Рацыд 16 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

Маннӕ ӕмӕ уӕрццытӕ

¹ Израилӕгтӕ Елимӕй куы рацыдысты, уӕд, Елим ӕмӕ Синайы ’хсӕн, Син, зӕгъгӕ, цы ӕдзӕрӕг быдыр ис, уырдӕм бафтыдысты. Уый уыди, Мысырӕй куы рацыдысты, уымӕн йӕ дыккаг мӕйы фынддӕсӕм бон.

² Израилы дзыллӕ та ӕдзӕрӕг быдыры ногӕй хъуыр-хъуыр кӕнын райдыдтой Моисей ӕмӕ Аароныл.

³ Дзырдтой: «Фӕлтау Мысыры куы амардаиккам Дунедарӕджы къухӕй. Уым бадтыстӕм дзидзайы ӕгты уӕлхъус, нӕ фаг нын уыди дзул! Сымах та не ’ппӕты дӕр ацы ӕдзӕрӕг быдырмӕ сыдӕй амарынмӕ ракодтат».

⁴ Ӕмӕ Дунедарӕг Моисейӕн загъта: «Дзул уын ӕруарын кӕндзынӕн арвӕй. Адӕм-иу алы бон дӕр рацӕуӕнт ӕмӕ-иу сӕхицӕн бонваг ӕруидзӕнт. Ӕз та сӕ бафӕлвардзынӕн, кӕддӕра Мын Ме ’Гъдау куыд ӕххӕст кӕнынц.

⁵ Ӕхсӕзӕм бон та ӕруидзӕнт, цас сын бантыса, уый бӕрц, ӕмӕ фендзысты, иннӕ бонтимӕ абаргӕйӕ, дыууӕ хатты фылдӕр кӕй ӕруыгътой, уый».

⁶ Моисей ӕмӕ Аарон израилӕгтӕн загътой: «А изӕр базондзыстут, Мысырӕй уӕ Дунедарӕг кӕй ракодта, уый.

⁷ Куы ӕрбабон уа, уӕд та фендзыстут Дунедарӕджы кад. Уымӕн ӕмӕ Дунедарӕг фехъуыста, куыд Ыл бустӕ кодтат, уый. Мах та чи стӕм? Махыл нӕ, фӕлӕ Хуыцауыл кӕнут бустӕ!»

⁸ Ноджы ма Моисей загъта: «Дунедарӕг уын уӕ фаг ратдзӕн: изӕры — дзидза, райсомӕй та — дзул. Уымӕн ӕмӕ уын фехъуыста уӕ хъуыр-хъуыр. Сымах Дунедарӕгыл бустӕ кодтат, махыл нӕ, фӕлӕ. Мах чи стӕм?!»

⁹ Моисей Ааронӕн бафӕдзӕхста: «Израилы дзыллӕйӕн зӕгъ, цӕмӕй Дунедарӕджы раз ӕрлӕууой, уымӕн ӕмӕ сын Дунедарӕг фехъуыста сӕ хъуыр-хъуыр».

¹⁰ Аарон уыцы ныхас израилӕгтӕн куы рафӕзмыдта, уӕд адӕм се ’ргом ӕдзӕрӕг быдырмӕ сарӕзтой — ӕмӕ дын сӕм ӕврагъӕй куы разынид Дунедарӕджы кад.

¹¹ Дунедарӕг Моисейӕн загъта:

¹² «Израилӕгты хъуыр-хъуыр фехъуыстон, ӕмӕ сын афтӕ зӕгъ: изӕры хӕрдзыстут дзидза, райсом та уын уӕ фаг уыдзӕн дзул. Ӕмӕ уӕд бамбардзыстут, Ӕз Дунедарӕг кӕй дӕн, уӕ Хуыцау, уый».

¹³ Изӕры рӕсӕнуат уӕрццытӕй байдзаг ис, райсомӕй та йӕ алыварс зӕххыл ӕртӕх ӕрбадт.

¹⁴ Ӕртӕх куы байсыст, уӕд зӕххы уӕлцъарыл разынди халасы хуызӕн цыдӕр лӕхурӕг.

¹⁵ Израилӕгтӕ йӕ куы федтой, уӕд кӕрӕдзийы фарстой: «Уый цы уа, цымӕ?» Ницы йын зыдтой. Моисей сын загъта: «Уый дзул у, Дунедарӕг уын ӕй хӕрынӕн дӕтты.

¹⁶ Дунедарӕг уын фӕдзӕхсы, цӕмӕй дзы алчи йӕ бинонты фаг ӕруидза — алы адӕймагӕн дӕр иу омеры бӕрц».

¹⁷ Израилӕгтӕ бакодтой, куыд загъд сын уыд, афтӕ. Чи сӕ фылдӕр ӕруыгъта, чи та — къаддӕр.

¹⁸ Цы ӕруыгътой, уый омерӕй куы барстой, уӕд рауад афтӕ, ӕмӕ, бирӕ чи ӕрӕмбырд кодта, уымӕ уӕлдай нӕ уыди, къаддӕр чи ӕрӕмбырд кодта, уый та нӕ баййӕфта хъуаг. Алчидӕр сӕ ӕруыгъта йӕ бинонты фаг.

¹⁹ Моисей сын загъта: «Райсоммӕ дзы мацы ныууадзут».

²⁰ Фӕлӕ йӕм нӕ байхъуыстой. Чидӕртӕ дзы ныууагътой райсоммӕ, ӕмӕ сын скӕлм ӕмӕ сысмаг ис, ӕмӕ сӕм уый тыххӕй Моисей смӕсты.

²¹ Алы райсом алчидӕр уыгъта йӕ бинонты фаг. Зӕххыл ма-иу цы баззад, уый та-иу фӕстӕдӕр хуры хъарммӕ атад.

²² Ӕхсӕзӕм бон ӕруыгътой дыууӕ хатты фылдӕр — алкӕмӕн дӕр дыууӕ омеры бӕрц. Дзыллӕйы хистӕртӕ йӕ Моисейӕн куы загътой,

²³ уӕд сын Моисейы ныхас уыди: «Уый тыххӕй Дунедарӕг дзырдта. Райсом ӕнцойбон у, Дунедарӕджы уаз сабат. Цы фыцинаг стут, уый абон сфыцут, уӕ хӕринагӕй ма цы баззайа, уый та райсоммӕ бавӕрут».

²⁴ Ӕмӕ сын Моисей куыд загъта, афтӕ, сӕ хӕринагӕй ма цы баззад, уымӕй дыккаг бонмӕ ныууагътой, ӕмӕ сын нӕ сысмаг ис ӕмӕ не скӕлм ис.

²⁵ Моисей загъта: «Хӕрут ӕй абон. Абон Дунедарӕджы сабат у, ӕмӕ быдыры ницы ссардзыстут.

²⁶ Уидзут-иу ӕхсӕз боны дӕргъы, ӕвдӕм бон та сабат у, ӕмӕ уыцы бон ницы ссардзыстут».

²⁷ Адӕмӕй чидӕртӕ ӕвдӕм бон дӕр ацыдысты уидзынмӕ, фӕлӕ ницы ссардтой.

²⁸ Дунедарӕг Моисейӕн загъта: «Кӕдмӕ уӕхи тигъ кӕндзыстут Мӕ фӕдзӕхстытӕ ӕмӕ Мӕ уагӕвӕрдтыл?

²⁹ Хъусгӕ кӕнут: Дунедарӕг уын радта сабат, ӕмӕ уын уымӕ гӕсгӕ ӕхсӕзӕм бон дыууӕ боны фаг хӕринаг ӕрвиты. Ӕвдӕм бон-иу уӕ алчи йӕ хӕдзары бадӕд ӕмӕ макуыдӕм цӕуӕд».

³⁰ Ӕмӕ ӕвдӕм бон адӕм сӕ фӕллад уагътой.

³¹ Израилы адӕм уыцы хойраг схуыдтой маннӕ. Уыди хъонтхорайы нӕмыджы хуызӕн, урс, мыдамӕстыты ад кодта.

³² Моисей загъта: «Дунедарӕг бафӕдзӕхста, цӕмӕй маннӕйы иу омер бафснайат мыггагмӕ, ӕмӕ фыдӕй-фыртмӕ алчидӕр уына, Мысырӕй ракӕнгӕйӕ уӕ ӕдзӕрӕг быдыры Дунедарӕг цы дзулӕй хаста, уый».

³³ Моисей Ааронӕн загъта: «Райс дурын, ныккӕн дзы маннӕйы иу омер ӕмӕ йӕ ӕрӕвӕр Дунедарӕджы раз, цӕмӕй уе ’ппӕт фӕлтӕртӕн дӕр уым ӕфснайдӕй лӕууа».

³⁴ Аарон маннӕйы дурын сӕвӕрдта Фидыды Чырыны раз, цӕмӕй уыцы ран ӕфснайд уа, Дунедарӕг Моисейӕн куыд бафӕдзӕхста, афтӕ.

³⁵ Цалынмӕ израилӕгтӕ Ханаанмӕ нӕ бахӕццӕ сты, уӕдмӕ дыууиссӕдз азы дӕргъы ӕдзӕрӕг быдыры маннӕйӕ цардысты.

³⁶ (Омер у ефӕйы дӕсӕймаг хай.)