Псаломтӕ 93 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ О, алкӕмӕн йӕ хъуыддӕгтӕм гӕсгӕ фидӕг Хуыцау! О Дунедарӕг, раргом нӕм кӕн Дӕхи!

² Ӕгас зӕххы Тӕрхонгӕнӕг, сыст, хирвӕссонты бафхӕр!

³ О Дунедарӕг, ӕнӕхуыцӕуттӕ кӕдмӕ кӕндзысты уӕлахиз?

⁴ Сӕ ныхӕстӕ — къӕйных, сӕ фыдракӕндтӕй ӕппӕлынц.

⁵ О Дунедарӕг, ссӕндынц Дын Дӕ адӕмы, ӕфхӕрынц сӕ,

⁶ цӕгъдынц идӕдз сылгоймӕгты, ӕрцӕуӕггӕгты ӕмӕ сидзӕрты.

⁷ Уыдон дзурынц: «Дунедарӕг нӕ фендзӕнис, нӕ базондзӕнис уыдӕттӕ Йаковы Хуыцау».

⁸ Уӕхи ӕрӕмбарут, ӕдылытӕ! Ӕнӕфендтӕ, уӕ сӕры зонд кӕд бацӕудзӕн?

⁹ Ау, хъустӕ чи радта, уый ницы фехъусдзӕн? Цӕстытӕ сфӕлдисӕг, ау, ницы фендзӕнис?

¹⁰ Адӕмты Зондамонӕг, адӕймаджы Чи ахуыр кӕны, Уый, ау, сымах не ’рфӕрсдзӕн?

¹¹ Дунедарӕг зоны адӕмы хъуыдытӕ — уыдон кӕй ӕрбайсӕфынц мигъау.

¹² Дунедарӕг! Тӕхудиаг у, Ды зонд кӕмӕн амоныс, уыцы адӕймаг, Де ’Гъдауыл кӕй ахуыр кӕныс, уый,

¹³ цӕмӕй фыд заманы уа ӕдас, цалынмӕ ӕнӕхуыцауӕн уӕрм скъахтӕуа, уӕдмӕ.

¹⁴ Дунедарӕг нӕ ныууадздзӕн Йӕ адӕмы, Йӕ исбон Дзы нӕ ферох уыдзӕн.

¹⁵ Тӕрхондоны уӕлахиз кӕндзӕни рӕстдзинад, ӕмӕ рӕстудтӕ раст тӕрхоны фарс хӕцдзысты.

¹⁶ Фыдгӕнджыты ныхмӕ тохы чи бацӕудзӕн мӕ сӕрыл? Фыдлӕгты ныхмӕ чи рахӕцдзӕн мӕ фарс?

¹⁷ Дунедарӕг мыл куынӕ ӕххуыс кӕнид, уӕд афонмӕ зӕххыл мӕ кой дӕр нал уаид.

¹⁸ Куы-иу загътон, гъа, ныр фӕкӕлдзынӕн, зӕгъгӕ, уӕд-иу мӕ, Дунедарӕг, фӕфидар кодта Дӕ хорзӕх.

¹⁹ Мӕ зӕрдӕ хъизӕмар кӕны, фӕлӕ мӕ ’рсабыр кӕныс Ды, ӕмӕ та сцин кӕны мӕ уд.

²⁰ Фыдгӕнджыты паддзахы бадӕн, Де ’Гъдауы ныхмӕ чи цӕуы, уый не ’рфидар уыдзӕн Дӕ разы.

²¹ Уыдон рӕстудты ныхмӕ сыстынц, ӕнаххосты туг калынц,

²² фӕлӕ мӕн Дунедарӕг хъахъхъӕны, мӕ ныфсы мӕсыг у мӕ Хуыцау.

²³ Сӕ фыдбылызтӕ сын сӕхи ныхмӕ фӕкӕндзӕнис, сӕ фыдракӕндты тыххӕй ныццӕгъддзӕн, фесафдзӕн сӕ Дунедарӕг, нӕ Хуыцау.