Псаломтӕ 98 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Дунедарӕг у Паддзах, ӕмризӕджы ризӕнт адӕмтӕ! Уый ӕнцайы херувимтыл; уадз ӕмӕ ӕнкъуыса зӕхх!

² Стыр у Сионы Хуыцау, бӕрзонд у Йӕ кад ӕппӕт адӕмтӕм.

³ Стауӕнт уыдон Де стыр ӕмӕ тасӕфтауӕг ном: сыгъдӕг у уый!

⁴ Хъомысджын Паддзах раст тӕрхон уарзы. Ды сфидар кодтай рӕстдзинад, Йаковӕн равдыстай раст ӕмӕ ӕнӕхӕрам тӕрхон.

⁵ Стаут Дунедарӕджы, нӕ Хуыцауы, бакувут Йӕ ӕрлӕууӕн бынатӕн: сыгъдӕг у Уый!

⁶ Моисей ӕмӕ Аарон Йӕ сауджынты ’хсӕн уыдысты, Самуел та — Йӕ ном Ын чи ары, уыдоны ’хсӕн. Уыдон Дунедарӕгмӕ дзынӕзтой, ӕмӕ сын Уый дзуапп лӕвӕрдта.

⁷ Ӕврагъцӕджындзӕй дзырдта семӕ, Ӕгъдау сын радта, ӕмӕ уыдон ӕххӕст кодтой Йӕ фӕдзӕхстытӕ, Йӕ уагӕвӕрдтӕ.

⁸ Дунедарӕг, нӕ Хуыцау! Ды сын дзуапп лӕвӕрдтай ӕмӕ сын уыдтӕ бараг Хуыцау, фӕлӕ сӕ ӕфхӕрдтай сӕ рӕдыдты тыххӕй.

⁹ Стаут Дунедарӕджы, нӕ Хуыцауы, кад Ын кӕнут Йӕ сыгъдӕг хохыл, уымӕн ӕмӕ сыгъдӕг у Дунедарӕг, нӕ Хуыцау!