста, уымӕ гӕсгӕ ахӕм дарӕсы кӕнгӕ у уаз куыст.

^27-29 Ноджы ма Аарон ӕмӕ йӕ фырттӕн гӕнӕй бауафтой хӕдӕттӕ, сарыхъ ӕмӕ сӕрылбӕттӕнтӕ, здыхт гӕнӕй та — цыбыр хӕлӕфтӕ, уыимӕ ма Ааронӕн здыхт гӕнӕй ӕмӕ ӕрвхуыз, игӕрхуыз, стӕй сӕнт сырх тӕбынӕй бауафтой нывӕфтыд рон. Афтӕ бафӕдзӕхста Дунедарӕг Моисейӕн.

³⁰ Сыгъдӕг сыгъзӕринӕй скодтой уаз уадздзаг ӕмӕ, мыхуырыл фыстытӕ куыд скъахынц, афтӕ йыл ныффыстой: «Дунедарӕджы уаз хай».

³¹ Бакодтой йыл ӕрвхуыз синаг, сарыхъыл ӕй разӕрдыгӕй бабӕттыны тыххӕй. Афтӕ бафӕдзӕхста Дунедарӕг Моисейӕн.

Фембӕлды Цатыр арӕзт фӕци

³² Ӕппынфӕстаг Фембӕлды Цатыр саразыны куыстытӕ иууылдӕр фесты. Израилӕгтӕ бакодтой, Дунедарӕг Моисейӕн цыдӕриддӕр бафӕдзӕхста, уый.

³³ Моисеймӕ ӕрбахастой Цатыр — йӕ уӕфтӕгтӕ ӕд ӕппӕт дзауматӕ: къӕпсыртӕ, фӕлгӕттӕ, хъилтӕ, цӕджындзтӕ, бынӕнцайӕнтӕ;

³⁴ царӕмбӕрзӕнтӕ: сырхахуырст фысдзӕрмттӕй конд царӕмбӕрзӕн ӕмӕ гогырӕ сӕракӕй конд мидӕмбӕрзӕн,

³⁵ Фидыды Чырын, йӕ хӕссӕн хъилтӕ, йӕ сӕр,

³⁶ фынг йе ’ппӕт дзауматӕ ӕмӕ, Мӕ разы ӕвӕрд цы дзултӕ хъуамӕ уой, уыдонимӕ,

³⁷ сыгъдӕг сыгъзӕринӕй конд цырагъдарӕн ӕд цырӕгътӕ, ӕппӕт дзауматӕ ӕмӕ сой,

³⁸ сыгъзӕрин нывондхӕссӕн, сӕрдӕн сой, буд, Цатыры дуарӕмбӕрзӕн,

³⁹ ӕрхуы нывондхӕссӕн ӕмӕ йӕ ӕрхуы хызӕг, йӕ хӕссӕн хъилтӕ ӕмӕ йе ’ппӕт дзауматӕ, хихсӕн аг йӕ суанцъыимӕ,

⁴⁰ кӕрты ӕмбонд-ӕмбӕрзӕнтӕ, йӕ цӕджындзтӕ ӕд бынӕнцайӕнтӕ, стӕй кӕрты дуарӕмбӕрзӕн, бӕндӕнтӕ, михтӕ ӕмӕ Фембӕлды Цатыры лӕггадӕн хъӕугӕ ӕппӕт мигӕнӕнтӕ,

⁴¹ Уаз Цӕрӕны лӕггад кӕнынӕн дарӕстӕ — алчер Аарон ӕмӕ йӕ сауджын фырттӕн.

⁴² Израилӕгтӕ Цатыр саразыны ӕппӕт куыстытӕ дӕр бакодтой, Дунедарӕг Моисейӕн куыд бафӕдзӕхста, афтӕ.

⁴³ Моисей федта, адӕм Дунедарӕджы фӕдзӕхст кӕй сӕххӕст кодтой, ӕппӕт куыстытӕ дӕр кӕй фесты, уый ӕмӕ сын раарфӕ кодта.