Псаломтӕ 96 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Дунедарӕг у Паддзах! Райӕд зӕххы цъар, райӕнт денджызгӕрон ӕппӕт бӕстӕтӕ.

² Йӕ алыварс — мигъ, саудалынг, Йӕ паддзахы бадӕны бындур — рӕстдзинад ӕмӕ раст тӕрхон.

³ Йӕ разӕй цӕуы арт, Йӕ алыварс Ын бавзалы кӕны Йе знӕгты.

⁴ Йӕ арвӕрттывдтӕй рухс у дун-дуне; зӕхх уый уыны ӕмӕ ризы.

⁵ Хӕхтӕ тайынц мыдадзау Дунедарӕджы, зӕххы цъары Бардарӕджы раз.

⁶ Уӕлӕрвтӕ хъусын кӕнынц Йӕ раст тӕрхон, адӕмтӕ ӕвдисӕн сты Йӕ кадӕн.

⁷ Додой сӕ къона, гуымирытӕн чи кувы ӕмӕ сын лӕггад чи кӕны, уыдонӕн! Ӕппӕт хуыцӕуттӕ, зӕххыл ӕрхаут Йӕ разы!

⁸ Хъусы Сион ӕмӕ райы, цин кӕнынц Иудейы чызджытӕ, цин кӕнынц, Дунедарӕг, Дӕ раст тӕрхоныл!

⁹ Уымӕн ӕмӕ Ды, Дунедарӕг, ӕгас зӕххӕй бӕрзонддӕр, ӕппӕт хуыцӕуттӕй уӕлдӕр дӕ!

¹⁰ Дунедарӕджы уарзджытӕ, ӕнӕуынон уын уӕд фыддзинад! Уый хъахъхъӕны рӕстгӕнджыты, ӕнӕхуыцӕутты къухӕй сӕ бахизы.

¹¹ Рухс сӕрттывта рӕстгӕнӕгӕн, сыгъдӕг зӕрдӕты цин ӕрцарди.

¹² Цин кӕнут, рӕстудтӕ, Дунедарӕгыл, стаут Ӕй, уаз кӕй у, уый тыххӕй!