Рацыд 32 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Сыгъзӕрин уӕныг

¹ Израилы адӕм бынӕй бирӕ фенхъӕлмӕ кастысты Моисейы ӕрыздӕхынмӕ хохӕй. Куынӕ ӕмӕ куынӕ зындис, уӕд ӕрӕмбырд сты Ааронмӕ ӕмӕ дзы ӕрдомдтой: «Нӕ разӕй чи цӕуа, ахӕм хуыцау нын сараз, науӕд нӕ Мысырӕй чи ракодта, уыцы лӕг — Моисей — цы баци, уымӕн ницы зонӕм».

² Аарон сын загъта: «Уӕ устытӕ, уӕ фырттӕ ӕмӕ уӕ чызджытӕн сӕ хъусцӕджытӕ рафтаут ӕмӕ сӕ ардӕм ӕрбахӕссут».

³ Адӕм сӕ хъусцӕджытӕ рафтыдтой ӕмӕ сӕ Ааронмӕ ӕрбахастой.

⁴ Аарон сӕ райста, стайын сӕ кодта ӕмӕ сӕ джиппыуагъд уӕныг сарӕзта. Уӕд адӕм загътой: «Мӕнӕ дӕ хуыцау, Израил! Мысыры зӕххӕй дӕ уый ракодта!»

⁵ Аарон уый куы федта, уӕд уӕныджы раз нывондхӕссӕн сарӕзта ӕмӕ загъта: «Райсом Дунедарӕджы бӕрӕгбон у!»

⁶ Дыккаг бон райсомӕй адӕм ӕрхастой иууылсудзинӕгтӕ ӕмӕ фидыды нывӕндтӕ. Стӕй ӕрбадтысты хӕрд ӕмӕ нозтыл, уый фӕстӕ сыстадысты ӕмӕ хъазт сарӕзтой.

⁷ Дунедарӕг Моисейӕн загъта: «Цӕугӕ бынмӕ! Сӕнӕуаг сты дӕ адӕм — Мысырӕй кӕй ракодтай, уыдон.

⁸ Цы фӕндагыл цӕуын сын бафӕдзӕхстон, уымӕй ӕгӕр тагъд фӕзылдысты! Сӕхицӕн скодтой сыгъзӕрин уӕныг ӕмӕ йӕм бакуывтой, ӕрхастой йын нывӕндтӕ. Загътой: „Мӕнӕ дӕ хуыцау, Израил! Мысыры зӕххӕй дӕ уый ракодта!“»

⁹ Дунедарӕг ма ноджыдӕр загъта Моисейӕн: «Куыд кӕсын, афтӕмӕй ацы адӕм тынг хиваст сты.

¹⁰ Мацы Мӕ бадом! Мӕ маст сыл ныххуырсдзынӕн ӕмӕ сӕ бабын кӕндзынӕн — дӕуӕй та рантысын кӕндзынӕн стыр адӕм».

¹¹ Фӕлӕ Моисей лӕгъстӕ кӕнын байдыдта Дунедарӕгӕн, йӕ Хуыцауӕн: «О Дунедарӕг! Цӕй тыххӕй судзы Дӕ маст Дӕ адӕммӕ — Мысыры зӕххӕй Де стыр хъару, Де стыр хъомысы фӕрцы кӕй ракодтай, уыдонмӕ?

¹² Цӕмӕн Дӕ хъуамӕ зӕгъой мысырӕгтӕ, уыцы адӕмы сӕ фыдбылызӕн акодта Мысырӕй — хӕхты сӕ бабын кодта, зӕххы цъарӕй сӕ фесӕфта, зӕгъгӕ? Бауром Дӕ судзгӕ маст ӕмӕ Дӕ адӕмы бахиз фыдбылызӕй.

¹³ Ӕрхъуыды кӕн, дӕ цагъартӕ Авраам, Исаак ӕмӕ Израилӕн куыд расомы кодтай, уый, — Ды расомы кодтай Дӕхицӕй, сӕ байзӕддаг сын арвы стъалытау кӕй сбирӕ кӕндзынӕ, зӕрдӕ сын цы зӕххӕй бавӕрдтай, уый дӕр сын сӕ байзӕддӕгтӕн мыггагмӕ кӕй ратдзынӕ фыдӕй-фыртмӕйы исбонӕн».

¹⁴ Ӕмӕ Дунедарӕг Йӕ фӕнд аивта — Йӕ адӕммӕ цы бӕллӕхӕй ӕвзыста, уый амӕттаг сӕ нал фӕкодта.

¹⁵ Моисей фӕзылд ӕмӕ дӕлӕмӕ фӕуырдыг кодта. Йӕ къухты хаста Фидыды дыууӕ къӕйдуры — дыууӕрдыгӕй дӕр сыл фыстытӕ.

¹⁶ Уыцы къӕйдуртӕ Хуыцау Йӕхӕдӕг скодта, къӕйдуртыл фыстытӕ дӕр Хуыцау Йӕхӕдӕг скъахта.

¹⁷ Йешуайӕн адӕмы уынӕр йӕ хъустыл ауад ӕмӕ Моисеймӕ дзуры: «Хӕстон уынӕр хъуысы рӕсӕнуатӕй».

¹⁸ Моисей йын афтӕ: «Уый нӕдӕр уӕлахиздзауты хъӕр уыдзӕни, нӕдӕр — бӕрзӕйсаст адӕмы ӕрдиаг. Зарын уайы мӕ хъустыл».

¹⁹ Рӕсӕнуатмӕ куы ӕрӕввахс сты, уӕд Моисей федта уӕныг, федта кафӕг адӕмы. Йӕ маст рафыхти Моисейӕн ӕмӕ, йӕ къухы цы къӕйдуртӕ уыд, уыдон хохы рӕбын зӕххыл ныццавта, ӕмӕ ныппырх сты.

²⁰ Джиппыуагъд уӕныджы арты басыгъта, йӕ сыгъдон ын лыстӕг ныммур кодта ӕмӕ йӕ доны ныккалдта, стӕй уыцы дон израилӕгтӕн бануазын кодта.

²¹ Моисей Аароны фӕрсы: «Ацы адӕм дын цы ракодтой, цӕмӕн сӕ баппӕрстай ахӕм стыр тӕригъӕды?»

²² Аарон ын загъта: «Дӕ хорзӕхӕй, ме ’лдар, ма мӕсты кӕн. Ацы адӕм фыд ракӕнынмӕ ӕмхиц сты, уый зоныс.

²³ Баййардтой мӕ, скӕн, дам, нын, нӕ разӕй чи цӕуа, ахӕм хуыцау, науӕд, дам, нӕ Мысырӕй чи ракодта, уыцы лӕг — Моисей — цы баци, уымӕн ницы зонӕм.

²⁴ Ӕз сын загътон, сыгъзӕрин фӕлындӕнтӕ уӕ кӕуыл ис, уыдон сӕ рафтауӕнт ӕмӕ сӕ мӕнмӕ раттӕнт, зӕгъгӕ. Радтой мӕм сӕ, арты сӕ баппӕрстон, ӕмӕ сӕ стӕй рауад ацы уӕныг».

²⁵ Моисей федта: адӕм сӕхи фӕнд атардтой, ӕмӕ сын Аарон сӕ ных нӕ бакъуырдта, фӕлӕ сӕ фыдгулты цӕсты бафтыдта.

²⁶ Рӕсӕнуаты дуарыл ӕрлӕууыди Моисей ӕмӕ загъта: «Дунедарӕджы фарс чи у, уыдон-ма мӕ размӕ рацӕуӕнт!» Левийы байзӕддӕгтӕ иууылдӕр ӕрӕмбырд сты йӕ размӕ.

²⁷ Моисей сын загъта: «Афтӕ зӕгъы Дунедарӕг, Израилы Хуыцау. Алчидӕр уӕ йӕ кард райсӕд ӕмӕ рӕсӕнуатыл ӕрзилӕд иу дуарӕй иннӕ дуары онг, ӕмӕ уӕ алчидӕр амарӕд йе ’фсымӕры, йе ’мбалы, йӕ хионы».

²⁸ Левийы байзӕддӕгтӕ бакодтой, Моисей сын куыд загъта, афтӕ, ӕмӕ уыцы бон адӕмӕй фӕцагъды ис ӕртӕ мины бӕрц.

²⁹ Моисей сын ноджы загъта: «Ацы бон сымах уӕхи снывонд кодтат Дунедарӕгӕн уазлӕггад кӕнынӕн: ничи уӕ бавгъау кодта Уымӕн йӕ фырты дӕр ӕмӕ йе ’фсымӕры дӕр, ӕмӕ Дзы арфӕгонд стут!»

³⁰ Дыккаг бон Моисей адӕмӕн афтӕ: «Стыр тӕригъӕд ракодтат. Цӕуон ӕмӕ ссӕуон Дунедарӕгмӕ, кӕд уӕ сраст кӕнин».

³¹ Аздӕхти Дунедарӕгмӕ ӕмӕ Йын загъта: «О Дунедарӕг! Ацы адӕм стыр тӕригъӕд ракодтой. Сӕхицӕн сыгъзӕринӕй скодтой хуыцау.

³² Ныббар сын сӕ тӕригъӕд. Кӕд сын нӕ барыс, уӕд та Дӕ курын, ӕмӕ мӕ ном дӕр фесаф, кӕм ӕй ныффыстай, Дӕ уыцы чиныгӕй».

³³ Дунедарӕг Моисейӕн загъта: «Ӕз Мӕ Чиныгӕй фесафдзынӕн, Мӕ ныхмӕ тӕригъӕд чи ракӕна, уыдоны.

³⁴ Ныр цу ӕмӕ адӕмы акӕн, кӕдӕм дын загътон, уырдӕм. Мӕ зӕд цӕудзӕни дӕ разӕй. Мӕ разы чи фӕтӕригъӕдджын, уыдоны та, бафхӕрыны бон куы ралӕууа, уӕд бафхӕрдзынӕн».

³⁵ Дунедарӕг Израилы адӕмы бафхӕрдта, Аарон сын цы уӕныг скодта, уый тыххӕй.