Рацыд 36 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Бецалел ӕмӕ Охолиав, стӕй, Уаз Цӕрӕн саразыны охыл Дунедарӕг куырыхон зонд ӕмӕ дӕсныйадӕй кӕй схайджын кодта, уыдон бакӕнӕнт, Дунедарӕг куыддӕриддӕр бафӕдзӕхста, афтӕ».

² Моисей фӕсидтис, Дунедарӕг куырыхон зонд кӕмӕн радта ӕмӕ кусын райдайынмӕ разӕнгард чи уыди, уыцы Бецалел ӕмӕ Охолиавмӕ, стӕй иннӕтӕм.

³ Моисейӕ райстой, израилӕгтӕ Уаз Цӕрӕн саразынӕн цы мысайнӕгтӕ ӕрбахастой, уыдон ӕмӕ райдыдтой кусын. Ныр ӕм адӕм та алы райсом дӕр хастой ӕмӕ хастой бархи лӕвӕрттӕ.

⁴ Уӕд Моисеймӕ ӕрбацыдысты, Уаз Цӕрӕн аразыны куыстытӕ чи кодта, уыдон

⁵ ӕмӕ йын загътой: «Дунедарӕг кӕй бафӕдзӕхста, уыцы куыст бакӕнынӕн адӕм фагӕй фылдӕр хӕссынц».

⁶ Моисейы бардзырдмӕ гӕсгӕ рӕсӕнуаты адӕмӕн фехъусын кодтой, цӕмӕй нӕлгоймагӕй, сылгоймагӕй, мачиуал хӕсса йӕ мысайнӕгтӕ Уаз Цӕрӕнмӕ. Ӕмӕ сын сӕ нал истой.

⁷ Фаг сӕм ӕрӕмбырд, цас хъуыди, уымӕй фылдӕр.

Фембӕлды Цатыр куыд сарӕзтой

⁸ Цатыраразӕг ӕрмдӕснытӕ здыхт гӕн, стӕй ӕрвхуыз, сӕнт сырх ӕмӕ игӕрхуыз тӕбынӕй сцӕттӕ кодтой дӕс уӕфтӕджы. Уӕфтӕгтӕ аив сфӕлыстой херувимты нывӕфтыдтӕй.

⁹ Уӕфтӕгтӕ уыдысты ӕмиӕстӕ: дӕргъмӕ — фӕйнӕ аст ӕмӕ ссӕдз ӕлмӕрины, уӕрхмӕ — фӕйнӕ цыппар.

¹⁰ Алы фондз уӕфтӕджы дӕр кӕрӕдзимӕ бахуыдтой, ӕмӕ сӕ рауади дыууӕ егъау ӕмбӕрзӕны.

^11-12 Уыцы дыууӕ ӕмбӕрзӕнӕн сӕ фӕйнӕ тигъыл дӕргъмӕ бахуыдтой фӕйнӕ дӕс ӕмӕ дыууиссӕдз ӕрвхуыз сӕхтӕджы, иу ӕмбӕрзӕны сӕхтӕджытӕ иннӕйы сӕхтӕджытӕн се ’мных куыд фӕуой, афтӕ — дыууӕ ӕмбӕрзӕны баиу кӕнынӕн.

¹³ Сарӕзтой дӕс ӕмӕ дыууиссӕдз сыгъзӕрин къӕпсыры ӕмӕ уыдонӕй дыууӕ ӕмбӕрзӕны баиу кодтой, ӕмӕ сӕ рауади Уаз Цӕрӕн.

¹⁴ Уый фӕстӕ тинтычъийӕ бауафтой иуӕндӕс уӕфтӕджы — Фембӕлды Цатыры цар ӕмбӕрзынӕн.

¹⁵ Уӕфтӕгтӕ уыдысты ӕмиӕстӕ: сӕ дӕргъ — фӕйнӕ дӕс ӕмӕ ссӕдз ӕлмӕрины, сӕ уӕрх та — фӕйнӕ цыппар ӕлмӕрины.

¹⁶ Фондз уӕфтӕджы дзы иумӕ бахуыдтой, ӕхсӕз уӕфтӕджы — иумӕ.

¹⁷ Цӕмӕй дыууӕ ӕмбӕрзӕны баиу кӕной, уый тыххӕй сын сӕ фӕйнӕ кӕроныл бахуыдтой фӕйнӕ дӕс ӕмӕ дыууиссӕдз сӕхтӕджы.

¹⁸ Сарӕзтой дӕс ӕмӕ дыууиссӕдз ӕрхуы къӕпсыры — сӕхтӕджытӕ кӕрӕдзиуыл фӕхӕцынӕн, цӕмӕй дыууӕ ӕмбӕрзӕны баиу кӕной ӕмӕ сӕ иу царӕмбӕрзӕн рауайа.

¹⁹ Цатыры царӕн ма скодтой ноджы иу ӕмбӕрзӕн — сырхахуырст фысдзӕрмттӕй, уый уӕлӕ та ӕрӕвӕрдтой иннӕ ӕмбӕрзӕн — гогырӕ сӕракӕй.

²⁰ Цатыры къултӕ саразынӕн акъацийӕ скодтой фӕлгӕттӕ:

²¹ сӕ дӕргъ — фӕйнӕ дӕс ӕлмӕрины, сӕ уӕрх та — ӕлмӕрин ӕмӕ ӕрдӕг.

²² Алы фӕлгӕт дӕр арӕзт ӕрцыд, ӕмных ӕвӕрд дыууӕ амадхъӕды баиу кӕнгӕйӕ. Цатыры къулты фӕлгӕттӕ иууылдӕр афтӕ сарӕзтой.

²³ Хуссарварс къулӕн скодтой ссӕдз фӕлгӕты

²⁴ ӕмӕ дыууиссӕдз ӕвзист бынӕнцайӕны, алы фӕлгӕтӕн дӕр — дыууӕ, йӕ дыууӕ амадхъӕдӕн.

²⁵ Цӕгатварс къулӕн дӕр скодтой ссӕдз фӕлгӕты

²⁶ ӕмӕ дыууиссӕдз ӕвзист бынӕнцайӕны, алы фӕлгӕтӕн дӕр — дыууӕ.

²⁷ Цатыры фӕстаг, ныгуылӕнварс цы къул уыди, уымӕн скодтой ӕхсӕз фӕлгӕты,

²⁸ Цатыры фӕстаг дыууӕ фисынӕн та — фӕйнӕ фӕлгӕты.

²⁹ Уыцы дыууӕ фӕлгӕты бынӕй уыдысты саджилгонд, сӕрӕй та, фыццаг цӕгыл ӕфтыдӕй — ӕнӕхъӕн. Афтӕмӕй, фӕстаг дыууӕ фисынӕн конд ӕрцыди фӕйнӕ фӕлгӕты.

³⁰ Уыцы аст фӕлгӕтӕн уыди ӕхсӕрдӕс ӕвзист бынӕнцайӕны, алы фӕлгӕтӕн дӕр — дыууӕ.

³¹ Акъацийӕ скодтой уӕладзӕнтӕ, фондз уӕладзӕны — Цатырӕн йӕ иу фарсы фӕлгӕттӕ баиу кӕнынӕн,

³² фондз — йӕ иннӕ фарсы фӕлгӕттӕ баиу кӕнынӕн, фондз та — йӕ фӕстаг фарсы фӕлгӕттӕ баиу кӕнынӕн, ныгуылӕнӕрдыгӕй.

³³ Алы къулӕн дӕр йӕ астӕуккаг уӕладзӕн тъыст ӕрцыди фӕлгӕтты ’хсӕнты — къулӕн йӕ иу кӕронӕй йӕ иннӕ кӕронмӕ.

³⁴ Фӕлгӕттӕ састӕрдтой сыгъзӕринӕй, сӕ фӕрсчытыл сын бафидар кодтой сыгъзӕрин цӕгтӕ, хъилтӕ дзы батъыссынӕн, ӕмӕ уӕладзӕнтӕ дӕр састӕрдтой сыгъзӕринӕй.

³⁵ Бауӕфтой мидӕмбӕрзӕн — ӕрвхуыз, сӕнт сырх ӕмӕ игӕрхуыз тӕбын ӕмӕ здыхт гӕнӕй. Херувимты нывӕфтыд сурӕттӕй йӕ сфӕлыстой.

³⁶ Дуарӕмбӕрзӕнӕн скодтой цыппар акъаци цӕджындзы, састӕрдтой сӕ сыгъзӕринӕй, бакодтой сыл сыгъзӕрин къӕпсыртӕ ӕмӕ сын рацагътой цыппар ӕвзист бынӕнцайӕны.

³⁷ Цатырмӕ бацӕуӕнӕн дӕр бауафтой дуарӕмбӕрзӕн. Уыд алыхуызон — ӕрвхуыз, сӕнт сырх ӕмӕ игӕрхуыз тӕбын ӕмӕ здыхт гӕнӕй.

³⁸ Скодтой йын фондз цӕджындзы къӕпсыртимӕ, цъуппытӕ ӕмӕ тӕлытӕ састӕрдтой сыгъзӕринӕй, цӕджындзтӕн скодтой фондз ӕрхуы бынӕнцайӕны.