Рацыд 26 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Фембӕлды Цатыр

¹ Цатырӕн сцӕттӕ кӕн дӕс уӕфтӕджы — здыхт гӕнӕй, ӕрвхуыз, тар сырх ӕмӕ сӕнт сырх тӕбынӕй. Сӕ уӕлӕ — херувимты дӕсны уафт фӕлгонцтӕ.

² Алы уӕфтӕгӕн дӕр йӕ дӕргъ — аст ӕмӕ ссӕдз ӕлмӕрины, йӕ уӕрх та — цыппар ӕлмӕрины. Иууылдӕр хъуамӕ ӕмиӕстӕ уой.

³ Алы фондз уӕфтӕджы дӕр иумӕ бахуый, дыууӕ егъау ӕмбӕрзӕны сӕ куыд рауайа, афтӕ.

^4-5 Ӕмбӕрзӕнты кӕройнаг уӕфтӕгтыл дӕргъӕй-дӕргъмӕ скӕн фӕйнӕ дӕс ӕмӕ дыууиссӕдз ӕрвхуыз сӕхтӕджы, иу ӕмбӕрзӕны сӕхтӕджытӕ иннӕйы сӕхтӕджытимӕ ӕмных куыд уой, афтӕ.

⁶ Сараз дӕс ӕмӕ дыууиссӕдз сыгъзӕрин къӕпсыры ӕмӕ уыдонӕй кӕрӕдзимӕ баиу кӕн дыууӕ ӕмбӕрзӕны, ӕмӕ сӕ рауайдзӕн Уаз Цӕрӕн.

⁷ Тинтычъийӕ сцӕттӕ кӕн иуӕндӕс уӕфтӕджы — Цатыры цар ӕмбӕрзынӕн.

⁸ Алы уӕфтӕгӕн дӕр йӕ дӕргъ уӕд дӕс ӕмӕ ссӕдз ӕлмӕрины, йӕ уӕрх та — цыппар ӕлмӕрины. Иууылдӕр хъуамӕ ӕмиӕстӕ уой.

⁹ Фондз уӕфтӕджы дзы кӕрӕдзимӕ бахуый, ӕхсӕз уӕфтӕджы — кӕрӕдзимӕ (ӕхсӕзӕм уӕфтӕг дыдагъӕй Цатырӕн йӕ бацӕуӕны сӕрмӕ ӕруадз).

¹⁰ Ӕмбӕрзӕнтӕй иуы кӕройнаг уӕфтӕгыл бахуый дӕс ӕмӕ дыууиссӕдз сӕхтӕджы, иннӕ ӕмбӕрзӕны кӕройнаг уӕфтӕгыл дӕр бахуый дӕс ӕмӕ дыууиссӕдз сӕхтӕджы — дыууӕ ӕмбӕрзӕны баиу кӕныны охыл.

¹¹ Сараз дӕс ӕмӕ дыууиссӕдз ӕрхуы къӕпсыры ӕмӕ сӕ сӕхтӕджытимӕ кӕрӕдзиуыл фӕхӕцын кӕн, цӕмӕй дыууӕ ӕмбӕрзӕнӕй рауайа иу — царӕмбӕрзӕн.

¹² Ӕмбӕрзӕны уӕлдай, уӕфтӕгӕй цы ӕмбис баззади, уый ӕруадз Цатыры фӕстаг къулыл,

¹³ уӕфтӕгты уӕлдай та — иуӕрдыгӕй дӕр ӕмӕ иннӕрдыгӕй дӕр ӕлмӕрины йас — ӕруадз Цатыры фӕрстыл, къултӕ дӕр ӕмбӕрзт куыд ӕрцӕуой, афтӕ.

¹⁴ Скӕнут-ма цатыры сӕрӕн ноджыдӕр иу ӕмбӕрзӕн — сырхахуырст фысдзӕрмттӕй, уый уӕлӕ та ӕрӕвӕрут ӕндӕр ӕмбӕрзӕн — гогырӕ сӕракӕй.

Фембӕлды Цатыры хъӕдӕрмӕг

¹⁵ Цатыры къултӕн скӕнут акъаци фӕлгӕттӕ:

¹⁶ алкӕмӕн дӕр дзы йӕ дӕргъ — дӕс ӕлмӕрины, йӕ уӕрх — ӕлмӕрин ӕмӕ ӕрдӕг.

¹⁷ Хъуамӕ алы фӕлгӕт дӕр арӕзт ӕрцӕуа кӕрӕдзимӕ баиугонд дыууӕ хъӕдӕй. Цатыры къулты фӕлгӕттӕ иууылдӕр хъуамӕ уой ахӕмтӕ.

¹⁸ Хуссарварс къулӕн скӕн ссӕдз фӕлгӕты

¹⁹ ӕмӕ дыууиссӕдз ӕвзист бынӕнцайӕны, алы фӕлгӕтӕн дӕр — дыууӕ, йӕ дыууӕ хъӕдӕн.

²⁰ Цӕгатварс къулӕн дӕр скӕн ссӕдз фӕлгӕты

²¹ ӕмӕ дыууиссӕдз ӕвзист бынӕнцайӕны, алы фӕлгӕтӕн дӕр — дыууӕ.

²² Цатыры фӕстаг, ныгуылӕнварс, къулӕн скӕнут ӕхсӕз фӕлгӕты,

²³ фӕстаг дыууӕ фисынӕн та — фӕйнӕ.

²⁴ Уыцы дыууӕ фӕлгӕты хъуамӕ бынӕй уой саджилгонд, уӕлейӕ та (фыццаг цӕг кӕм ис, уым) — ӕнӕхъӕн. Ахӕм фӕлгӕттӕ хъуамӕ уой дыууӕ, алы фисынӕн дӕр — фӕйнӕ.

²⁵ Уыцы аст фӕлгӕтӕн скӕнын хъӕуы ӕхсӕрдӕс ӕвзист бынӕнцайӕны, алы фӕлгӕтӕн дӕр — дыууӕ.

²⁶ Акъацийӕ скӕн уӕладзӕнтӕ, фондз — Цатырӕн йӕ иу фарсы фӕлгӕттӕ баиу кӕнынӕн,

²⁷ фондз — йӕ иннӕ фарсы фӕлгӕттӕ баиу кӕнынӕн, фондз та — йӕ фӕстаг фарсы фӕлгӕттӕ баиу кӕнынӕн — ныгуылӕнӕрдыгӕй.

²⁸ Астӕуккаг уӕладзӕн хъуамӕ ацӕуа фӕлгӕтты ’хсӕнты — иу кӕронӕй иннӕ кӕронмӕ.

²⁹ Фӕлгӕттӕ састӕр сыгъзӕринӕй, сыгъзӕринӕй скӕн цӕгтӕ, уӕладзӕнтӕ дзы батъыссынӕн, ӕмӕ уӕладзӕнтӕ дӕр састӕр сыгъзӕринӕй.

³⁰ Цатыр ӕрӕвӕр, хохы сӕр дын амынд куыд ӕрцыди, афтӕ.

Фембӕлды Цатыры дуарӕмбӕрзӕнтӕ

³¹ Бауаф мидӕмбӕрзӕн ӕрвхуыз, тар сырх ӕмӕ сӕнт сырх тӕбын ӕмӕ здыхт гӕнӕй. Йӕ уӕлӕ — херувимты дӕсны уафт фӕлгонцтӕ.

³² Ӕрцауындз ӕй сыгъзӕринастӕрд цыппар акъаци цӕджындзыл, сыгъзӕрин къӕпсыртӕ сыл, цӕджындзтӕн — цыппар ӕвзист бынӕнцайӕны.

³³ Мидӕмбӕрзӕн ӕрцауындз къӕпсыртыл ӕмӕ йын Фидыды Чырын сӕвӕр йӕ фӕстӕ. Уыцы мидӕмбӕрзӕн уыдзӕни Рухсмонуат ӕмӕ Уаз бынаты ’хсӕн ӕмӕ сӕ кӕрӕдзийӕ хицӕн кӕндзӕни.

³⁴ Фидыды Чырынӕн Рухсмонуаты йӕ сӕр йӕ уӕлӕ сӕвӕр.

³⁵ Мидӕмбӕрзӕны раз ӕрӕвӕр фынг, фынджы бакомкоммӕ та — цырагъдарӕн. Цырагъдарӕн Цатырӕн хъуамӕ лӕууа йӕ хуссарварс, фынг та — йӕ цӕгатварс.

³⁶ Цатырмӕ бацӕуӕнӕн дӕр бауафын кӕн нывӕфтыд дуарӕмбӕрзӕн. Хъуамӕ уа ӕрвхуыз, тар сырх ӕмӕ сӕнт сырх тӕбынӕй ӕмӕ здыхт гӕнӕй.

³⁷ Ацы дуарӕмбӕрзӕнӕн скӕн фондз акъаци цӕджындзы, састӕр сӕ сыгъзӕринӕй ӕмӕ сыл бакӕн сыгъзӕрин къӕпсыртӕ. Цӕджындзтӕн ӕрхуыйӕ рацӕгъд фондз бынӕнцайӕны.