Райдиан 9 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Хуыцау раарфӕ кодта Ной ӕмӕ йӕ фырттӕн. Загъта сын: «Цот уадзут ӕмӕ сбирӕ ут, зӕхх уӕ байдзаг уӕд.

² Тӕрсӕнт уӕ ӕппӕт сырдтӕ, фос, уӕларвон мӕргътӕ, хилӕгойтӕ ӕмӕ денджызы кӕсӕгтӕ. Уӕ бӕрны уын сӕ кӕнын.

³ Цӕрӕгойы мыггагӕй цыдӕриддӕр ис, уыдон уын дӕттын хӕрынӕн, айразмӕ уын алы зайӕгхал куыд радтон, афтӕ.

⁴ Фыдызгъӕл хӕрыны бар уын ис, фӕлӕ туджы хъӕстӕ ма фӕут, уымӕн ӕмӕ туджы ис цард.

⁵ Ӕмӕ уӕхи туг, — уӕ цард кӕй мидӕг ис, — уый дӕр хъуамӕ макуы ныккӕла. Иунӕг адӕймаджы туг дӕр Мын ӕнӕистӕй нӕ баззайдзӕни — сырдӕй уа, адӕймагӕй уа.

⁶ Адӕймаджы туг чи ныккала, уый туг ныккӕлдзӕн адӕймаджы къухӕй, уымӕн ӕмӕ йӕ Хуыцау Йӕхи ӕнгӕс сфӕлдыста.

⁷ Цот уадзут уӕдӕ, ӕмӕ сбирӕ ут, зӕххӕн уӕз куыд кӕнат, афтӕ».

⁸ Хуыцау загъта Ной ӕмӕ йӕ фырттӕн:

⁹ «Абон Ӕз фидыд аразын уемӕ ӕмӕ уӕ байзӕддӕгтимӕ,

¹⁰ стӕй ма цӕрӕг удӕй уемӕ цыдӕриддӕр ис, уыдонимӕ: мӕргътимӕ, фосимӕ ӕмӕ сырдтимӕ — науӕй рацӕуӕг ӕппӕт зӕххон цӕрӕгойтимӕ.

¹¹ Уемӕ аразын фидыд: никуыуал бабын кӕндзынӕн ӕппӕт цӕрӕг удты, доныхъаймӕт нал ӕрцӕудзӕни зӕххыл».

¹² Хуыцау ма загъта: «Мӕнӕ, сымахимӕ ӕмӕ ма уемӕ цӕрӕг удӕй цыдӕриддӕр ис, уыдонимӕ мыггагмӕ цы фидыд аразын, уый нысан:

¹³ ӕврӕгътыл ӕвӕрын Ме ’рдын — арвӕрдын. Уый уыдзӕни Мӕн ӕмӕ зӕххы ’хсӕн фидыды нысан.

¹⁴ Зӕххы сӕрмӕ-иу ӕврӕгътӕ куы рауадзон ӕмӕ-иу ӕврӕгътыл арвӕрдын куы фӕзына,

¹⁵ уӕд-иу Мӕ зӕрдыл ӕрлӕудзӕни, уемӕ ӕмӕ алы цӕрӕгоимӕ цы фидыд сарӕзтон, уый, ӕмӕ нал уыдзӕни доныхъаймӕт — ӕппӕт цӕрӕг удты сафӕг.

¹⁶ Ӕврӕгътыл-иу арвӕрдын куы фӕзына, уӕд-иу ӕй Ӕз фендзынӕн ӕмӕ-иу Мӕ зӕрдыл ӕрлӕудзӕни, зӕххыл цӕрӕг удӕй цы ис, Хуыцау уыдонимӕ мыггагмӕйы фидыд кӕй сарӕзта, уый».

¹⁷ Хуыцау загъта Нойӕн: «Гъе уый — ӕппӕт зӕххон цӕрӕг удтимӕ цы фидыд аразын, уый нысан».

¹⁸ Нойы фырттӕ, науӕй чи рацыди, уыдон: Сим, Хам ӕмӕ Йафет. Хам уыди Ханааны фыд.

¹⁹ Ацы ӕртӕ уыдысты Нойы фырттӕ — зӕххон адӕм иууылдӕр уыдонӕй равзӕрдысты.

²⁰ Ной ныллӕууыди зӕххы куыстыл. Фыццаг сӕндон уый сарӕзта.

²¹ Иуахӕмы бануӕзта сӕн, барасыг ис ӕмӕ бӕгънӕгӕй хуыссыди йӕ цатыры.

²² Афтӕмӕй йӕ федта Хам, Ханааны фыд, ӕмӕ йӕ радзырдта йӕ дыууӕ ӕфсымӕрӕн.

²³ Уӕд Сим ӕмӕ Йафет райстой пӕлӕз, сӕ уӕхсчытыл ӕй ӕрбакодтой, чъылдымыздӕхтӕй бацыдысты сӕ фыдмӕ ӕмӕ йӕ ӕрӕмбӕрзтой. Се ’ргом иннӕрдӕм здӕхт уыд, ӕмӕ сӕ фыды бӕгънӕгӕй нӕ федтой.

²⁴ Ной куы ӕрӕрвонг ис, уӕд базыдта, йӕ кӕстӕр фырт ын цы бакуыста, уый,

²⁵ ӕмӕ загъта: «Ӕлгъыстаг фӕуӕд Ханаан! Йе ’фсымӕрты цагъартӕн — сӕ дӕлдӕр!»

²⁶ Загъта ма: «Арфӕгонд уӕд Дунедарӕг, Симы Хуыцау! Ханаан йӕ цагъар суӕд Симӕн!

²⁷ Йафетӕн парахат зӕхх бауарзӕд Хуыцауы цӕст, ӕмӕ Симы цатырты ӕрцӕрӕд! Йафетӕн дӕр суӕд йӕ цагъар Ханаан!»

²⁸ Доны хъаймӕты фӕстӕ ма Ной фӕцардис ӕртӕсӕдӕ фӕндзай азы.

²⁹ Ӕмткӕй райсгӕйӕ та Ной фӕцарди фарастсӕдӕ фӕндзай азы, стӕй амард.