Рацыд 2 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Моисейы райгуырд

¹ Левийы хӕдзарвӕндагӕй иу лӕг ӕрхуыдта ус, уый дӕр — Левийы хӕдзарвӕндагӕй.

² Ус банхъӕлцау ис ӕмӕ ныййардта лӕппу. Лӕппу рӕсугъд у, уый федта ӕмӕ йӕ ӕртӕ мӕйы дӕргъы ӕмбӕхстӕй фӕдардта.

³ Дарддӕр ын ӕмбӕхсӕн куынӕуал уыд, уӕд хъӕзӕй быд чыргъӕд писийӕ байсӕрста, сабийы дзы нывӕрдта ӕмӕ йӕ Нилы былгӕрон хъамылы ныууагъта.

⁴ Сабийы хо дӕрддзӕфгомау лӕууыд ӕмӕ, дарддӕр цы уыдзӕн, уымӕ йӕ хъус дардта.

⁵ Уалынмӕ фараоны чызг йӕ унӕуттимӕ Нилмӕ йӕхи найынмӕ рацыди. Чыргъӕдыл йӕ цӕст ӕрхӕцыдис хъамылы, ӕмӕ йӕ ӕрбахӕссын кодта.

⁶ Байгом ӕй кодта, ӕмӕ дзы — саби. Сывӕллон куыдта, ӕмӕ йын фӕтӕригъӕд кодта. «Ай дзуттаг сывӕллон у», — загъта фараоны чызг.

⁷ Сабийы хо йӕ бафарста: «Дзуттаг дыджызӕмӕ фӕдзурон, цӕмӕй дын ӕй схӕсса?»

⁸ «Фӕдзур», — загъта фараоны чызг. Чызг ацыд ӕмӕ сабийы мады ӕрбакодта.

⁹ Фараоны чызг ын загъта: «Ацы сабийы мын схӕсс, ӕмӕ дын бафиддзынӕн». Сылгоймаг райста сабийы ӕмӕ йӕ хӕссын райдыдта.

¹⁰ Куы байрӕзт, уӕд ӕй бакодта фараоны чызгмӕ, ӕмӕ дзы уый йӕхицӕн лӕппу загъта, ном та йыл сӕвӕрдта Моисей. «Донӕй йӕ кӕй систон, уымӕ гӕсгӕ», — загъта чызг.

Моисей алыгъди Мидианмӕ

¹¹ Рӕстӕг цыд, ӕмӕ Моисей ралӕг ис. Иуахӕмы бацыд йе ’фсымӕртӕм, израилӕгтӕм, ӕмӕ сын федта сӕ удхайраг куыст. Федта, мысыраг ын йе ’фсымӕртӕй иуы, дзуттаджы, фыр надӕй куыд мары, уый.

¹² Аракӕс-бакӕс кодта Моисей ӕмӕ, йӕ алыварс куы ничи уыд, уӕд амардта мысыраджы ӕмӕ йын йӕ мард змисы баныгӕдта.

¹³ Дыккаг бон дӕр та сӕм бацыд, ӕмӕ дын мӕнӕ дыууӕ дзуттаджы хыл кӕнынц. Моисей ӕфхӕрӕджы фӕрсы: «Де ’мбалы цӕмӕн нӕмыс?»

¹⁴ Уый йын афтӕ: «Чи дӕ баурӕдта махӕн хицау ӕмӕ тӕрхоны лӕгӕй? Мӕн дӕр, мысыраджы куыд амардтай, афтӕ марынмӕ хъавыс?» Моисей фӕтарст, йӕхинымӕр загъта: «Бӕлвырд, уыцы хъуыддаг нӕ басусӕг ис».

¹⁵ Фараон хабар куы базыдта, уӕд марынвӕнд скодта Моисейы. Фӕлӕ Моисей алыгъд ӕмӕ Мидианы зӕххыл ӕрбынат кодта. Цъайы цур куыд бадт,

¹⁶ афтӕ ӕрбацыдысты Мидианы сауджыны авд чызджы, цӕмӕй сӕ фыды дзугӕн тӕгӕнатӕм дон сисой.

¹⁷ Уӕдмӕ фыййӕуттӕ фӕзындысты ӕмӕ сӕ хъуамӕ атардтаиккой. Моисей чызджыты сӕрыл рахӕцыд ӕмӕ сын сӕ фыстӕн дон бадардта.

¹⁸ Чызджытӕ сӕ фыд Реуелмӕ куы баздӕхтысты, уӕд сӕ уый бафарста: «Абон цӕй тагъд уыдыстут?»

¹⁹ Уыдон ын загътой: «Цавӕрдӕр мысыраг нӕ сӕрыл рахӕцыди фыййӕутты раз, суанг ма нын дон дӕр систа ӕмӕ бадардта нӕ фыстӕн».

²⁰ «Ӕмӕ цы фӕци? — бафарста уый йӕ чызджыты. — Цӕуылнӕ йӕ ӕрбахуыдтат? Фӕдзурут ӕм, ӕмӕ немӕ къӕбӕр бахӕра».

²¹ Моисей сфӕнд кодта уыцы лӕгмӕ баззайын. Уый йын радта йӕ чызг Циппорайы.

²² Лӕппу сын райгуырд, ӕмӕ йыл Моисей сӕвӕрдта ном Гершом ӕмӕ загъта: «Ацы ном нысан кӕны, ӕз ӕцӕгӕлон зӕххыл ӕрцӕуӕггаг кӕй дӕн, уый».

Израилӕгты дзыназын фехъуысти Хуыцаумӕ

²³ Рацыди дзӕвгар рӕстӕг. Мысыры паддзах амарди. Израилӕгтӕ сӕ уӕззау куыстӕй ӕнцой нӕ зыдтой, ӕрдиаг кодтой, ӕххуысмӕ дзынӕзтой, ӕмӕ сӕ хъӕрзын Хуыцаумӕ фехъуысти.

²⁴ Фехъуыста сын Хуыцау сӕ хъӕрзын, ӕмӕ ӕрлӕууыд Йӕ зӕрдыл Йӕ фидыд Авраам, Исаак ӕмӕ Йаковимӕ.

²⁵ Ӕркасти Хуыцау Израилы байзӕддӕгтӕм. Хуыцау сӕм Йе ’ргом раздӕхта.